15 Apr 2020, 19:41
މިއަދު މާލެއިން ކޮރޯނާވައިރަސްއަށް ދިވެއްސަކު ޕޮޒިޓިވްވުމާއެކު ވައިރަހަށް ޓެސްޓުކުރާ މިންވަރު އިތުރުކުރާނެ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެ އެވެ.
ރާއްޖެއިން ކޮރޯނާ ވައިރަސްއަށް ޕޮޒިޓިވްވީ ބޭރު ގައުމަކަށް ދަތުރުކޮށްފައި ނުވާ އަންހެނެކެވެ. އޭނާއާ މިހާތަނަށް ޕޮޒިޓިވްވެފައިވާ މީހަކާ ދިމާވެފައި ނުވާއިރު، އެ އަންހެން މީހާއާ ދިމާވި މީހުން ހޯދުމުގެ މަސައްކަތް ދަނީ ކުރަމުންނެވެ.
މިއަދު ހަވީރު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި އަމީން ވިދާޅުވީ، މީގެ ކުރިންވެސް ޓެސްޓުކުރުމުގެ މިންވަރު އިތުރިކޮށްފައިވާ ކަމަށާއި ނަމަވެސް މިހާރު ހާލަތު ބަދަލުވުމާ ގުޅިގެން އަނެއްކާވެސް ޓެސްޓު ކުރާ މިންވަރު އިތުރު ކުރާނެ ކަމަށެވެ.
"ކޮވިޑްގެ ހާލަތު އެހެން މަރުހަލާއަކަށް މިދިޔައީ. މާނައަކީ، މިހާރު ހުރި މައުލޫމާތައް ބަލާއިރު މިއީ ކޮމިއުނިޓީ ސްޕްރެޑް [މުޖުތަމައު ތެރޭ ބަލި ފަތުރުން] ފެށުން ކަމަށް ބެލެވޭ. އެއީ އެހެން ޕޮޒިޓިވް ކޭސްއަކާ ގުޅުމެއް ނެތް ހާލަތުގައި ކޭސްއެއް ފެނުން. އެހެންވީމަ މިހާލަތުގައި، އަޅުގަނޑުމެންގެ ޓެކްނިކަލް ޓީމުގެ ލަފައާއެކު ޓެސްޓުކުރުމުގެ ކަންކަން އިތުރަށް ފުޅާ ކުރަމުންދާނަން،" މިނިސްޓަރު އަމީން ވިދާޅުވި އެވެ.
މިހާނަތަށް ފަރުވާއެއް ނުހޯދި އޮތް ކޮރޯނާވައިރަސްގެ ފަރުވާ އަކީ، އެންމެން ރައްކާތެރެވެގެން ތިިބެ ގޭގައި މަޑު ކުރުން ކަމަށް އަމީން ވިދާޅުވިއެވެ. އަދި ގައިދުރުކަމަށްވެސް އިސްކަންދީ، ކަމާ ބެހޭ ފަރާތްތަކުން ދޭ އިރުޝާދުތަކަށް އަމަލުކުރެއްވުމަށް އަމީން އިލްތިމާސް ކުރެއްވި އެވެ.
"މިވަގުތު އަޅުގަނޑުމެން ހާސްވެ، ކުއްލިއަކަށްގޮސް ފިހާރައިގައި ހުރި ހުރިހާ އެއްޗެއް ގަނެ، ކުރަން ނުޖެހޭ ކަންކަން ކުރަން ދިމާކޮށްފިނަމ،ަ އޭގެ ސަބަބުން ބަލި ފެތުރެން ހުރި ކަންކަމަށް ބޮޑަށް މަގުފަހުވެގެންދާނެ،" އަމިން ވިދާޅުވިއެވެ.
ވައިރަސް ފެތުރުނު އެހެން ގައުމުތަކުގައި ކަންތައްވީ ގޮތުގެ އަލީގައި ތަޖުރިބާކާރުން ދޭ ނަސާހަތަކީ، އާއްމުންގެ ތެރެއިން ޕޮޒިޓިވް ކޭސްއެއް ފެނިއްޖެ ނަމަ، އެންމެ އިސްކަމެއް ދޭން ޖެހޭ ކަމަކީ، ބަލި ފެތުރުނަނުދީ ލަސްކުރެވެން އޮތް ފިޔަވަޅުތަކެއް އެޅުން ކަމަށް އަމީން ވިދާޅުވިއެވެ. އަމީން ވިދާޅުވީ، މިހާތަނަށްވެސް މަސައްކަތް ކުރަމުން އައީ މި ދުވަސްވަރަކީ، އާންމުންގެ ތެރޭގައި ބަލި ފެތުރޭނެ ދުވަސްވަރެއް ކަމަށް ލަފާކޮށްގެން ކަމަށެވެ.
"އަޅުގަނޑު އިލްތިމާސް ކުރަން މިވަގުތުވެސް ރައްޔިތުން މިކަމުގައި ކެތްތެރިކަމާއެކު އަމަލު ކުރުން. އަދި އެއްބަޔަކު އަނެއްބަޔަކަށް އަޅާލުމާއި އޯގާތެރިވުމަކީ ވަރަށް މުހިންމު ކަމެއް،" އަމީން ވިދާޅުވިއެވެ.
މިއަދު ޕޮޒިޓިވްވި މީހާއާ ސީދާ ބައްދަލުވި، 11 މީހެއްގެ ސާމްޕަލް ވަނީ ނަގާފައިވެއެވެ. ނޫސްވެރިންގެ ބައްދަލުވުމުގައި އެޗްޕީއޭގެ ޑޮކްޓަރު ނަޒްލާ ރަފީގު ވިދާޅުވީ، މިހާތަނަށް މި ކޭސްއާ ގުޅިގެން 54 މީހަކު އެކަހެރިކޮށްފައިވާ ކަމަށެވެ. އޭގެ އިތުރުން ހަތަރު ގެއެއްވެސް ބަލަމުންދާ ކަމަށް ނަޒްލާ ވިދާޅުވިއެވެ.
މި ކޭސްއާ ގުޅިގެން މިއަދު އެޗްޕީއޭ އިން ވަނީ، މާލެ ސިޓީގައި މަގުތަކަށް ނުކުތުމާއި، ލަފައި ފުރުން ކުރިއަށް އޮތް މަނާކޮށްފައެވެ. މިހާތަނަށް ރާއްޖެއިން ފެނުނު ޖުމްލަ ކޭސްތަކުގެ އަދަދަކީ، 21 އެވެ. އޭގެ ތެރެއިން ރާއްޖޭގައި ފަރުވާ ހޯދަމުން ދަނީ ތިން ދިވެހިންނަށެވެ.