13 Apr 2020, 13:35
ބެއިޖިން (އޭޕްރިލް 13): ޗައިނާގައި އިއްޔެ 108 މީހަކު ކޮރޯނާވައިރަހަށް ޕޮޒިޓިވްވެފައިވާ ކަމަށް އެގައުމުން ބުނެފި އެވެ.
ޗައިނާގެ ނެޝަނަލް ހެލްތު ކޮމިޝަނުން ބުނި ގޮތުގައި އިއްޔެ ވައިރަހަށް ޕޮޒިޓިވްވި މީހުންގެ ތެރެއިން 98 މީހުންނަކީ އެހެން ގައުމުތަކުން ޗައިނާއަށް ދިޔަ މީހުންނެވެ. އަދި އިއްޔެއަކީ މިދިޔަ މަހުގެ ފަހެއްގެ ފަހުން އެގައުމުގައި އެއް ދުވަސް ތެރޭ އެހާވަރަށް ގިނަ އަދަދެއްގެ މީހުން ވައިރަހަށް ޕޮޒިޓިވްވި ފުރަތަމަ ފަހަރެވެ.
ޗައިނާގައި އަލަށް ވައިރަސް ޖެހޭ މީހުންގެ އަދަދު މަދުވި ނަމަވެސް، ބޭރު ގައުމުތަކުން އެގައުމަށް ދާ މީހުންނާއި ވައިރަހުގެ އަލާމާތްތައް ނުފެންނަ މީހުންގެ ފަރާތުން ޗައިނާގައި ވައިރަސް ފެތުރުމުގެ ބިރު ވަނީ އުފެދިފަ އެވެ.
ޗައިނާގެ ހެލްތު ކޮމިޝަނުން ބުނި ގޮތުގައި އެގައުމުން މިހާރު ދަނީ ވައިރަހުގެ އަލާމާތްތައް ނުފެންނަ ނަމަވެސް ޕޮޒިޓިވްވެފައިވާ 1،064 މީހަކު އޮބްޒާވް ކުރަމުންނެވެ. އަދި ރަޝިއާގެ ބޯޑަރު ކައިރީ އޮންނަ ޗައިނާގެ ސިޓީއެއްގައި ވައިރަހުގެ ކޭސްތައް ގިނަވުމާ ގުޅިގެން އެސިޓީ ވަނީ ލޮކްޑައުންކޮށްފަ އެވެ.
ނަމަވެސް އޭގެ ކުރިން ޗައިނާއިން ވަނީ އެގައުމުގައި މީހުން އެއްވެ އުޅުން ހުއްޓުވުމަށް އަޅާފައިވާ ހަރުކަށި ފިޔަވަޅުތައް އުވާލަން ފަށާފަ އެވެ. އެގޮތުން ވައިރަސް ފުރަތަމަ ފެނުނު ވޫހާން ވަނީ ލޮކްޑައުންގައި އޮންނަތާ ދެ މަހަށްވުރެ ގިނަ ދުވަސް ފަހުން މިދިޔަ ހަފްތާގައި ހުޅުވާލާފަ އެވެ.
ޗައިނާގައި މިހާތަނަށް 83،000އަށް ވުރެ ގިނަ މީހުން ވައިރަހަށް ޕޮޒިޓިވްވެފައިވާ އިރު 77،000އަށް ވުރެ ގިނަ މީހުންގެ ބަލި ވަނީ ރަނގަޅުވެފަ އެވެ. އަދި އެބަލީގައި ޗައިނާއިން 3،343 މީހަކު ވަނީ މަރުވެފަ އެވެ.