20 Mar 2020, 19:03
ދުނިޔޭގައި ފެތުރެމުން އަންނަ ކޮރޯނާވައިރަހުގެ ބަލިމަޑުކަން ކޮވިޑް-19 އާ ދެކޮޅަށް ރާއްޖެއިން ކުރާ މަސައްކަތަށް، ޗައިނާއިން ރާއްޖެއަށް ކަނޑައަޅުއްވާ ހުންނަވާ ސަފީރު ޖަންގް ލިޖޮންގް ތައުރީފު ކުރައްވައިފި އެވެ.
ޗައިނާ ސަފީރު މިއަދު ކުރެއްވި ޓުވީޓެއްގައި ވިދާޅުވީ ކޮރޯނާވައިރަހާ ދެކޮޅަށް ރާއްޖެއިން އަޅަމުން ގެންދަނީ ވަރަށް އުނދަގޫ އެހެން ނަމަވެސް ވަރަށް ފާހަގަކޮށްލެވޭ ފިޔަވަޅުތަކެއް ކަމަށެވެ.
އަދި މި މަސައްކަތުގައި ވެސް ޗައިނާއިން ރާއްޖެއާއެކު ވާކަން ކުރިއަށް އޮތް ތަނުގައި އެނގިގެންދާނެ ކަމަށް ސަފީރު ވިދާޅުވި އެވެ.
ސަފީރު ވިދާޅުވީ ހުރިހާ ކަމެއް ވެސް ބުނެދޭނީ ވަގުތު ކަމަށާއި، ހިތްވަރާއެކު މަސައްކަތް ކޮށްފިނަމަ ކާމިޔާބު ލިބޭނެކަން ޗައިނާއިން ސާބިތުކޮށްދީފައިވާ ކަމަށެވެ.
ކޮރޯނާވައިރަސް ފެތުރުން ހުއްޓުވުމަށް ހަރުކަށި ފިޔަވަޅުތަކެއް އަޅާފައިވާ ޗައިނާގައި މިހާތަނަށް ވައިރަސް ޖެހުނު މީހުންގެ އަދަދު 80،000އަށް ވުރެ އިތުރުވެފައިވާ އިރު އޭގެ ތެރެއިން 71،000އަށް ވުރެ ގިނަ މީހުން ބަލިން ރަނގަޅުވެފައިވާ ކަމަށް އެގައުމުން ބުންޏެވެ.
ކޮރޯނާވައިރަސް ޖެހިގެން ޗައިނާއިން މިހާތަނަށް 3،249 މީހަކު ވަނީ މަރުވެފަ އެވެ.
ޗައިނާގައި ކޮރޯނާވައިރަސް ފެތުރުން ހުއްޓުވުމުގެ ގޮތުން އެގައުމުން ހުބޭ ޕްރޮވިންސްގެ 16 ސިޓީ ބަންދުކޮށް، އެހެން ސިޓީތަކުގައިވެސް މީހުން ދަތުރުފަތުރު ކުރުން ވަރަށް ބޮޑަށް ކޮންޓްރޯލް ކުރި އެވެ. މިދިޔަ ދެ ދުވަހު ޗައިނާއިން އެތެރެއިން އެއްވެސް މީހަކު ވައިރަހަށް ޕޮޒިޓިވްވެފައެއް ނުވެ އެވެ.
އެއާ އެކު، ޗައިނާއިން އަޅާފައިވާ ހަރުކަށި ފިޔަވަޅުތައް ލުއި ކުރި ނަމަވެސް އެ ގައުމަށް މިހާރު ބިރަކަށް ވެފައި ވަނީ، ބޭރު ގައުމުތަކުން ދާ މީހުންގެ ފަރާތުން އެ ގައުމުގައި އަލުން ވައިރަސް ފެތުރިދާނެތީ އެވެ. އެގައުމުގެ ވެރިރަށް ބެއިޖިންއަށް ބޭރު ގައުމުތަކުން ދާ އެންމެން ކަރަންޓީނުގައި 14 ދުވަސް ހޭދަ ކުރަން ޖެހޭނެ ގޮތަށް ވަނީ ހަމަޖައްސައިފަ އެވެ.
ސަފީރުގެ ޓުވީޓުގައި، ގައުމަކުން ކޮރޯނާވައިރަހާ ދެކޮޅަށް ފިޔަވަޅު އަޅަން ލިބުނު ދެ މަހެއްހާ ދުވަސް ބޭކާރުކޮށްލި ކަމަށް ވެސް ވިދާޅުވި އެވެ. ނަމަވެސް އެއީ ކޮން ގައުމެއްކަން ވިދާޅުވެފައެއް ނުވެ އެވެ.
ސަފީރު ވިދާޅުވީ އެގައުމުން ދެ މަސް ދުވަސް ބޭކާރުކޮށްލީ މަލާމާތް ކުރުމާއި، ތުހުމަތުގެ އިނގިލި ދިއްކޮށް އިލްޒާމް އެޅުވުމުގައި ކަމަށެވެ. ބެލެވޭ ގޮތުގައި ސަފީރު އެ ވާހަކަތައް ނިސްބަތް ކުރެއްވީ، އެމެރިކާއަށެވެ.
ރާއްޖެއިން މިހާތަނަށް 13 މީހަކު ވައިރަހަށް ޕޮޒިޓިވް ވެފައިވާއިރު، ސިއްހީ ކުއްލި ނުރައްކަލުގެ ހާލަތު އިއުލާންކޮށް ބަލި ފެތުރުން ކޮންޓްރޯލް ކުރުމަށް ސަރުކާރުން އަންނަނީ ގިނަ ފިޔަވަޅުތަކެއް އަޅަމުންނެވެ.
އެގޮތުން އެންމެ ބޮޑަށް ބަލި ފެތުރެމުން އަންނަ ގައުމުތަކުން ރާއްޖެއަށް މީހުން އައުން މަނާކޮށް، ސްކޫލުތަކާއި ކޮލެޖުތަކާއި ޔުނިވާސިޓީތައް ވެސް ވަނީ ބަންދުކޮށްފަ އެވެ. އަދި އާންމުން ތަންތަނަށް އެއްވެ ނޫޅުމަށް ސިއްހީ ދާއިރާގެ ކަމާ ބެހޭ ފަރާތްތަކުން ދަނީ އެދެމުންނެވެ. އަދި މި ދުވަސްވަރު ބޭރުތެރޭގައި ނޫޅެ ގޭގައި މަޑުކުރުމަށް ދަނީ އެދެމުންނެވެ.
އާންމުން ތަންތަނަށް އެއްވެ އުޅުން މަދު ކުރުމުގެ ގޮތުން ކެފޭތަކާއި ރެސްޓޯރެންޓުތައް ބަންދު ކުރަން އަންގާފައިވާއިރު މިދިޔަ ހަފްތާގެ ތެރޭގައި ސަރުކާރުން ވަނީ މާލޭ ސަރަހައްދާއި ރިސޯޓުތަކުގައި ޖަމާއަތުގައި ނަމާދު ކުރުންވެސް ވަގުތީ ގޮތުން ހުއްޓުވައިފަ އެވެ.
ހަމައެއާއެކު ރިސޯޓުތަކާއި އާންމުން ދިރިއުޅޭ ރަށްތަކާ ދެމެދު ދަތުރުކުރުން މެދުކަނޑާލައި، ރިސޯޓު މުވައްޒަފުން އެ ރިސޯޓުތަކުން ފޭބުން ވެސް ވަނީ ވަކި މުއްދަތަކަށް މެދު ކަނޑާލައިފަ އެވެ.
ކޮރޯނާވައިރަސް މިހާތަނަށް ދުނިޔޭގެ 157 ގައުމަކާއި ހުރިހާ ބައްރަކަށް ފެތުރި، 254,701 އަށް ވުރެ ގިނަ މީހުން ވަނީ ވައިރަހަށް ޕޮޒިޓިވްވެފަ އެވެ. އަދި އޭގެ ސަބަބުން 10,447 މީހަކު ވަނީ މަރުވެފަ އެވެ.