26 Apr 2020, 20:07
މިހާރު ފެތުރެމުންދާ ކޮވިޑް-19 ވައިރަސް އާ ގުޅިގެން ވަޒީފާއަށް އެއްވެސް ކަހަލަ ބަދަލެއް އައިސްފައިވާ ފަރާތްތަކުން ޖޮބް ސެންޓަރަށް ރިޕޯޓުކުރުމަށް ހާއްސަ ހޮޓަލައިނެއް ގާއިމުކޮށްފިއެވެ.
އިކޮނޮމިކް މިނިސްޓްރީން ބުނީ ޖޮބް ސެންޓަރުގައި ރިޕޯޓު ކުރުމަށް އެހީތެރިކަން ބޭނުންވާނަމަ ޖޮބް ސެންޓަރުގެ ކޯލް ސެންޓަރުގެ ނަންބަރު 1475 އަށް ގުޅުމަށް އެދޭކަމަށެވެ.
ކޯލް ސެންޓަރު ހުުޅުވިފައި ހުންނާނީ ކޮންމެ އާދީއްތަ ދުވަހުން ބުރާސްފަތި ދުވަހެއްގެ ހެނދުނު 10:00 ން މެންދުރުފަހު 3:00 އަށެވެ.
ވަޒީފާއިން ވަކިކުރާ ހުރިހާ މުވައްޒަފުންވެސް ޖޮބްސެންޓަރުގައި ރަޖިސްޓްރީވުމަށް ސަރުކާރުން އިލްތިމާސްކޮށްފައި ވާއިރު މިހާތަނަށް 1300 އެއްހާ މީހުން ރަޖިސްޓްރީކޮށްފައިވާ ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވިއެވެ.
އޭގެ ތެރޭގައި ވަޒީފާއިން ވަކިކުރި މީހުންނާއި، ނޯޕޭ ލީވަށް ފޮނުވާލި މީހުންނާއި މުސާރަ ކުޑަކުރި މީހުން ވެސް ހިމެނެއެވެ.
މިނިސްޓަރު ވިދާޅުވީ ކޮވިޑް19 އާ ގުޅިގެން ދިމާވަމުން އަންނަ ދަތިކަމުގައި ވަޒީފާ ގެއްލޭ ފަރާތްތައް ޖޮބް ސެންޓަރުގައި ރަޖިސްޓްރީވުމަށް ހުޅުވާލީ އީފާސް ރެޖިސްޓްރޭޝަން ޕްރޮސެސް އެއްގެ ދަށުން ކަމަށް ވުމުން، ބައެއް މީހުންނަށް އެކަމުގައި ދަތިތަކެއް ކުރިމަތިވި ކަމަށެވެ.
ކޯލް ސެންޓަރެއް ގާއިމުކޮށްފައި ވަނީ އެފަދަ ދަތިތައް ފަސޭހަކުރުމަށެވެ.
ކޮވިޑް19 އާ ގުޅިގެން ވަޒީފާ ގެއްލުނު ފަރާތްތަކަށް، ތިން މަސް ދުވަހު، މަހަކު 5000 ރުފިޔާ ދޭން ސަރުކާރުން ވަނީ ނިންމައިފައެވެ.