15 Mar 2020, 23:54
މިހާރު ރާއްޖޭގައި ފެތުރެމުންދާ ކޮރޯނާ ވައިރަސް ނުވަތަ ކޮވިޑް-19 އަށް ރައްކާތެރިވުމުގެ ގޮތުން ސަވައިލެންސްގެ ގޮތުން ކޮރޯނާއަށް އިތުރަށް މީހުން ޓެސްޓްކުރަން ފަށައިފިއެވެ.
ކޮރޯނާއާ ގުޅޭގޮތުން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައިޖީއެމްއެޗްގެ ޑޮކްޓަރު މޫސާ ހުސެއިން ވިދާޅުވީ ނޭވާލާ ނިޒާމަށް އިންފެކްޝަނެއް ނުވަތަ ރޯގާ ޖެހިގެން އެޑްމިޓްކުރާ ކޮންމެ މީހަކުވެސް ކޮވިޑަށް ޓެސްޓްކުރަން އައިޖީއެމްއެޗްއިން ފަށައިފިއެވެ.
މޫސަ ވިދާލުވީ މިހާތަަނަށް އެގޮތަށް ޓެސްޓްކުރި އެއްވެސް މީހެއްގެ ކިބައިން ބައްޔަށް ޕޮޒިޓިވްވެފައި ނުވާ ކަަމަށެވެ.
އެގޮތަށް ޓެސްޓްކުރަނީ ދިވެހިންގެ ތެރޭގައި ބަލި ފެތުރޭތޯ ނުވަތަ ނޫންތޯ ބެލުމުގެ ގޮތުން ކަމަށްވެސް މޫސަ ވިދާޅުވިއެވެ. އެގޮތަށް ޓެސްޓްކުރަނީވެސް ވަކިން ވަކި ތަނެއްގައި ބާއްވައިގެން ކަމަށްވެސް އޭނާ ވިދާޅުވިއެވެ.
"ދެން އޭގެ އިތުރަށްވެސް ކިރިޔާވެސް މީހަކު ސަސްޕެކްޓްވާނަމަ ސަވައިލެންސްގެ ގޮތުގައި އަޅުގަނޑުމެން އެބަދަން ޓެސްޓްކުރަމުން،" މޫސަ ވިދާޅުވިއެވެ.
ކޮވިޑް ޖެހިގެން ބޮޑުވަރުވާ މީހުންނަށް ފަރުވާ ދެމުންދަނީ އައިޖީއެމްއެޗްގައެވެ. އެ ހޮސްޕިޓަލްގައި މިހާރުވެސް ހަތަރު މީހަކަށް ދަނީ ފަރުވާދެމުންނެވެ.
މިހާތަނަށް ރާއްޖެއިން 13 މީހަކު ކޮވިޑް19 އަށް ވަނީ ޕޮޒިޓިވް ވެފައެވެ. އޭގެ ތެރޭގައި މުޅިންވެސް ހިމެނެނީ ބިދޭސީންނެވެ. އެއީ ކުރެއްދޫ ރިސޯޓުން ޕޮޒިޓިވްވި ފަސް މީހަކާއި، "އައިލެންޑް ސަފާރީ 1" ނަމަކަށް ކިޔާ ސަފާރީން ޕޮޒިޓިވްވި ދެ މީހަކާއި، ސޭންޑީޒް ބަތަލާއިން ދެ މީހަކާއި، ކުރަމަތި ރިސޯޓުން ދެމީހަކާއި އަނަންތާރާ ދިގު ރިސޯޓުން ޕޮޒިޓިވްވި ދެ މީހެކެވެ.