14 Mar 2020, 16:25
މިހާރު ރާއްޖޭގައި ފެތުރެމުންދާ ކޮރޯނާ ވައިރަސް ނުވަތަ ކޮވިޑް-19 އާ ގުޅިގެން ލޯކަލް މާރުކޭޓާއި މާލޭގެ އެކި ސަރަހައްދުތަކުގައި ބަހައްޓާފައިވާ ގާޑިއާތައް ސާފުކޮށްފި އެވެ.
މާލޭ ސިޓީ ކައުންސިލުން ބުނީ އެ ތަންތަން ސާފުކުރީ ކައުންސިލްތަކާއި ގާޑިއާތަކާއި މާރުކޭޓްތައް ހިންގާ ފަރާތްތައް ގުޅިގެން ކަމަށެވެ.
އެ ހުރިހާ ތަންތަނެއް ވެސް ސާފުކޮށްފައި ވަނީ ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ކަނޑައަޅާފައިވާ ސިއްހީ މިންގަނޑުތަކާ އެއްގޮތަަށް ކަމަށް ވެސް ސިޓީ ކައުންސިލްއިން ބުންޏެވެ.
ކޮރޯނާވައިރަސް ފެތުރޭތީ މާލޭގެ މިސްކިތްތަކުގެ ކާޕެޓް ވެސް މިހާރު ވަނީ ނަގައި އެތަންތަން ޑިސްއިންފެކްޓް ކުރަން ފަށައިފަ އެވެ.
އޭގެ އިތުރުން މާލޭގައި ދުއްވާ ބަސްތައް ވެސް މިހާރު ދަނީ ޑިސްއިންފެކްޓްކުރަމުންނެވެ.
ރާއްޖެއިން މިހާތަނަށް 10 މީހަކު ކޮވިޑަށް ޕޮޒިޓިވް ވެފައިވާ އިރު ރާއްޖޭގެ ރިސޯޓުތަކަށް މީހުން އުޅޭ ރަށްރަށުން ދިޔުމާއި، ރިސޯޓުތަކުން މީހުން ދިރިއުޅޭ ރަށްރަށަށް ދިޔުން މިއަދު އިރުއޮއްސި ހަޔަކުން ފެށިގެން ވަނީ މަނާކޮށްފަ އެވެ.
ކޮވިޑަށް ޝައްކުވެގެން މިހާތަނަށް 120 ސާމްޕަލެއް ޓެސްޓުކޮށްފައިވާ އިރު 110 ސާމްޕަލެއް ވަނީ ނެގެޓިވް ވެފަ އެވެ.