15 Mar 2020, 21:28
މިއަދު ރާއްޖެއައި ގަތަރު އެއާވޭސްގެ ފްލައިޓުން އެކަހެރިކުރީ ސްޕެއިން އިން އައި ދިވެއްސެއް ކަމަށް ސަރުކާރުން ބުނެފިއެވެ.
މިހާރު ދުނިޔެއާއި ރާއްޖޭގަިއ ފެތުރެމުންދާ ކޮރޯނާ ވައިރަސް ނުވަތަ ކޮވިޑް-19 އާ ގުޅިގެން ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ޓާސްކްފޯސްގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ މިއަދު އައި ގަތަރު އެއާވޭސްގެ ކިއުއާރު 674 ރާއްޖެއައުމާއެކު އެ ފްލައިޓް މޮނީޓަރިން ހާލަތަށް ގެނައި ކަަމަށެވެ.
އެ ފްލައިޓްގައި އިން ދިވެހި މީހާ ސްޕެއިންއިން އައީ ޓްރާންސިޓްވެގެން ކަމަށްވެސް މަބްރޫކް ވިދާޅުވިއެވެ.
ސްޕެއިންއަކީ މިހާރު ކޮރޯނާ ވައިރަސް އެންމެ ހަލުވިކަމާއެކު ފެތުރެމުންދާ އެއްގައުމުވެސްމެއެވެ. އެހެންވެ އެގައުމުން ފަތުރުވެރިން ރާއްޖެއައުން ސަރުކާރުންވަނީ މަނާކޮށްފައެވެ.
ސްޕެއިން އިން އައި ދިވެހި މީހާ 14 ދުވަހަށް ކަރަންޓީނު ކުރުމަށްޓަކައި މިހާރު ފަރުކޮޅުފުއްޓަށް ބަދަލުކޮށްފައިވާ ކަމަށްވެސް މަބްރޫކް ވިދާޅުވިއެވެ. އަދި އޭނާއާ ކޮންޓެކްޓް ޓްރޭސްވި 12 މީހުން އެކެހެރިކޮށް ބާކީ ފްލައިޓްގައި ތިބި މީހުން ދޫކޮށްލައިފައިވާ ކަަމަށް މަބްރޫކް ވިދާޅުވިއެވެ.
މިހާތަނަށް ރާއްޖެއިން 13 މީހަކު ކޮވިޑް19 އަށް ވަނީ ޕޮޒިޓިވް ވެފައެވެ. އޭގެ ތެރޭގައި މުޅިންވެސް ހިމެނެނީ ބިދޭސީންނެވެ. އެއީ ކުރެއްދޫ ރިސޯޓުން ޕޮޒިޓިވްވި ފަސް މީހަކާއި، "އައިލެންޑް ސަފާރީ 1" ނަމަކަށް ކިޔާ ސަފާރީން ޕޮޒިޓިވްވި ދެ މީހަކާއި، ސޭންޑީޒް ބަތަލާއިން ދެ މީހަކާއި، ކުރަމަތި ރިސޯޓުން ދެމީހަކާއި އަނަންތާރާ ދިގު ރިސޯޓުން ޕޮޒިޓިވްވި ދެ މީހެކެވެ.