26 Apr 2020, 15:06
ރިޔާޒް (އޭޕްރިލް 26): ސައުދީ އަރަބިއާގައި ކޮރޯނާވައިރަސް ފެތުރުން ހުއްޓުވުމަށް މުޅި ގައުމުގައި އިއުލާންކޮށްފައި އޮތް ކާފިއު، މައްކާ ނޫން އެހެން ސަރަހައްދުތަކުގައި ލުއިކޮށްފި އެވެ.
ސައުދީ ދައުލަތުގެ މީޑިއާ އެސްޕީއޭއިން ބުނި ގޮތުގައި މައްކާގައި 24 ގަޑި އިރަށް ކާފިއު އިއުލާންކޮށްފައި އޮތް ނަމަވެސް މިއަދުން ފެށިގެން އެގައުމުގެ އެހެން ސަރަހައްދުތަކުގައި ކާފިއު އޮންނާނީ ހަވީރު 17:00 އާއި ހެނދުނު 9:00އާ ދޭތެރޭގަ އެވެ. އަދި އަންނަ ބުދަ ދުވަހުން ފެށިގެން އަންނަ މަހުގެ 13އާ ޖެހެންދެން އެގައުމުގެ މޯލްތަކާއި ހޯލްސޭލް އަދި ރީޓެއިލް ފިހާރަތައް ހުޅުވާނެ އެވެ.
ނަމަވެސް ޖިސްމާނީ ގައިދުރުކަން ނުބެހެއްޓޭ ސެލޫންތައް ފަދަ ތަންތަން ނުހުޅުވާނެ ކަމަށް އެސްޕީއޭއިން ރިޕޯޓު ކުރި އެވެ.
މައްކާގެ އިތުރުން މަދީނާ އާއި ރިޔާޒު ފަދަ ބައެއް އެހެން ބޮޑު ސިޓީތަކުގައިވެސް މީގެ ކުރިން އޮތީ 24 ގަޑި އިރަށް ކާފިއު އިއުލާންކޮށްފަ އެވެ. އަދި 24 ގަޑި އިރަށް ކާފިއު އިއުލާން ކުރުުމުން ބޭރަށް ދެވެނީ 6:00 އާއި 15:00އާ ދޭތެރޭ ޒަރޫރީ ބޭނުންތަކަށް އެކަންޏެވެ.
މިދިޔަ މަހުގެ ދޭއްގައި ސައުދީން ކޮރޯނާވައިރަސް ފެނުނު ފަހުން އެގައުމުން ވަނީ އުމްރާ ކުރުން ކެންސަލްކޮށް، މިސްކިތުގައި ޖަމާއަތުގައި ނަމާދު ނުކުރަން އަންގާފަ އެވެ. އަދި ހައްޖަށް ދިޔުމުގެ ތައްޔާރީތައް މަޑުޖައްސާލަން އެދިފަ އެވެ.
ސައުދީގައި މިހާތަނަށް 16،000އަށް ވުރެ ގިނަ މީހުން ކޮރޯނާވައިރަހަށް ޕޮޒިޓިވްވެ، 136 މީހަކު ވަނީ ބަލީގައި މަރުވެފަ އެވެ.