24 Apr 2020, 23:58
ކޮރޯނާ ވައިރަސް ނުވަތަ ކޮވިޑް-19 އެންމެ އަވަހަށް މަރުވަނީ އިރުގެ ދޯދިތަކުން ކަމަށް އެމެރިކާގެ ސައިންޓިސްޓުން ބުނެފި އެވެ.
ސައިންޓިސްޓުން ކުރި ދިރާސާއެއްގައި އެކަން ހާމަވިނަމަވެސް އެ ދިރާސާ އަދި އާންމެއް ނުކުރެ އެވެ.
އެމެރިކާގެ ޑިޕާޓްމަންޓް އޮފް ހޯމްލޭންޑް ސެކިއުރިޓީގެ ސައިންސް އެންޑް ޓެކްނޮލޮޖީގެ އެޑްވައިޒަރު ވިލިއަމް ބްރަޔަން ވިދާޅުވީ އިރުގެ ދޯދިތަކުގައި ހިމެނޭ އަލްޓްރާވައިލެޓް ރޭޒްގެ ސަބަބުން ވައިރަސްއަށް ވަރަށް ބޮޑަށް އަސަރުކުރާ ކަަމަށާއި އެހެންކަމުން މިފެށީ ހޫނު މޫސުމުގައި ވައިރަސް ފެތުރުން މަދުވާނެ ކަމަށް ބެލެވޭ ކަަމަށެވެ.
އިރުގެ ދޯދިތަކުން ދޫކުރާ އަލްޓްރާވައިލެޓް ރޭޒްތަކުގައި ހިމެނޭ ރޭޑިއޭޝަނުން ތަފާތު ވައިރަސްތަކުގެ ޖެނެޓިކް މެޓީރިއަލްއަށް އަސަރުކޮށް "ރެޕްލިކޭޓް" ކުރުން މަދުވާކަން މީގެ ކުރިން ވެސް ސައިންޓިސްޓުންނަށް އެނގެ އެވެެ.
"އެންމެ ބޮޑަށް ފާހަގަކުރެވުނުކަމަކީ އިރުގެ ދޯދިތަކުގެ ބާރުގަދަކަމުން ވައިގައި އަދި އެކި ތަންތަނުގައި ހުންނަ ވައިރަސްތައް މަރުވާވަރު" ވިލިއަމް ވިދާޅުވި އެވެ.
ވިލިއަމް އެފަދައިން ވިދާޅުވި ނަމަވެސް ދުނިޔޭގެ ސިއްހަތު ޖަމިއްޔާގެ އޮފިޝަލެއްކަމަށްވާ ޑރ. މާގްރެޓް ހޭރިސް ވިދާޅުވީ އެ ތިއަރީއަކީ ސާބިތުއެއްޗެއް ނޫން ކަމަށެވެ.
"މީހުން ހީކުރާ ކަހަލަ ގޮތަކަށް ހޫނު މޫސުމުގައި ކަންތަކެއް ނުވާނެ،" ޑރ. މާގްރެޓް ވިދާޅުވި އެވެ.
މެލޭޝިއާ، ތައިލެންޑް އަދި ސިންގަޕޫރު ފަދަ ހޫނުގަދަ ގައުމުތަކުގައި ވެސް ކޮރޯނާގެ ނުރައްކާ ވަކިކުޑަނޫންކަން ފާހަގަކޮށްލެވެ އެވެ.
މައުލޫމާތު:އަލްޖަޒީރާ