15 Mar 2020, 01:45
ކޮރޯނާވައިރަސް، ކޮވިޑް-19އަށް ޝައްކު ކުރެވޭ އަލާމާތްތަކެއް ހުރި ބަޔަކު ފެނުމުން ވަގުތީ ގޮތުން ބަންދުކުރި، ބ، ފެހެންދޫ އާއި ހަތަރު ރިސޯޓެއް ހުޅުވާލައިފި އެވެ.
ސަލާމަތީ ފިޔަވަޅެއްގެ ގޮތުން ވަގުތީ ގޮތުން ބަންދުކުރުމަށް ފަހު އަލުން ހުޅުވީ، އޮބްލު ސަންގަލި، ބަޑޮސް އައިލެންޑް ރިސޯޓް، ޑްރީމްލޭންޑް މޯލްޑިވް އަދި އަނަންތާރާ ދިގު މޯލްޑިވްސް ރިސޯޓެވެ. އަދި ފެހެންދޫއިން ޓެސްޓްކުރި މީހާވެސް ނެގެޓިވް ވުމުން އެ ރަށް ވެސް ވަނީ ހުޅުވާލައިފަ އެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން މިރޭ ކުރި ޓްވީޓެއްގައި ބުނީ، އޮބްލު ސަންގަލި، ބަޑޮސް އައިލެންޑް ރިސޯޓް، ޑްރީމްލޭންޑް މޯލްޑިވްސް އަދި ފެހެންދޫ އިން ވައިރަހަށް ޝައްކު ކުރެވިގެން ޓެސްޓް ހެދި އެންމެންގެ ނަތީޖާ ނެގެޓިވްވެފައިވާ ކަމަށެވެ.
އެއާއެކު އޮންނަ އުސޫލުގެ ދަށުން، ވަގުތީ ގޮތުން ބަންދުކޮށްފައިވާ އެ ރަށްތައް އަލުން ހުޅުވާލާފައިވާ ކަމަށް ބުންޏެވެ. އެހެންވެ، މިހާރު އެ ރަށްތަކަށް އަރައި ފޭބުމުގައި އެއްވެސް ދައްޗެއް ނޯންނާނެ ކަމަށް ވެސް އެޗްޕީއޭއިން ބުންޏެވެ.
އެޗްޕީއޭ އިން ކުރި އިތުރު ޓްވީޓެއްގައި ބުނީ، އަނަންތާރާ ރިސޯޓުން މީހަކު ވައިރަހަށް ޕޮޒިޓިވްވެފައި ވާތީ، ކޮންޓެކްޓް ޓްރޭސިން ނިންމާ، ހޯމް އައިސޮލޭޝަނަށް ގެންދަން ޖެހޭ ފަރާތްތައް މިހާރު ވަނީ އެކަހެރިކޮށްފައި ކަމަށެވެ. އެއާއެކު އެ ރިސޯޓްވެސް ވަނީ މިހާރު ހުޅުވާލައިފަ އެވެ.
އަންނަތާރާ ރިސޯޓުން ޝައްކުވާ އިތުރު ދެ މީހެއްގެ ޓެސްޓް ހެދި ނަމަވެސް، ވައިރަހަށް ވަނީ ނެގެޓިވްވެފަ އެވެ.
ހަތަރު ރިސޯޓެއް ކަރަންޓީނުން ވީއްލިއިރު، އއ. ވިލަމެންދޫ ރިސޯޓްގައި ހުރި ބިދޭސީއެއްގެ ފަރާތުން ވައިރަހުގެ އަލާމާތްތަކެއް ފެނުމުން އެ ރަށް ވަނީ އަނެއްކާ ވެސް ބަންދުކޮށްފަ އެވެ. އަދި އޭނާއާ ކޮންޓެކްޓުވި މީހަކާ އެކު އެ ދެމީހުންގެ ޓެސްޓް ހެދުމުގެ މަސައްކަތް މިހާރު ވަނީ އެޗްޕީއޭއިން ފަށައިފަ އެވެ. މީގެ ކުރިން ވެސް އެ ރަށު ޝައްކުވާ މީހަކު ފެނިގެން އެކަހެރިކޮށް ޓެސްޓް ހެދި ނަމަވެސް، އޭނާ ވަނީ ނެގެޓިވްވެފަ އެވެ.
އަދިވެސް ފަސް ރިސޯޓެއް އޮތީ ވަގުތީގޮތުން އަރާ ފޭބުން މަނާކޮށްފަ އެވެ. މިހާތަށް ހަތަރު ރިސޯޓަކުން 10 ބިދޭސީން ވަނީ ވައިރަހަށް ޕޮޒިޓިވްވެފަ އެވެ.