18 Mar 2020, 23:29
ސިނާމާލޭ ހުސްބިމުގައި ގާއިމްކޮށްފައިވާ ފުލޫ ކްލިނިކުން މިހާތަނަށް 121 މީހެއްގެ ސާމްޕަލް ނެގި އިރު އެ ހުރިހާ ސާމްޕަލްއެއްވެސް ކޮރޯނާވަރައިސް، ކޮވިޑް-19 އަށް ނެގެޓިވްވެފައިވާ ކަމަށް ސަރުކާރުގެ ތަރުޖަމާނު މަބްރޫކު އަޒީޒު ވިދާޅުވެއްޖެ އެވެ.
މިހާތަނަށް ކޮރޯނާވައިރަހަށް ރާއްޖެއިން ޕޮޒިޓިވްވެފައިވަނީ 13 ބިދޭސީންނެވެ. އެއީ ހަތަރު ރިސޯޓަކާއި އެއް ސަފާރީއަކުންނެވެ. މީހުން ދިރިއުޅޭ އެއްވެސް ރަށަކުން އެއްވެސް މީހެއް ވައިރަހަށް ޕޮޒިޓިވްވެފައި ނުވެ އެވެ.
ދަރުބާރުގޭގައި ގައިމުކޮށްފައިވާ ނޭޝަނަލް އިމަޖެންސީ ސެންޓަރުގައި މިރޭ ބޭއްވި ނޫސްވެރިންގެ ބައްދަލުވުމުގައި ތަރުޖަމާން މަބްރޫކު އަޒީޒު ވިދާޅުވީ، ކޮރޯނާ ވައިރަހަށް ޓެސްޓުކުރުމަށްޓަކައި މިމަހު 10 ވަނަ ދުވަހު މާލެހިޔާގައި ގާއިމުކުރި ފްލޫ ކްލިނިކަށް މިހާތަނަށް 860 މީހަކު ދައްކާފައިވާއިރު، 121 މީހެއްގެ ސާމްޕަލެއް ނެގިފައިވާ ކަަމަށެވެ.
"އެހުރިހާ އެންމެންގެ ނަތީޖާ ލިބިފައިވަނީ. އެ 212 މީހުންގެ ސާމްޕަލްތައް [ކޮރޯނާވައިރަހަށް] ނެގެޓިވް،" މަބްރޫކު ވިދާޅުވި އެވެ.
ރޯގާގެ އަލާމާތްތައް ހުރެގެން ޑޮކްޓަރަށް ދައްކާ މީހުންގެ ސާމްޕަލްތައް ނަގައި ކޮރޯނާވައިރަހަށް ޓެސްޓް ކުރުން އިތުރު ކުރަން ފެށީ އާންމު މުޖުތަމައުގައި ކޮރޯނާވައިރަސް އުޅޭކަން ޔަގީން ކުރުމުގެ ގޮތުން ސިއްހީ މާހިރުން އެގޮތަށް އިރުޝާދު ދޭތީ އެވެ. އަދި ޑަބްލިއުއެޗްއޯއިން ވަނީ، ވީހާވެސް ގިނަ މީހުން ވައިރަހަށް ޓެސްޓުކުރަން ގޮވާލައިފަ އެވެ.
ކޮރޯނާވައިރަހާ ގުޅިގެން ޖުމްލަ ތިން ކްލިނިކެއް ވަނީ ހުޅުވާފަ އެވެ. ފްލޫ ކްލިނިކްގެ އިތުރުން ދެން ހިމެނެނީ، ސެނެހިޔާގައި ގާއިމުކޮށްފައިވާ ޓްރެވެލް ކްލިނިކާއި، ހުޅުމާލޭގައި ބިދޭސީންނަށް ހާއްސަކޮށްގެން ގައިމްކޮށްފައިވާ ކްލިނިކެވެ. ތިން ކްލިނިކަށް ޖުމްލަ މިހާތަނަށް 1،162 މީހަކު ޑޮކްޓަރަށް ދައްކާފައިވާ ކަމަށް ވިދާޅުވި އެވެ.
މަބްރޫކު ވިދާޅުވީ، މިހާތަނަށް ޖުމްލަ 463 ސާމްޕަލްއެއް ނެގި އިރު، 450 މީހަކު ވައިރަހަށް ނެގެޓިވްވެފައިވާ ކަަމަށެވެ. ޕޮޒިޓިވްވީ 13 މީހެކެވެ. ތިރީސްފަސް ސާމްޕަލްގެ ނަތީޖާ އަދި މިހާތަނަށް ލިބިފައި ނުވާ ކަމަށް މަބްރޫކު ވިދާޅުވި އެވެ.
އެންމެ ފަހުން ނެގި ސާމްޕަލްތަކުގެ ތެރޭ ހިމެނޭ ކުރެއްދޫ ކޭސްއާ ކޮންޓެކްޓްވި މީހަކާއި، އިންޑިއާގެ ބެންގަލޫރުން ރާއްޖެ އައި ދިވެހި މީހާ އާއި، ގިލިލަންކަންފުށިން ޓެސްޓު ކުރި ދެ މީހުންނާއި، އަނަންތާރާ ކިހާވަށް އިން ޓެސްޓު ހެދި ދެމީހުންނާއި، މައި ސްކައި ސަފާރީން ޓެސްޓު ހެދި މީހަކާ އަދި ފުރަވެރި ރިސޯޓުން ޓެސްޓު ކުރި ދެ މީހުންވެސް ވައިރަހަށް ނެގެޓިވްވެފައިވާ ކަމަށް މަބްރޫކު ވިދާޅުވިއެ ވެ. މީގެ އިތުރުން އއ. މަތިވެރިން ޝައްކުވި މީހުންގެ ސާމްޕަލްތަކުގެ ޓެސްޓް ވެސް ނެގެޓިވްވެފައިވާ ކަމަށް މަބްރޫކު ހާމަ ކުރެއްވި އެވެ.
"މިހާރު ނެގެޓިވްވި ތަންތަން ވަނީ އާންމު ހާލަތައް ވަނީ ގެނެސްފައި،" މަބްރޫކު ވިދާޅުވި އެވެ.
ކަރަންޓީން އަދި އައިސޮލޭޝަންގެ ތަފްސީލު:
ވިލިވަރު - 25 ކަރަންޓީނުގައި
- ހުޅުލޭ އައިލެންޑް ހޮޓެލް - 57 ކަރަންޓީނުގައި
- ފަރުކޮޅުފުށި - 15 އައިސޮލޭޝަންގައި
- ދަރުމަވަންތަ ހޮސްޕިޓަލް - 2 އައިސޮލޭޝަންގައި
- ވެލިދޫ - 0
ވިލާގެ ފަން އައިލެންޑްވެސް ކަރަންޓިން ފެސިލިޓީއެއްގެ ގޮތުގައި ބޭނުންކުރަން ނިންމާފައިވާ ކަމަށް މަބްރޫކު ވިދާޅުވި އެވެ. ނަމަވެސް އަދި އެތަނަށް އެއްވެސް މީހަކު ކަރަންޓީނެއް ނުކުރެ އެވެ.