24 Apr 2020, 19:47
މިއަހަރުގެ ރަމަޟާންމަހާއި ޝައްވާލު މަހުގެ ފުރަތަމަ ހަތް ދުވަހު ސަރުކާރުގެ ރަސްމީގަޑިއަކީ ހެނދުނު 10 އިން މެންދުުރު ދެއަކަށް ކަމަށް ރައީސް އޮފީހުން ބުނެފިއެވެ.
ރަމަޟާން މަހާއި ޝައްވާލުމަހުގެ ފުރަތަމަ ހަތްދުވަހުގެ ރަސްމީގަޑި ހަމަޖައްސަވާ އެ އޮފީހުން ނެރުނު ދެންނެވުމުގައި ބުނީ މިއަހަރުގެ ރަމަޟާންމަސް ފެށުނީ ކޮވިޑް19 އާއި ގުޅިގެން ސަރުކާރު ބަންދު ކޮށްފައިވާ ދުވަސްވަރެއްގައި ކަމަށްވާތީ، ރަމަޟާންމަހުގެ ދުވަސްތަކުގައްޔާއި، ޝައްވާލުމަހުގެ ފުރަތަމަ ހަތް ދުވަހު ސަރުކާރުގެ އޮފީސްތަކުގެ މުވައްޒަފުން، ރަސްމީ މަސައްކަތްކުރުމުގައި އޭޕްރީލް 17 ވަނަ ދުވަހު އެ އޮފީހުން ނެރުނު ދެންނެވުމާ އެއްގޮތަށް އަމަލު ކުރަން އެދޭ ކަމަށެވެ.
އެގޮތުން މިމަހުގެ ނިޔަލަށް އާންމު ސިއްހަތުގެ ކުއްލި ނުރައްކާ އިއުލާނުކޮށްފައިވާތީ، ސަރުކާރުގެ އޮފީސްތައް ނުހުޅުވައި، ގޭގައި ތިބެގެން ކުރެވެން ހުރި މަސައްކަތްތައް، ގޭގައި ތިބެގެން ކުރާގޮތަށް ހަމަޖައްސައި، ސަރުކާރުގެ އިދާރާތަކުން އޮންލައިންކޮށް ދެއްވެން ހުރި ހުރިހާ ހިދުމަތްތަކެއް އޮންލައިންކޮށް ދިނުމަށް އޮފީސްތަކަށް ވަނީ އަންގައިފައެވެ.
ކޮރޯނާ ވައިރަސް އާއި ގުޅިގެން މާލެ ސަރަހައްދު ލޮކްޑައުން ކޮށްފައިވާއިރު ރާއްޖެއިން މިހާތަނަށް 116 މީހަކަށް ވަނީ ބަލިޖެހިފައެވެ.