14 Apr 2020, 22:12
ވޮޝިންޓަން (14 އެޕްރީލް 2020): މިހާރު ދުނިޔޭގައި ބާރަށް ފެތުރެމުންދާ ކޮވިޑް-19 ގެ ގިނަ މައުލޫމާތު އެމެރިކާއަށާއި އަދި އެހެން ގައުމުތަކަށް ޗައިނާއިން ފޮރުވާފައިވާ ކަމަށާއި އެކަމުގެ ނަތީޖާ އާ ވަރަށް ހިތިގޮތަކަށް ޗައިނާ ކުރިމަތިލާން ޖެހޭނެކަމުގެ އިންޒާރު އެމެރިކާގެ ޚާރިޖީ ވަޒީރު މައިކް ޕޮމްޕެއޯ ޗައިނާއަށް ދެއްވައިފިއެވެ.
ޖަރުމަނުގެ ނޫހެއްކަމަށްވާ "ބިލީޑް" އަށް ދެއްވި އިންޓަވިއުއެއްގައި މައިކް ޕޮމްޕެއޯ ވިދާޅުވީ ކޮވިޑް-19 ގެ ފުރިހަމަ މައުލޫމާތު ޗައިނާއިން ދިންނަމަ އެމެރިކާއާއި އެހެންގައުމުތަކަށް އޭގެ ނުރައްކަލުން ސަލާމަތްވުމަށް ފިޔަވަޅުއަޅާނެ ފުރުސަތު ލިބި އެތަށް ފުރާނައެއް ސަލާމަތް ކުރެވުނީސްކަމުގައެވެ. އެމައްސަލާގައި އެމެރިކާއިން ޗައިނާ ޒިންމާދާރު ކުރުވާނެކަމަށާއި އެކަމާ ކުރިމަތިލާންޖެހޭނެ ވަގުތު އަންނާނެކަން ޗައިނާ ދަންނަންޖެހޭނެކަމަށް ވިދާޅުވެ ވަރަށް ހަރުކަށި ގޮތެއްގައި ޕޮމްޕެއޯ ޗައިނާއަށް އިންޒާރު ދެއްވިއެވެ.
ޕޮމްޕެއޯ އަކީ ރައީސް ޑޮނަލްޑް ޓްރަމްޕް ގެ ސަރުކާރުގައި ހިމެނޭ އެންމެ ހަރުކަށި ވިސްނުން ގެންގުޅުއްވާ ވަޒީރުގެ ގޮތުގައި ސިފަކުރެވޭ ބޭފުޅެކެވެ. އަދި އޭނާއަކީ ޓްރަމްޕާ އެންމެ އެއްގޮތް ވިސްނުން ގެންގުޅުއްވާ ވަޒީރުގެ ގޮތުގައި ފާހަގަކުރެވޭ ވަޒީރުވެސް މެއެވެ. ޕޮމްޕެއޯ މިދެއްވީ ޗައިނާއާ ދެކޮޅަށް ވިޔަފާރީގެ ދަތިކުރުމުގެ ބައެއް ފިޔަވަޅުތައް އަޅާނެކަމުގެ އިޝާރާތެއްކަމަށް މުރާސިލުން ބުނެއެވެ.
ޖަރުމަނުގެ "ބިލީޑް" އަށް ދެއްވި ބަސްދީގަތުމުގައި ޕޮމްޕެއޯ ވިދާޅުވީ ރައީސް ޑޮނަލްޑް ޓްރަމްޕް ގެ ސަރުކާރު މިހާރު އަވަދިނެތި ބުރަކޮށް މަސައްކަތްކުރަމުން ގެންދަނީ ކޮވިޑް-19 ގެ ސަބަބުން ހުއްޓުމަކާ ގާތަށް ގޮސްފައިވާ އެމެރިކާގެ އިގްތިސާދު އަލުން ހަރަކާތް ކުރެވޭނެ ގޮތެއްވޭތޯ ބެލުމަށް ކަމަށާ އެކަން ކޮޅެއްގައި ޖެއްސުމަށްފަހު ޗައިނާ ޖަވާބުދާރީ ކުރުވުމުގެ މަސައްކަތް އެމެރިކާ ފަށާނެކަމުގައެވެ.
އެހެންކަމުން ކޮވިޑް-19 ގެ މައުލޫމާތާއި އޭގެ ހަގީގަތް ފޮރުވި މައްސަލައިން ސަލާމަތްވެވޭނެކަމަށް ޗައިނާ ދެކިގެންނުވާނެކަމަށާ ޗައިނާ ޖަވާބުދާރީ ކުރުމުގެ ގާބިލްކަން އެމެރިކާއަށް ލިބިފައިވާ ކަމާމެދު ޝައްކެތް ނުކުރައްވާކަމަށްވެސް ޕޮމްޕެއޯ ވިދާޅުވިއެވެ.
ޕޮމްޕެއޯ މިމޭރުމުން ވާހަކަ ދައްކަވާފައި މިވަނީ އެމެރިކާގައި ކޮރޯނާ ވައިރަސް ކޮންޓްރޯލް ކުރުމުގައި އިހުމާލުވި ކަމުގެ ތުހުމަތު ރައީސް ޑޮނަލްޑް ޓްރަމްޕާއި އޭނާގެ ސަރުކާރުގެ އިސްވެރިންގެ މައްޗަށް އެމެރިކާގެ އިދިކޮޅު ފަރާތްތަކުންނާއި އެމެރިކާގެ ބައެއް ސްޓޭޓްތަކުގެ ގަވަރުނަރުންނާއި އާންމު ރައްޔިތުންނާއި އެމެރިކާގެ މީޑިއާއިން ކުރަމުން ގެންދާ ދަނޑިވަޅެއްގައެވެ.
ކޮރޯނާ ވައިރަސް ކޮންޓްރޯލްކޮށް އެ ވައިރަސްގެ ނުރައްކަލުން ރައްޔިތުން ސަލާމަތް ކުރުމުގައި ޗައިނާ ކާމިޔާބު ހޯދާފައިވާއިރު އެމެރިކާގެ ވަނީ މިމަމުގައި މުޅިން ނާކާމިޔާބުވެ އަދި ދުނިޔޭގެ ކުރިމަތިގައި ވަރަށް ބޮޑަށް ބޭޒާރުވެފައެވެ. އަދި ސިއްޙަތާބެހޭ ނިޒާމުވަނީ ކޮރޯނާ ވައިރަސްގެ ކުރިމަތީގައި ރޫޅި އިނދަޖެހިފައެވެ. މިކަމުގެ ސަބަބުން ޓްރަމްޕްގެ ސަރުކާރު ހޫނުފެނަށް ވެއްޓިފައިވާއިރު އޭގެ އަގު ވަރަށް ވޭންދެނިވި ގޮތެއްގައި ކުރިޔަށް އޮތް އެމެރިކާގެ ރިޔާސީ އިންތިޚާބުގައި ޓްރަމްޕާއި އޭނާގެ ޓީމުން ދައްކަންޖެހޭނެކަމަށް އެމެރިކާގެ ބައެއް ތަޖްރިބާކާރުން ލަފާކުރައްވައެވެ.
ޕޮމްޕެއޯގެ ޗައިނާއަށް ބަހުގެ ހަމަލާތައް މިދެއްވީ އެމެރިކާގެ އެތެރެއިން ޓްރަމްޕާއި ޓްރަމްޕްގެ ޓީމަށް ކުރިމަތިވާ ފިއްތުންތަކުން ސަލާމަތްވެ އެކަމުގެ ޒިންމާ ޗައިނާގެ ބޮލުގައި އަޅުވައިގެން އެމެރިކާގެ ރައްޔިތުންގެ ކުރިމަތީގައި ޒިންމާއިން ރެކިވަޑައިގަނެވިދާނެކަމުގެ ހުވަފެނުގައިކަމަށް އެމެރިކާގައި ޝާއިޢުކޮށްފައިވާ މިޑިއާ ރިޕޯޓްތައް ބުނެއެވެ. ނަމަވެސް ކޮރޯނާ ވައިރަސްގެ ސަބަބުން އެމެރިކާއަށް ލިބުނު ގެއްލުންތަކާއި މަރުވި މީހުންގެ އަދަދު ގިނަކަމުން ޗައިނާގެ ބޮލުގައި ކަންކަން އަޅުވައިގެން ޓްރަމްޕާއި ޕޮމްޕެއޯއަށް މިފަހަރު ޒިންމާއިން ރެކިވަޑައި ނުގެންނެވޭނެކަމަށް ސީއެންއެންއެން އިން ބުނެފައިވެއެވެ.
ކޮރޯނާ ވައިރަސް ގެ މައުލޫމާތު ޗައިނާއިން ފޮރުވިކަމަށް ޕޮމްޕެއޯގެ އިތުރުން ޓްރަމްޕްވެސް ވިދާޅުވެފައިވާއިރު އެކަމުގެ އެއްވެސް ހެއްކެތް އެދެބޭފުޅުންނަށް ދެއްކިފައެއެއް ނުވެއެވެ.
އެމެރިކާގެ ނެޝަނަލް އިންސްޓްޓިއުޓް އޮފް އެލާޖީ އެންޑް އިންފެކްޝަސް ޑިޒީޒްގެ ޑިރެކްޓާ ޑރ. އެންތަނީ ފައުޗީ ވަނީ ކޮރޯނާ ވައިރަސް ކޮންޓްރޯލް ކުރުމަށް ޓްރަމްޕްގެ ސަރުކާރުން ދުރާލައި ފިޔަވަޅު އެޅިނަމަ އެމެރިކާގެ އެތައް ބައެއްގެ ފުރާނަ ސަލާމަތް ކުރެވުނީސްކަމަށް ވިދާޅުވެ ޓްރަމްޕަށާއި އޭނާގެ ސަރުކާރަށް ނުސީދާ ގޮތެއްގައި ފާޑުވިދާޅުވެފައެވެ. އެމެރިކާގައި ކޮރޯނާ ވައިރަސް ޖެހިގެން ފާއިތުވި 24 ގަޑީއިރުތެރޭގައި ދޮޅު ހާހަށް ވުރެ ގިނަ މީހުން މަރުވެފައިވާ އިރު 23 ހާހަށް ވުރެ ގިނަ މީހުންނަށް އެރޯގާ ޖެހިފައިވެއެވެ.
ކޮރޯނާ ވައިރަސް ޖެހިގެން އެމެރިކާގައި މަރުވި މީހުންގެ ޖުމްލަ އަދަދުވެސް 23 ހާހަށް ވުރެ މައްޗަށް ގޮސްފައިވެއެވެ. އަދި އެމެރިކާގައި އެރޯގާ ޖެހުނު މީހުންގެ ޖުމްލަ އަދަދު ހަ ލައްކައާ ގާތަށްވަނީ ގޮސްފަ އެވެ. ކޮރޯނާ ވައިރަސްގެ ސަބަބުން އެމެރިކާގައި ވަޒީފާ ގެއްލުނު މީހުންގެ އަދަދު 16 މިލިޔަނަށް ވުރެ މައްޗަށް ގޮސްފައިވާ އިރު އެމެރިކާގެ އިގްތިސާދީ ހަރަކާތްތަކުގެ 50 އިންސައްތަވަނީ ހުއްޓިފައެވެ. އަދި ކޮރޯނާ ވައިރަސް ފަތުރާ މައިމަރުކަޒަކަށްވެސް މިހާރުވެފައިވަނީ އެމެރިކާއެވެ. (ނޫސްއެޖެންސީތައް)