29 Apr 2020, 11:14
"ކަލޭ ބޭނުން ވީ އެތަކެތިި ވިއްކައިގެން އޭގެ ފައިދާ އަހަންނާ ހިއްސާ ނުކޮށް އެކަނި މުއްސަނދިވާން. އެހެންނެއް ނޫންތަ ޒައިދު!" އަނެއްކާ ވެސް ޒައިދުގެ އަންހެނުން ބުންޏެވެ.
"ބުނެފީމެއް ނު އަނގަ މަޑުން ލައިގެން ހުންނާށޭ!!!" ޒައިދު ހަޅޭއް ލަވައިގަތެވެ.
*****
"ޤަތާދާ! އެއްވެސް އެއްޗެއް ނުކާނަން ތަ؟" ސުހައިލާ އެހިއެވެ.
"އަލްޙަމްދު ލި ﷲ. އަހަރެން ބަނޑުހައެއް ނޫން." ޤަތާދާ ބުންޏެވެ.
"މިއިން ކަދުރުކޮޅެއް ކާންވީއެއް ނު؟ މިއީ ހަލާލު ތަކެތި. ﷲ ގެ ރަޙްމަތްފުޅުން އަހަރެމެންގެ ކަދުރު ރުއްތަކުން ލިބުނު ތަކެތި މިއީ. އޭގެ ތެރެއިން ވެސް ރަނގަޅު ކަދުރުކޮޅެއް ހޮވައިގެން މި ގެނައީ ތިބާޔަށް." ސުހައިލާ ބުންޏެވެ.
"އުފާވެރިކަމާއި ދުޅަހެޔޮކަމާ އެކު ތިބާ ކޭން ބައްލަވާ!" ޤަތާދާ ބުންޏެވެ.
"ކީއްވެގެން ތިޔަ ގޮތަށް އަމިއްލަ ނަފްސަށް ތުރާ ލިބިގަންނަނީ؟ ލަދުގަނެ މަލާމާތް ލިބޭ ފަދަ ކަމެއް ތިބާ ނުކުރޭ. ތިބާ ބުނީ ތިބާއަށް ފެނުނު ކަމެއްގެ ވާހަކަ. އެހެންނެއް ނޫންތަ؟" ސުހައިލާ އެހިއެވެ.
"އާނ. ޠުޢުމާގެ ކޮނޑަށް ގޯންޏެއް ލައިގެން ދަނިކޮށް އަހަރެން ދުށިން. އެކަމުގައި އެއްވެސް ޝައްކެއް ނެތް. ނޫނީ އަހަރެންގެ ޚިޔާލަށް އޭނާ ފެނުނީ ބާ؟" ޤަތާދާ ބުންޏެވެ.
"އެހެންވީއިރު ޔަގީނެއް ނޫންތާ!" ސުހައިލާ ބުންޏެވެ.
"އެ ވައްކަން ކުރީ ޒައިދު ނަމަކަށް ކިޔާ ޔަހޫދީ ކަމަށް ﷲ ގެ ރަސޫލާ ހުކުމް ކުރެއްވީމާ ދެން އަހަރެން ތެދު ކުރާނީ ރަސޫލާގެ ނިޔާފުޅު އަދި ދޮގު ކުރާނީ އަހަރެންގެ އަމިއްލަ ލޯ." ޤަތާދާ ބުންޏެވެ.
"ވީއިރު ކޮން ކަމަކާ ދެރަ ތިޔަ ވަނީ؟" ސުހައިލާ އެހިއެވެ.
"އެއްވެސް ހެތްކެއް ނެތި މުސްލިމެއްގެ މައްޗަށް ވައްކަމުގެ ތުހުމަތު އަހަރެން ކުރީ ކީއްވެ ތޯ ﷲގެ ރަސޫލާ ސުވާލު ކުރެއްވި. އަހަރެން ދެރަވަނީ އެ ކަމާ." ޤަތާދާ ބުންޏެވެ.
"ﷲ އާއި ރަސޫލާއާ މެދު ހެޔޮކޮށް ވިސްނާން ވާނީ. ރަސޫލާ އެ ކުރައްވަނީ ސަރިޔަތެއް. ސަރިޔަތް ކުރިޔަށް ދާނީ ލިބޭން ހުރި ހެތްކާއި ގަރީނާއާއި ހެކި ބަހުގެ މައްޗަށް. މިކަމުގައި ގޯހެއް އުޅޭ ނަމަ ﷲ އެ ކަން، އެ އިލާހުގެ ރަސޫލާއަށް އަންގަވާނެ. ވީމާ އަމިއްލަ ނަފްސަށް ކުޅަދާނަ ނުވާ މިންވަރަށް ކަންކަން އުފުލާން ނޫޅެ ބަލަ!" ސުހައިލާ ބުންޏެވެ.
*****
"އަނެއް ދުވަހުގެ ފަތިހަށް އަލިވިލުމުގެ ކުރީން ﷲ ސުބްޙާނަހޫ ވަތަޢާލާ އެއިލާހުގެ ރަސޫލާގެ އަރިހަށް ވަޙީއާއިގެން ޖިބްރީލުގެފާނު ފޮނުއްވި. މިފަހަރު ކީރިތި ޤުރްއާނުން ބާވައިލެއްވި އާޔަތްތަކުން އެ ވައްކަމުގެ މައްސަލައިގައި ޔަހޫދީ ޒައިދުގެ ކުށެއް ނެތް ކަން ބަޔާން ކުރެއްވި. އަދި ވައްކަން ކުރީ ކާކު ކަން ރަސޫލު ﷲ ގެފާނަށް ކަޝްފުކޮށް ދެއްވި." ގާޒީ ޞަފިއްޔުދީނު އެހެން ވިދާޅުވެފައި އަނެއްކާވެސް ވާހަކަ ކުރިޔަށް ގެންދެވިއެވެ.
*****
"ކާކަށް މިކަން މި ހިނގި ގޮތް އެނގޭނީ؟ ޒައިދުގެ ގޭގެ މެދުގޯތީގައި އޮތް ބަގީޗާގެ ތެރޭގައި އެ ތަކެތި ވަޅުލާފައި ހުއްޓައި، ކޮނެގެން ނެގީ ސީދާ އަހަރެންގެ މި ދެ އަތުން." ޒައިދުގެ ގެ ފާސް ކުރާން ދިޔަ ޖަމާއަތުގެ މީހަކަށް ޒައިދުގެ ކުށެއް ނެތް ކަން ޥަޙީގެ ޒަރީއާއިން އެނގުމުން ބުންޏެވެ.
"އަހަރެމެން ތިބީ މަގުފުރެދުމެއްގެ ތެރޭގައި. އަހަރެމެންގެ ހިތްތައް އެދެމުން ދިޔައީ އަހަރެމެންގެ މުސްލިމު އަޚާ ސަލާމަތް ކުރާން. އެކަމަށް ބޭނުން ވެފައި ތިބި ވަރުން އަހަރެމެން އެ ޒައިދުގެ ވާހަކަތައް ފުރިހަމަޔަކަށް އަޑެއް ނާހަމު. އަހަރެމެން ﷲ ގެ ރަސޫލާއަށް ދެންނެވީ ޒައިދުގެ ގެއިން އެ ތަކެތި ފެނުނު ވާހަކަ. އެ ގޭގެ ހަތަރު ފާރުން ބޭރުގައި ގޯތި ތެރޭގައި އޮތް ބަގީޗާއެއްގެ ތެރޭގައި ވަޅުލާފައި ހުރި ވާހަކައެއް ވެސް ނުބުނަމު." ފާސް ކުރާން ދިޔަ ޖަމާއަތުގެ ވެރިޔާ ބުންޏެވެ.
"އާނ. ތިޔަ ބުނީ ތެދެއް. ޒައިދުގެ ގޭގެ ތެރެއިން ތަކެތި ފެނުމާއި އެ ގޭގެ ހަތަރު ފާރުން ބޭރުގައި ގޯތި ތެރޭގައި ވަޅުލާފައި ހުއްޓައި ތަކެތި ފެނުމާ ވަރަށް ތަފާތު. އަހަރެމެންނަށް ވެސް ރަސޫލު ﷲ ގެފާނުންގެ އަރިހުގައި ވާހަކަ މި ދެއްކުނީ ރަނގަޅަކަށް ނޫން. މުސްލިމު މީހާ ވައްކަމުގެ ތުހުމަތުން ސަލާމަތް ކުރުމުގެ އެދުން ބޮޑުވުމުގެ ސަބަބުން ހަގީގަތް ވެސް ކިޔައި ދެވުނީ އޮޅޭ ގޮތަށް. ﷲ ގެ ރަސޫލާއަށް ޥަޙީގެ ޒަރީއާއިން އެކަން އެނގިވަޑައި ނުގަތް ނަމަ، މި ދެވުނީ ކުށެއް ނެތް މީހަކަށް ކިހާ ބޮޑު އަނިޔާއެއް؟" ކޮނުނު މީހާ ބުންޏެވެ.
"އަޅުގަނޑު ދުށިން ރަސޫލު ﷲ ގެފާނުން މިންބަރަށް އެރުއްވި ތަން. އަދި އަހަރެމެންގެ ދީނަށް ތަބާ ނުވާ މީހަކު ކުށުން ބަރީއަ ކަން ހާމަ ކުރައްވައި ވާހަކަފުޅު ދެއްކެވި އަޑު އެހިން. އަނިޔާވެރިވުމާ މެދު ހޭލައި ތިބޭށޭ. ބާޠިލު ގޮތުގައި މީހުންގެ މައްޗަށް ތުހުމަތުތައް ނުކުރާށޭ." ފާސް ކުރާން ދިޔަ ޖަމާއަތުގެ ވެރިޔާ ބުންޏެވެ.
"ﷲ ގެ ޥަޙީ ބަސްފުޅު ތެދު. އެ ތަކެތި އަހަރެން ﷲ ގެ މަގުގައި ހޭދަ ކުރަން. ކަލޭމެން ހެކިވޭ. އަހަރެން އެ ތަކެތި ވިއްކައިގެން ލިބޭ ފައިސާ ހިބަ ކުރާނީ ކާނެ އެއްޗެއް ނުލިބި ތިބި މީހުންނަށް ކާން ދިނުމަށް." ރިފާޢު ބުންޏެވެ.
*****
"ޒައިދު! އަދިވެސް ތިހިރީ އަހަރެން ދެކެ ރުޅި އައިސްފައި ތަ؟" ޒައިދުގެ އަނބިމީހާ ރާޙީލް އެހިއެވެ.
"ކަލޭ ވެސް ޝައްކު ކުރީ އަހަރެން ވައްކަން ކުރި ކަމަށް." ޒައިދު ނުރުހިފައި ހުރެ ބުންޏެވެ.
"އަހަންނަށް މާފު ކުރޭ! ލޯބިވާ ފިރިމީހާ! ކޮންމެއަކަސް އެ ތަކެތި މިގޭގެ ގޯތި ތެރޭގައި ވަޅުލާފައި ހުއްޓައި ކޮނެގެން ނެގި ތަން ޚުދު އަހަރެން ވެސް މި ދެ ލޮލުން ދުށިން." ރާޙީލް ބުންޏެވެ.
"ކަލެޔަކަށް ނޭނގޭ ތަ އަހަރެން ވައްކަމެއް ނުކުރާނެ ކަން. އެ ވަރަށް ވެސް އަހަންނަށް އިތުބާރެއް ނުކުރަމު ތަ؟ ... ޖަވާބު ދީ ބަލަ! ... ކީއްވެ އެއްޗެކޭ ނުބުނީ؟" ޒައިދު ނުރުހިފައި ހުރެގެން ވާހަކަ ދެއްކިއެވެ.
"ދެން ތިޔަ ވާހަކަ ހުއްޓާލާ! މި ވަގުތު ތިޔަށް ވުރެ މުހިއްމު ނުގުތާއެއް އެބަ އޮތް." ރާޙީލް ބުންޏެވެ.
"ކޮބާ ތިޔަ ބުނާ މުހިއްމު ނުގުތާކީ؟" ޒައިދު އެހިއެވެ.
"އެ ނުގުތާއަކީ ... މި އަޖައިބެއް ފަދަ ދީން. މުޙައްމަދުގެފާނުންގެ ދީން. އެ ދީނުގައި އޮތީ އަދުލު އިންސާފަށް އިސްކަން ދިނުމަށް. އެއީ އެ ދީނަށް ތަބާވާ މީހުންނާ ދެކޮޅަށް ކަމުގައި ވިޔަސް. އެ މީހުން އެ ބުނަނީ ކަލޭގެ ކުށެއް ނެތް ކަން ބަޔާން ކުރެއްވީ އެމީހުން ގިޔާމަތާ ޖެހޭން ދޭން ކިޔަވާން ބާވައިލެއްވި ޤުރްއާނުގެ އާޔަތެއްގައި ކަމަށް. މި ކަމާ މެދު ނުވިސްނަމުތަ؟" ރާޙީލް އެެހިއެވެ.
"ކޮބާ ތިޔަ ވާހަކައިގެ މުރާދަކީ؟ އަހަރެން އިސްލާމް ވެ އެ ކަން އިއުލާން ކުރާން ވީއޭ ތަ؟ އެއީކީ ވާނެ ކަމެއް ނޫން. އަހަރެން ދިރި ހުރިހައި ދުވަހަކު ހުންނާނީ މުޙައްމަދާއި އޭނާއަށް ތަބާވާ މީހުންގެ އަދާވާތްތެރިއެއްގެ ގޮތުގައި." ޒައިދު ބުންޏެވެ.
"މޫސާގެފާނާއި ހާރޫނުގެފާނުގެ ރައްބު ގަންދީފައި ބުނަން. މުޙައްމަދުގެފާނު އެ ވާހަކަ މިންބަރަށް އަރުއްވައި ވިދާޅުވީ. އެ ވާހަކަ މީހުން އައިސް އަހަރެމެންނަށް ކިޔައިދިނީ. މި ކަން މި ހިނގައި ދިޔަ ގޮތުން އަހަރެން މިހިރީ ހައިރާން ވެ އަންތަރީސް ވެފައި. މުޙައްމަދުގެފާނުން އެ ވާހަކަަ އެ ގޮތަށް ވިދާޅު ނުވި ނަމަ، ވައްކަން ކުރީ ކަލޭ ނޫން ކަމަކަށް މި ޔަސްރިބުގެ އެކަކު ވެސް ގަބޫލެއް ނުކުރީސް." ރާޙީލް ބުންޏެވެ.
"ތިޔަ ހައިރާންކަމުގައި ނުހުރެ، ކިރާއި މާމުއި ގެނެސް ދީ! ވައްކަމުގެ ތުހުމަތުގައި މި ހޭދަވީ ވަގުތު ސިކުނޑިއަށް ކުރި ބާރުގެ ބޮޑުކަމުން އަހަރެން މިހިރީ ވަރަށް ބޮޑަށް ބަނޑުހައިވެފަ." ޒައިދު ބުންޏެވެ.
*****
"އޭރު ވެސް އަހަރެން ބުނިން ދޮގު ނަހަދާށޭ. ދޮގަކީ އޭގެ އެކުވެރިޔާގެ ހަލާކޭ. އަދި ކަލޭމެން ގޮސް ދޮގު ތިޔަ ހެދީ ﷲ ގެ ރަސޫލާގެ ކުރިފުޅު މަތީގައި." ޔަސްރިފު ބުންޏެވެ.
"އަހަރެން ގޮސް ރަސޫލާގެ ކުރިފުޅު މަތީގައި ދޮގު ހެދިން. އެކަމަކު މިހާރު އަހަރެން އެދެނީ އެ ކަމުން ތައުބާ ވެ އެކަލޭޭގެފާނު ވެސް އަހަންނަށް މާފު ކުރެއްވުން." މުބައްޝިރު ބުންޏެވެ.
"އަހަރެމެން މަސައްކަތް ކުރީ އާއިލާގެ ނަން ހުތުރުވިޔަ ނުދީ ފަޟީޙަތުން ސަލާމަތް ވާން." ޠުޢުމާގެ ތިމާގެ މީހަކު ބުންޏެވެ. އޭނާއަކީ ވެސް ދޮގު ހެކި ދޭން ދިޔަ މީހެކެވެ.
"އާނ. ޚަޒްރަޖު ވަންހައާއި އައުސު ވަންހައާ ދެމެދު ފިތުނައިގެ އައު އަލިފާންގަނޑެއް ރޯވިޔަ ނުދިނުމަކީ ވެސް އަހަރެމެންގެ އެއް މަގުސަދު." މުބައްޝިރު ބުންޏެވެ.
"މިހާރު އެއްމެންނަށް ވެސް ވަނީ ހަގީގަތް އެނގިފަ. ވައްކަން ކުރީ ޚަޒްރަޖު ވަންހައިގެ މީހެއް ކަމާއި ވައްކަން ކުރެވުނީ އައުސު ވަންހައިގެ މީހެއްގެ މުދަލުން ކަން. އެ ކަމަކު ދެ ގަބީލާގެ މެދުގައި ފިތުނަވެރިކަމެއް އައު ވެގެންނެއް ނުދިޔަ. އަދި ކަލޭމެން ތިޔަ ބުނާ ގޮތަކަށް ލޭއޮހޮރުވުމެއް ވެސް ނުފެށުނު. ފިތުނައިގެ އަލިފާން ނިއްވޭނެ ހަމަ އެކަނި ގޮތަކީ އަދުލު އިންސާފު ގާއިމުވުން." ޔަސްރިފު ބުންޏެވެ.
"އަހަރެމެން ކުރީ ކުށެއް ކަން އަހަރެމެންނަށް އެބަ އެނގޭ. އަދި އަހަރެމެންނަށް ކުރެވުނު ކަންތަކާ މެދު އަހަަރެމެން ދެރަވެ ހިތާމަ ކުރަން. ވީ އިރު ތިޔަ މަލާމާތް ކުރުން ހުއްޓާލަ ބަލަ!" މުބައްޝިރު ބުންޏެވެ.
"އަހަރެން މަލާމާތެއް ނުކުރަން. އަދި ތިޔަ ކަމުގައި އަހަންނަކީ ވެސް ވަކީން ރަނގަޅު މީހެއް ނޫން. އަހަންނަށް ހަގީގަތް އެނގި ވަންހަނާ ކުރީ. އަހަރެންގެ މިސާލަކީ ކޮރު އިބިލީހުގެ މިސާލު. ތެދެއް، ﷲ ގެ ރަސޫލާގެ ކުރިފުޅުމަތީގައި އަހަރެން ގޮސް ދޮގެއް ނަހަދަން. އެކަމަކު ތެދު ހަގީގަތް އެކަލޭގެފާނަށް ވަންހަނާ ކުރިން." ޔަސްރިފު ބުންޏެވެ.
"އަހަރެމެން މި ކުރި ކަމެއްގެ ނުބައި ކަމާ! އަހަރެމެންނަށް ހުރި ހަލާކެއްގެ ބޮޑުކަމާ!" މުބައްޝިރު ބުންޏެވެ.
*****
"ކީރިތި ޤުރްއާނުގެ ނިސާ ސޫރަތުގެ 107 ވަނަ އާޔަތުން ފެށިގެން 113 ވަނަ އާޔަތުގެ ނިޔަލަށް ހުރި އާޔަތްތަކަކީ މި ހާދިސާގެ މައްޗަށް ތަންފީޒު ކުރެވުނު އާޔަތްތައް. އެ އާޔަތްތަކުގެ މާނައީ:
(( އެއުރެންގެ އަމިއްލަ نفس ތަކަށް خيانة ތެރިވާ މީހުންގެ ފަރާތުން، ކަލޭގެފާނު ޖަދަލު ނުކުރައްވާށެވެ! ހަމަކަށަވަރުން، ފާފަވެރިވެ خيانة ތެރިވާ މީހަކު ދެކެ اللَّه ލޯބިވެވޮޑިގެނެއް ނުވެތެވެ. (107) އެއުރެން މީސްތަކުންނަށް ވަންހަނާވެގަނެތެވެ. އެކަމަކު، اللَّه ގެ حضرة އަށް އެއުރެންނަކަށް ވަންހަނާވެއެއް ނުގަނެވެތެވެ. އެކަލާނގެ ރުހިވޮޑިގެންނުވާ ބަސްތައް، އެއުރެން ވަންހަނާގައި تدبير ކޮށް އުޅޭހިނދު، އެއުރެންނާ އެކުގައި އެކަލާނގެ ވޮޑިގެންވެއެވެ. އެއުރެން ކުރާ عمل ތައް، ފުރިހަމަޔަށް ދެނެވޮޑިގެންވާ ކަލަކުކަމުގައި اللَّه ވޮޑިގެންވެއެވެ. (108) ދުނިޔޭގެ حياة ގައި އެއުރެންގެ ފަރާތުން، ތިޔަބައިމީހުން ތިޔަ ޖަދަލު ކުރީއެވެ. قيامة ދުވަހުން އެއުރެންގެ ފަރާތުން اللَّه އާ جدل ކުރާނީ ފަހެ ކާކުހެއްޔެވެ؟ ނުވަތަ، އެއުރެންގެ ކަންތަކާ حوال ވެ دفاع ކުރާނޭ وكيل އަކަށްވާނީ ފަހެ ކާކުހެއްޔެވެ؟ (109) ނުބައިކަމެއްކޮށް، ނުވަތަ، އެމީހެއްގެ އަމިއްލަ نفس އަށް އަނިޔާވެރިވެ، ދެން (އެއަށްފަހު) ފާފަފުއްސެވުން އެދި اللَّه ގެ حضرة އަށް ދަންނަވާމީހާ (ދަންނާށެވެ!) اللَّه އީ، ގިނަގިނައިން ފާފަފުއްސަވާ رحيم ވަންތަ ކަލަކު ކަމުގައި އޭނާ ދެކޭނެއެވެ. (110) އަދި، ފާފައެއް ލިބިގަންނަމީހާ، އެކަން އެ ލިބިގަންނަނީ، ހަމަ އެމީހާގެ އަމިއްލަ نفس ގެ މައްޗަށްކަން ކަށަވަރެވެ. މޮޅަށް ދެނެވޮޑިގެންވާ حكيم ވަންތަ ކަލަކުކަމުގައި اللَّه ވޮޑިގެންވެއެވެ. (111) އަދި، ކުށެއް ނުވަތަ ފާފައެއްކޮށް (އެކަމުގެ) ކުށެއްނެތް މީހެއްގައި އެކަން އަޅުވާމީހާ (ދަންނާށެވެ!) ފަހެ، އެމީހާ ބޮޑުވެގެންވާ ދޮގަކާއި، ފާޅުވެގެންވާ ފާފައެއް އުފުލައިފިކަން ކަށަވަރެވެ. (112) ކަލޭގެފާނުގެ މައްޗަށް اللَّه ގެ فضل ވަންތަކަމާއި، އެކަލާނގެ رحمة ނުވާނަމަ، ކަލޭގެފާނަށް އޮޅުވައިލުމަށް އެއުރެންގެ ތެރެއިން ބަޔަކު އުޅެފީހެވެ. ނަމަވެސް އެއުރެންގެ އަމިއްލަ نفس ތަކަށްމެނުވީ، އެއުރެންނަށް އޮޅުވަޔެއް ނުލެވެތެވެ. އަދި، އެއްވެސް ކަމަކުން އެއުރެންނަށް ކަލޭގެފާނަކަށް ގެއްލުމެއް ނުދެވޭނެތެވެ. ކަލޭގެފާނަށް اللَّه، حكمة އާއި، ފޮތް ބާވައިލައްވާފައި ވެއެވެ. އަދި، ކަލޭގެފާނު އިހަށް ދެނެވަޑައިނުގަންނަވާ ކަންތައް ކަލޭގެފާނަށް އެކަލާނގެ އުނގަންނައި ދެއްވިއެވެ. އަދި، ކަލޭގެފާނުގެ މައްޗަށް اللَّه ގެ فضل ވަންތަކަން ބޮޑުވެގެންވެއެވެ. (113) )) ގާޒީ ޞަފިއްޔުއްދީނު އެ ހާދިސާއާ ގުޅުން ހުރި އާޔަތްތައް ވިދާޅުވެ ދެއްވިއެވެ.
"އަޅުގަނޑު ހީކުރީ ޠުޢުމާގެ އެކުވެރީން ކަންތައް ކުރީ ރަނގަޅަށް ކަމަށް. ފިތުނައިން ދުރުކޮށް ސުލްހަވެރިކަމަށް ޓަކައި ދޮގު ހެދުން ކޮންމެ ހާލަތެއްގައި ވެސް ހުއްދަ ކަމަށް. އެ ކަމަކު ސަރިޔަތުގެ މަޖިލީހުގައި ދޮގު ހެކި ދީގެން ނުވާނެ ކަން އެނގިއްޖެ." އަމީރު ޞަފިއްޔުއްދީނު ވިދާޅުވިއެވެ.
"ﷲ ގެ ރަސޫލާގެ ކުރިފުޅު މަތީގައި ދޮގު ހަދާން އެމީހުންނަށް ކެރުނީތީ ވެސް އަޅުގަނޑު ހައިރާން ވެއްޖެ. އެމީހުން ބިރެއް ވެސް ނުގަނޭތަ؟ އެމީހުންނަކަށް ޔަގީން ނުވޭތަ އެއީ ހުރިހައި ކަމެއް މޮޅަށް ދެނެވޮޑިގެންވާ އިލާހުގެ ވަޙީ ބަސްފުޅު އެކަލޭގެފާނަށް އިއްވޭ ރަސޫލެއް ކަން." އަމީރާ ޞަަފާ ވިދާޅުވިއެވެ.
"އިންސާނާގެ ނަފްސަކީ ހެޔޮކަމަށް ބާރު އަޅާ ފަދައިން ނުބައިކަމަށް ވެސް ބާރު އަޅާ އެއްޗެއް. ޖާހިލިއްޔަ ޒަމާނުގައި އެމީހުންނަށް އާދަވެފައި ހުރި ކަންތަައްތަކެއް ސަބަބުން ހަވާ ނަފްސަށް ތަބާ ވެވުނީ ކަމަށް ވެސް ވެދާނެ." ގާޒީ ޞަފިއްޔުއްދީނު ވިދާޅުވިއެވެ.
"އެކަމަކު އިސްލާމް ދީނުގެ އަދުއްވެއް ކަމަށް ވާ ޒައިދުގެ ކުށެއް ނެތް ކަން ޤުރްއާނުގައި ބަޔާން ކުރެއްވުން އެއީ އޭނާގެ ނިސްބަތުގައި ކޮން ކަހަލަ ކަމެއް ބާ!" އަމީރު ޞަފިއްޔުއްދީނު ވިދާޅުވިއެވެ.
"އަދުލުވެރިކަމަކީ ﷲ ގެ ސިފަފުޅެއް. ކޮންމެ މީހަކަށް އެކަމުން ފައިދާ ވިޔަސް އަދުލުވެރިކަމުގެ ސިފަފުޅާ ﷲ ޚިލާފުވެ ވޮޑިއެއް ނުގަންނަވާނެ." ގާޒީ ޞަފިއްޔުއްދީނު ވިދާޅުވިއެވެ.
"ޢުމަރުލްފާރޫޤު ރަޟިޔަ ﷲ ޢަންހުގެ ޢަދުލުވެރިކަމުގެ ވާހަކަ ވަރަށް ގިނައިން ބައްޕަ ވަނީ އަޅުގަނޑަށް ކިޔައިދެއްވާފަ އެހެން ނޫންތޯ؟" ސަލްމާ ވިދާޅުވިއެވެ.
"ފާރޫޤުގެ މާނައަކީ ކޮބާ ކާފާ!" އަމީރާ ޞަފާ ސުވާލު ކުރެއްވިއެވެ.
"ފާރޫޤުގެ މާނައަކީ ތޫނު ކަނޑިޔަކުން ފަޅާލާފަދައިން ހައްގާއި ބާޠިލާ ވަކިކޮށްލާ މީހާ. އަދި ނިޔާއާއި އަނިޔާއާ ވަކިކުރާ މީހާ. އަދުލުވެރިކަމާ ދުރުވުމަކީ އޭގެ ޒާތުގައި އަނިޔާވެރިކަން. އެހެންވެގެން ޤުރްއާނުގައި ޔަހޫދީ ޒައިދުގެ ކުށެއް ނެތް ކަން ބަޔާން ކުރެއްވީ. އަނެއް ދުވަހުގެ އިރު އެެރުމުގެ ކުރީން." ގާޒީ ޞަފިއްޔުއްދީނު ވިދާޅުވިއެވެ.
"ވައްކަން ކުރި ޠުޢުމާއަށް ފަހުން ވީ ގޮތެއް ވާހަކަ ނިމުނު އިރުވެސް ނޭނގުނު." އަމީރު ޞަފިއްޔުއްދީނު ވިދާޅުވިއެވެ.
"އަދި ޠުޢުމާގެ ވާހަކަ ނުނިމޭ. އެހެންނަމަވެސް މި ވަގުތު އެ ވާހަކަ ފައްޓާކަށް ވަގުތެއް ނެތް." ގާޒީ ޞަފިއްޔުއްދީނު ވިދާޅުވިއެވެ.
"އެހެންވީމާ އެ ވާހަކަ މާދަމާއަށް ބާއްވާނީ. އެހެން ނޫންތޯ ބައްޕާ! ނިދާ ވަގުތުވެސް ޖެހުނީ." ސަލްމާ ވިދާޅުވިއެވެ.
"ނޫން. ކާފާ! އެ ވާހަކަ ކިޔައިދެއްވާ!" އަމީރާ ޞަފާ ވިދާޅުވިއެވެ.
"މި ވާހަކަ ނިމޭނީ އެބައި ވެސް ނިމުނީމާ. ވީމާ މި ވަގުތު ކިޔައިދެއްވާ ކާފާ!" އަމީރު ޞަފިއްޔުއްދީނު ވިދާޅުވިއެވެ.
"މަންމަ މި ބުނީ ނު މާދަމާއޭ." ސަލްމާ އޭނާގެ ބޭފުޅުންނަށް ވިދާޅުވިއެވެ. "ހިނގާ ނިދާން ދާން."
"ހެޔޮ ފަތިހަކަށް ހޭލުމުގެ ތައުފީގު ދެއްވާށި! ކާފާ!" އަމީރު ޞަފިއްޔުއްދީނު ވިދާޅުވިއެވެ.
"އަހަރެމެންގެ މީވާދު ދެން އޮތީ މާދަމާ. އެހެން ނޫންތަ ކާފާ!" އަމީރާ ޞަފާ ސަމާސާ ރާގެއްގައި ވިދާޅުވިއެވެ.
"އިންޝާ ﷲ. ހެޔޮ ފަތިހަކަށް ހޭލުމުގެ ތައުފީގު ތިޔަ ދެ ކުދީންނަށް ވެސް ދެއްވާށި!" ގާޒީ ޞަފިއްޔުއްދީނު އެ ދެ ބޭފުޅުންނަށް ވިދާޅުވިއެވެ.
ވަދީދާއާ އެކު އެ ދެ ބޭފުޅުން ކޮޓަރިއަށް ވަޑައިގަތުމުން ސަލްމާ އޭނާގެ ބައްޕައަށް ވިދާޅުވިއެވެ. "ޠުޢުމާގެ ވާހަކައިގައި ދެން ވީ ގޮތް އަޅުގަނޑަށް ކިޔައި ދެއްވާ!"
"ނޫން. ތިޔައީ ރަނގަޅު ގޮތެއް ނޫން. އަދި އަދުލުވެރި ގޮތެއް ވެސް ނޫން. އެ ކުދީން ވާހަކައަށް ޝައުގުވެރިވެފައި ތިއްބައި ފޮނުވާލާފައި. ދަރިފުޅަށް ވެސް ބައްޕަ ވާހަކައިގެ އެބައި ކިޔައިދޭނީ އެ ކުދީންގެ ހާޒިރުގައި މާދަމާ. ބައްޕަ ވެސް މި ދަނީ ނިދާން. ހެޔޮ ފަތިހަކަށް ހޭލުމުގެ ތައުފީގު ދެއްވާށި!" ގާޒީ ޞަފިއްޔުއްދީނު އެހެން ވިދާޅުވެފައި ތެދުވެވަޑައިގަތެވެ.
"އިންޝާ ﷲ ބައްޕައަކީ ހެޔޮކަމުގެ އަހުލުވެރިއެއް!" ސަލްމާ ވިދާޅުވިއެވެ.
- ނުނިމޭ -