10 Apr 2020, 19:03
މިދަނޑިވަޅުގައި ރާއްޖެއިން އެދޭ އެހީއެއް ދިނުމަށް ޗައިނާއިން ތައްޔާރަށް އޮތް ކަމުގެ ޔަގީންކަން އެ ގައުމުގެ ފޮރިން މިނިސްޓަރު އަދި ސްޓޭޓް ކައުންސިލާ ވަންގް ޔީ ދެއްވައިފި އެވެ.
ރާއްޖޭގެ ފޮރިން މިނިސްޓަރު އަބްދުﷲ ޝާހިދާއި ޔީ އިއްޔެ ފޯނުން ބޭއްވެވި ބައްދަލުކުރެއްވުމާ ގުޅޭ ގޮތުން ޗައިނާގެ ނޫސް އެޖެންސީތަކުން ބުނީ، ކޮރޯނާވައިރަހާ ދެކޮޅަށް ކުރެވޭ މަސައްކަތުގައި ރާއްޖެއިން އެދިއްޖެ ކޮންމެ ހިނދެއްގައި ޗައިނާއިން ރާއްޖެއަށް އެހީވެދޭނެ ކަމުގެ ޔަގީންކަން ދެއްވި ކަމަށެވެ.
ރާއްޖޭގެ ފޮރިން މިނިސްޓަރު ޝާހިދާއި ޗައިނާގެ ފޮރިން މިނިސްޓަރު ޔީގެ ފޯނު ކޯލުގައި، ދެ ބޭފުޅުން ވަނީ ކޮރޯނާ ކޮންޓްރޯލު ކުރުމަށް ދެ ގައުމުން ކުރި މަސައްކަތުގެ ތަޖުރިބާ ހިއްސާ ކުރައްވައިފައެވެ.
ޔީ ވަނީ ރާއްޖެއިން ކޮރޯނާ އާއި ދެކޮޅަށް އަޅާފައިވާ ފިޔަވަޅުތައް ފާހަގަކުރައްވާ އެ ފިޔަވަޅުތަކަށް ތައުރީފު ކުރައްވައިފަ އެވެ. ރާއްޖެ އާއި ޗައިނާ އަކީ އަބަދުވެސް ގާތް ދެ ގައުމުކަން ފާހަގަ ކުރައްވާ ޗައިނާގެ ފޮރިން މިނިސްޓަރު ވަނީ ކޮރޯނާ އާއި ދެކޮޅަށް ޗައިނާ އިން ކުރި މަސައްކަތުގެ ތަޖުރިބާ އާއި އެކްސްޕަޓީޒް ރާއްޖެ އާއި ހިއްސާ ކުރުމަށް ޗައިނާ އިން އަބަދުވެސް ތައްޔާރަށް އޮންނާނެ ކަމަށް ވިދާޅުވެފައެވެ.
މިދިޔަ ޑިސެމްބަރު މަހު ޗައިނާ އިން އުފަންވި ކޮރޯނާ ވައިރަސް މުޅި ދުނިޔެ އަށް ފެތުރިފައިވާއިރު ޗައިނާ އިން ވަނީ ބަލި ކޮންޓްރޯލު ކުރުމަށް މުހިއްމު ފިޔަވަޅުތަކެެއް އަޅައިފަ އެވެ.
ދެ މިނިސްޓަރުންގެ ވާހަކަފުޅުގައި ރާއްޖޭގެ ފޮރިން މިނިސްޓަރު ޝާހިދު ވަނީ ކޮރޯނާ އިން ރައްކާތެރިވުމަށް ބޭނުންވާ ބައެއް ވަސީލަތްތައް ޗައިނާގެ ޔުނާން ޕްރޮވިންސް އިން ރާއްޖެއަށް ހަދިޔާކުރިކަން ފާހަގަކުރައްވައި، އެކަމަށް ޝުކުރު އަދާކުރައްވާފަ އެވެ.