29 Apr 2020, 20:20
ޅ ކުރެއްދޫ ރިސޯޓުގެ މުވައްޒަފުން ކަރަންޓީނުން ދޫކޮށްލުން ލަސްވާ ސަބަބު ހޯދުމަށް ކުރެއްދޫގެ ގާނޫނީ ވަކީލުންގެ ޓީމުން ހެލްތް ޕްރޮޓެކްޝަން އެޖެންސީ (އެޗްޕީއޭ) އަށް ސިޓީއެއް ފޮނުވައިފި އެވެ.
އެޗްޕީއޭގެ ޑިރެކްޓާ ޖެނެރަލް މައިމޫނާ އަބޫބަކުރަށް އެޑްރެސްކޮށް ކުރެއްދޫގެ ގާނޫނީ ވަކީލުންގެ ޓީމުން ފޮނުވި ސިޓީގައި ބުނީ ރާއްޖެއިން ކޮވިޑް19 ފެނުމާއެކު އެންމެ ފުރަތަމަ ކަރަންޓީނު ކުރި ރަށަކީ ކުރެއްދޫ ކަމަށާއި އަދިއަދަށް ދާންދެންވެސް އެ ރިސޯޓު އޮތީ ކަރަންޓީނުކޮށްފައި ކަމަށެވެ.
ކޮވިޑާ ދެކޮޅަށް އެޗްޕީއޭ އިން އަޅަމުންދާ ފިޔަވަޅުތަކަށް އިޝާރާތްކޮށް އެ ސިޓީގައި ބުނީ އެޗްޕީއޭ އިން އޭޕްރީލް 10 ގައި ނެރެފައިވާ އެންގުމަށް ރިއާޔަތް ކުރާއިރު، ރިސޯޓުން މީހަކު ބައްޔަށް ޕޮޒިޓިވް ވިތާ 28 ދުވަސްފަހުން އެ ރިސޯޓަކުން މީހުންނަށް ފޭބޭނެ ކަމަށް ބުނެފައިވާ ކަމަށާއި އެ އެންގުމަށް ބަލާއިރު ކުރެއްދޫގެ ކަރަންޓީނު މުއްދަތު މި މަހުގެ 12 އަށް ހަމަވާ ކަމަށް ވެސް އެ ސިޓީގައިވެ އެވެ.
މި މުއްދަތު ހަމަވެފައިވާއިރުވެސް އެ ރިސޯޓުގެ މުވައްޒަފުން ރިސޯޓުން ފޭބުމުގެ ހުއްދަ އެޗްޕީއޭ އިން ދީފައި ނުވާ ކަމަށާއި ކުރެއްދޫގެ ކަރަންޓީނާ ގުޅޭގޮތުން ހާއްސަ ނިންމުމެއް ނިންމާފައިވާކަންވެސް އެޗްޕީއޭ އިން އެ ރިސޯޓުގެ މެނޭޖުމަންޓަށް އަންގާފައި ނުވާ ކަމަށް ވަކީލުންގެ ފަރާތުން އެޗްޕީއޭ އަށް ފޮނުވި ސިޓީގައި ބުނެފައިވެ އެވެ.
އެ ސިޓީގައި ބުނީ އެ ރިސޯޓުގެ މުވައްޒަފުން ކޮވިޑަށް ޓެސްޓު ކުރަން ނިންމާފައިވާކަން އެޗްޕީއޭ އިން ބުނެފައިވަނީ އޭޕްރީލް 12 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ކަމަށާއި އޭޕްރީލް 14 ވަނަ ދުވަހު އެޗްޕީއޭގެ ފަރާތުން ޓީމެއް އެ ރިސޯޓަށް ގޮސް މުވައްޒަފުންގެ ސާމްޕަލް ނެގުމުގެ މަސައްކަތް ކުރި ނަމަވެސް ޖެހިގެން އައި ދުވަހު މާލެއިން ކޮވިޑްގެ ކޭސް އެއް ފެނުމާއެކު ޓީމު ރިސޯޓުން ފޭބި ކަމަށެވެ.
ރިސޯޓުގައި 650 މުވައްޒަފުން ކަރަންޓީނު ކޮށްފައި ތިބިއިރު، މި ހުރިހާ ފަރާތްތަކެއްގެ ކެއުމާއި އެހެނިހެން އިންތިޒާމުތައް ހަމަޖައްސައި އެކަމަށް ހަރަދު ކުރަމުންދަނީ ކުރެއްދޫގެ މެނޭޖުމެންޓުން ކަމަށާއި ސަރުކާރުގެ ފެސިލިޓީތަކުގައި 1271 މީހުން ކަރަންޓީނު ކޮށްފައި ތިބިއިރު، އެ ފަރާތްތަކުގެ ހަރަދުތައް ދައުލަތުން ހަމަޖައްސައި، ކަރަންޓީނު މުއްދަތު ހަމަވުމުން އެ މީހުން ދޫކޮށްލަމުންދާއިރު، ކުރެއްދޫ މުވައްޒަފުން ދޫކޮށްނުލައި ބޭތިއްބުމަކީ އެޗްޕީއޭ އިން ޒިންމާދާރުކަން ކުޑަކޮށް ކޮށްފައިވާ ކަމެއް ކަމަށް ސިޓީގައި ބުނެފައިވެ އެވެ.
"މިކަންކަމުގެ އެއްވެސް ތަފްސީލެއް ރަސްމީ އެއްވެސް ސިފައެއްގައި ރިސޯޓުގެ މެނޭޖްމަންޓާއި ހިއްސާކުރަމުން ނުދިޔުމުގެ ސަބަބުން ރިސޯޓުގެ މުވައްޒަފުން ބޭނުންވާ މައުލޫމާތު ފޯރުކޮށްދިނުމަށް ރިސޯޓުގެ މެނޭޖްމަންޓަށް ބޮޑެތި ގޮންޖެހުންތައް ކުރިމަތިވަމުންދާކަމުގައި ދަންނަވަމެވެ. އަދި މިކަމުގެ ސަބަބުން ރިސޯޓު މުވައްޒަފުންގެ އެތަކެއް ހައްގުތަކެއް ހިފެހެއްޓެމުންދާއިރު، އަދި ކަރަންޓީން ފެސިލިޓީއެއްގެ ގޮތުގައި ކުރެއްދޫ އައިލެންޑް ރިސޯޓު އޮތުމުން އެކަމަށް އެތައް މިލިއަނުން ހަރަދުވަމުންދާއިރު، ރިސޯޓުގެ ކަރަންޓީން މުއްދަތާއި މުވައްޒަފުން ރިސޯޓުން ފޭބުމަށް ހުއްދަ ދެވިގެންދާނެ މުއްދަތެއް ރަސްމީ ގޮތެއްގައި އަންގަވައިދެއްވުމަކީ ތިޔަ އޮތޯރިޓީގެ ޒިންމާއެކެވެ،" އެ ސިޓީގައިވެ އެވެ.
އެ ސިޓީގައި އަދި ފާހަގަ ކުރި ގޮތުގައި، ރިސޯޓަށް އަންގަންޖެހޭ ކަންކަން ނާންގައި އެޗްޕީއޭ އިން ކުރަންޖެހޭ މަސައްކަތްތައް ލަސްކުރުމުގެ ސަބަބުން ލިބޭ މާލީ އަދި އެހެނިހެން ގެއްލުންތަކަކީ އެޗްޕީއޭ އިން އޭގެ ޒިންމާ ނަގަންޖެހޭނެ ކަންތައް ކަމަށެވެ. އަދި އެޗްޕީއޭގެ އުސޫލުތަކާ ހިލާފަށް ކުރެއްދޫގެ މުވައްޒަފުން ބަންދުކޮށްގެން އުޅުމަކީ އެންޓި ޓޯޗާ ގާނޫނާ ހިލާފު ކަމެއް ކަމަށް ވެސް ސިޓީގައިވެ އެވެ. އެހެންކަމުން ކުރެއްދޫގެ ކަރަންޓީން މުއްދަތާއި، ކަރަންޓީނުން ދޫކޮށްލުން ލަސްވާ ސަބަބު ސާފުކޮށްދީ ވީ އެންމެ އަވަހަކަށް އެކަން އަންގައި ދިނުމަށް އެދޭ ކަމަށް ވެސް ބުންޏެވެ.
ރާއްޖެއިން އެންމެ ފުރަތަމަ ކޮވިޑްގެ ކޭހެއް ފެނުނީ މާޗު ހަތްވަނަ ދުވަހު އެވެ. ކުރެއްދޫގައި ޗުއްޓީ ހޭދަކުރި އިޓަލީ ފަތުރުވެރިއަކު އެނބުރި ގައުމަށް ދިޔަފަހުން އޭނާ ބައްޔަށް ޕޮޒިޓިވްވިކަން އަންގާފައިވަނިކޮށް އެ ރިސޯޓުގެ ދެ މުވައްޒަފަކު ބައްޔަށް ޕޮޒިޓިވް ވެފައިވެ އެވެ. ކުރެއްދޫ އިން ފަސް މީހަކު ބައްޔަށް ޕޮޒިޓިވްވި އިރު އެ ހުރިހާ އެންމެންވެސް ވަނީ މިހާރު ބަލިން ރަނގަޅުވެފަ އެވެ.
ކުރެއްދޫ އަކީ އިމްޕޯޓް ކޭސް އަކުން ލޯކަލް ޓްރާންސްމިޝަން އަކަށް ދިޔަ ރަށަކަށް ވުމުން، ސަލާމަތީ ފިޔަވަޅެއްގެ ގޮތުން އެ ރިސޯޓުގައި ތިބި ހުރިހާ މުވައްޒަފުން ކޮވިޑް19 އަށް ޓެސްޓުކުރަން ނިންމާފައިވާކަން ސަރުކާރުން ހާމަކުރީ މި މަހުގެ 12 ވަނަ ދުވަހު އެވެ.
މިހާތަނަށް އެ ރިސޯޓުގެ ޓެސްޓު ކުރި ހުރިހާ އެންމެންގެ ނަތީޖާވެސް ވަނީ ނެގެޓިވްވެފަ އެވެ.