16 Apr 2020, 01:43
މާލެއިން ތިން ވަނަ މީހަކު ކޮރޯނާވައިރަސް، ކޮވިޑް-19 އަށް ޕޮޒިޓިވްވެއްޖެ އެވެ. މިއީ މިދިޔަ 24 ގަޑިއިރުގެ ތެރޭގައި އެ ވައިރަހަށް މާލެއިން ޕޮޒިޓިވްވި ތިން ވަނަ މީހާ އެވެ.
އެޗްޕީއޭއިން ދާދި ދެންމެއަކު ހާމަކުރި ގޮތުގައި، މިފަހަރު ބައްޔަށް ޕޮޒިޓިވްވި މީހާއަކީ ވެސް، މާލެއިން ފުރަތަމަ ފަހަރަށް ކޮރޯނާވައިރަސް ޖެހުނު، ޕޭޝަންޓް 21ހާ ސީދާ ދިމާވި މީހެއް ނުވަތަ ޑައިރެކްޓް ކޮންޓެކްޓެކެވެ. އެ މީހާ އަކީ ވެސް ދިވެއްސެއް ކަމަށް ވެސް ބުންޏެވެ.
ޕޭޝަންޓް 21 އަކީ، މިފަހުން ރާއްޖެއިން ބޭރަށް ދަތުރުވެސް ކޮށްފައި ނުވާ މާލޭގެ މާފަންނު އަވަށުގައި ދިރިއުޅެމުން ދިޔަ ދިވެހި އަންހެނެކެވެ.
އެޗްޕީއޭއިން މިރޭ އިރާކޮޅު ހާމަކުރި ގޮތުގައި، ޕޭޝަންޓް 21ގެ ތުއްތު ދަރިފުޅަށް ވެސް ވަނީ އެ ވައިރަސް ޖެހިފަ އެވެ. އެ ތުއްތު ކުއްޖާއާއި މިރޭ ފެނުނު މީހާއާ އެކު ޖުމްލަ ތިން މީހުންނަށް މިހާތަނަށް މާލެއިން މި ވަނީ ވައިރަސް ޖެހިފަ އެވެ.
ޕޭޝަންޓް 21އާ ބައްދަލުވި 54 މީހަކު ހޯދިފައިވާ ކަމަށް އެޗްޕީއޭއިން ބުނެފައިވެ އެވެ. އަދި އޭގެ ތެރެއިން، 11 މީހެއްގެ ސާމްޕަލް ނެގިއިރު، 11 މީހުންގެ ތެރެއިން "ޕޭޝަންޓް21"ގެ ތުއްތު ދަރިފުޅު ފިޔަވާ ދެންތިބި 10 މީހުން ނެގަޓިވްވެފައިވެ އެވެ.
"ޕޭޝަންޓް21" އަކީ، ފަހުގެ ތާރީހެއްގައި ބޭރު ގައުމަކަށް ދަތުރުކޮށްފައިވާ މީހެއް ނޫނެވެ. އަދި ކޮވިޑް-19 ޖެހުނު މީހަކާ ޑައިރެކްޓް ކޮންޓެކްޓް ވެފައިވާ ކަމަށް އެނގެން ނެތް ކަމަށް ވެސް އެޗްޕީއޭ އިން ވަނީ ބުނެފަ އެވެ.
މިރޭ ޕޮޒިޓިވްވި އިތުރު މީހާއާއެކު މިހާތަނަށް ރާއްޖެއިން ޕޮޒިޓިވްވި މީހުންގެ އަދަދު މިވަނީ 23 އަށް އަރާފަ އެވެ. މިހާތަނަށް 13 ބިދޭސީއަކާއި ތިން ދިވެހިން ވަނީ ވައިރަހުން ރަނގަޅުވެފަ އެވެ.