02 May 2020, 00:19
ރާއްޖެއިން ކޮވިޑް19 ޖެހިފައިވާ މީހުންނާ ކޮންޓެކްޓުވެފައިވާ މީހުންގެ ތެރޭގައި އުމުރުން 65 އަހަރުން މަތީގެ މީހުން ގިނަ ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރުން ހާމަކޮށްފިއެވެ.
އެންއީއޯސީގައި މިރޭ ކުރިއަށް ދިޔަ ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވިދާޅުވީ ޕޮޒިޓިވްވެފައިވާ މީހުންގެ ތެރޭގައި އެންމެ ގިނައީ އެޑަލްޓް ކެޓަގަރީ ނުވަތަ އުމުރުން 12 އަހަރާއި 40 އަހަރާ ދެމެދުގެ މީހުން ކަމަށެވެ.
އަދި ޕޮޒިޓިވް މީހުންގެ ތެރޭގައި އުމުރުން 65 އަހަރުން މަތީގެ މީހުން ނިސްބަތުން މަދު ކަމަށް ޑޮކްޓަރު ވިދާޅުވިއެވެ.
"ނަމަވެސް، ކޮންޓެކްޓްސްގައި އެފަދަ ބަޔަކު [65 އަހަރުން މަތީގެ މީހުން] ގިނަ ކަމަށް ފާހަގަ ކުރެވޭ،" ޑޮކްޓަރު ވިދާޅުވިއެވެ.
މިހާތަނަށް ރާއްޖެއިން 481 މީހަކު ކޮރޯނާވައިރަހަށް ޕޮޒިޓިވްވެފައި ވާއިރު، އެމީހުންގެ ކޮންޓެކްޓުންގެ ގޮތުގައި 3600 އަށް ވުރެ މީހުން ވަނީ ދެނެގަނެވިފައެވެ.
ރާއްޖެއިން ޕޮޒިޓިވްވި މީހުންގެ ތެރޭގައި ހިމެނެނީ ބަންގްލަދޭޝްގެ 258 މީހުންނާއި، 152 ދިވެހީންނާއި 49 އިންޑިއާ މީހުންނާއި އިޓަލީގެ 11 މީހުންނާއި ޕާކިސްތާންގެ ތިން މީހަކާއި ނޭޕާލް ދެމީހުންނާއި ލަންކާ ދެ މީހުންނެވެ.
އެމީހުންނާ ގުޅުންހުރި ގިނަ ތަންތަނެއް ވަނީ މޮނިޓަރިންގެ ހާލަތަށް ގެންގޮސްފައެވެ.
އެގޮތުން މިހާތަނަށް 244 އިމާރާތެއް މޮނިޓަރިންގ އަށް ލާފައި ވާއިރު، ފިހާރައާއި ގޯޑައުން އަދި ކްލިނިކްތައް ހިމެނޭގޮތުން އަށް ތަނެއް ވެސް ވަނީ މޮނިޓަރިންގ އަށް ލައިފައެވެ. އަދި 16 ރަށަކާއި ތިން އުޅަނދު ވެސް ހިމެނެއެވެ.