04 May 2020, 18:01
ކޮވިޑް19 ބައްޔާ ގުޅެގެން މިހާރު ރާއްޖެ އޮތް ހާލަތުގައި މާ ގިނަ ދުވަހު ތިބެވެން ނެތްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ކޮވިޑް19 އާ ގުޅިގެން މިދިޔަ މާޗު މަހުގެ ތެރޭގައި ރާއްޖޭގައި ސިއްހީ ނުރައްކަލުގެ ހާލަތު އިއުލާނުކޮށް، ސަރުކާރުގެ އޮފީސްތައް ބަންދުކުރި އިރު، ބަލި މާލޭގައި އުޅޭކަން އޭޕްރިލް މަހު އެނގުމާއެކު މާލެ ވަނީ ފުރަބަންދުކޮށްފައެވެ.
އަދި ކޮވިޑް19 ގެ ކޭސްތައް ފެނުނު އަތޮޅުތެރޭގެ ބައެއް ރަށްރަށްވެސް ވަނީ ފުރަބަންދުކޮށްފައެވެ.
ރައީސުލްޖުމްހޫރިއްޔާ މިއަދު ގައުމާ މުހާތަބުކުރައްވައި ވާހަކަ ދައްކަވަމުން ވިދާޅުވީ މިއަދު ރާއްޖެ އޮތް ހާލަތަކީ މާ ގިނަ ދުވަހު ތިބެވޭނެ ހާލަތެއް ނޫން ކަމަށެވެ.
"އާމްދަނީ ހޯދަން މަސައްކަތް ކުރެވޭނެ ގޮތެއް، ވަޒީފާއަށް ނުކުމެވޭނެ ގޮތެއް ނެތް. އެތައް މިލިއަން ޑޮލަރެއް އިންވެސްޓުކޮށްގެން ހިންގަމުން އައި ރިސޯޓުތައް އެހުރީ ފަޅަށް. ހޮޓާތަކާއި ރެސްޓޯރަންޓުތައް ހުއްޓި، އާންމު ވިޔަފާރިތައް އަޑި އަޅާލައިފި،" ރާއްޖެއާއި ރާއްޖޭގެ ރައްޔިތުން ތިބި ހާލަތު ބަޔާންކުރައްވަމުން ރައީސް ވިދާޅުވިއެވެ.
ގައުމުތަކުން ކޮވިޑް19 އާ ދެކޮޅަށް ކުރި މަސައްކަތަށް ރިއާއަތްކުރައްމުން ރައީސް ވިދާޅުވީ ބަލިން އަރައިގަތުމަށް ދެ މަހަށް ވުރެ ގިނަ ދުވަސް ނަގާ ކަމަށެވެ. އަދި ރާއްޖެ އޮތް އުނދަގޫ ހާލަތުން މިންގުވުމަށްޓަކައި ވީ އެންމެ އަވަހަކަށް އެންމެން އެކުގައި މަސައްކަތް ކުރަންޖެހޭކަމަށް ވިދާޅުވިއެވެ.
އެ ގައުމުތަކުން ކެތްތެރިކަމާއެކު ދަތިތައް ތަހައްމަލުކުރުމަށްފަހު މިހާރު އާންމު ހާލަތަށް ދިއުމަށް ތައްޔާރުވާކަން ފާހަގަކުރައްވަމުން ރައީސް ވިދާޅުވީ ރާއްޖެއިންވެސް ކުރަމުން އަންނަނީ އެ މަސައްކަތް ކަމަށެވެ.
"އަޅުގަނޑުމެންވެސް ކެނޑިނޭޅި މަސައްކަތްކުރަމުން މި އަންނަނީ މި ހާލަތުން އަރއިގަނެ، އަޅުގަނޑުމެންގެ އިގްތިސާދީ ހަރަކާތްތައް އަލުން ފަށައި، ދިރިއުޅުމުގެ އާންމު ގާލަތަށް ދެވޭތޯ،" ރައީސް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ދެ ހަފްތާއެއްހާ ދުވަހުގައި މާލޭގައި ކޮވިޑް19 ގެ ހާލަތު އިތުރަށް ގޯސްވުން އެކަށީގެންވާ ކަމަށް ސިއްހީ މާހިރުން އަންދާޒާކުރާ ކަމަށެވެ.
އެ ދެ ހަފްތާއެއްހާ ދުވަހުގެ ތެރޭގައި ކުރެވޭ މަސައްކަތަކުން ކޮވިޑް19 ބަލިމަޑުކަމުން އަވަހަށް އަރައިގަތުމުގެ އުންމީދު ބޮޑުކަމަށް ރައީސް ވިދާޅުވިއެވެ. އެހެންކަމުން އެ ދެ ހަފްތާގައި ވަރަށް ފަރުވާތެރިކަމާއި ވިސްނުންތެރިކަމާއެކު މަސައްކަތް ކުރަންޖެހޭކަމަށް ރައީސް ވިދާޅުވިއެވެ.