14 Mar 2020, 16:20
ކޮރޯނާ ވައިރަސްއަކީ އެމެރިކާ އިން އޮރިޖިނޭޓްވި އެއްޗެއް ކަމަށް ޗައިނާ އިން ވެސް ތުހުމަތުކުރަން ފަށައިފި އެވެ.
މީގެ ކުރިން އީރާންގެ ވަރަށް ސީނިއާ އޮފިޝަލުން ވެސް ވަނީ ކޮރޯނާއަކީ އެމެރިކާގެ އިން ފެތުރުނު ވައިރަސްއެއް ކަމަށް ތުހުމަތުކޮށްފަ އެވެ.
ޗައިނާގެ ފޮރިން މިނިސްޓްރީގެ ސްޕޯކްސްޕާސަން ޖާއޯ ލީޖިއަން ކުރެއްވި ޓުވީޓެއްގައި ވަނީ އެމެރިކާގެ މައްޗަށް ބޮޑެތި ތުހުމަތުތަކެއް ކުރައްވައިފަ އެވެ.
އެގޮތުން މިދިޔަ އޮކްޓޯބަރު މަހު ޗައިނާގެ ވުހާންގައި ބޭއްވި މިލިޓަރީ ގޭމްސްގައި އެމެރިކާގެ ސިފައިން ބައިވެރިވި އިރު ވައިރަސް ފުރަތަމަ ފެތުރުނީ އެމީހުންގެ ކިބައިންކަމަށް ދޭހަވާ ގޮތަށް އޭނާ ވަނީ ވާހަަކަ ދައްކަވައިފަ އެވެ. ކޮރޮނާ ވައިރަސް ނުވަތަ ކޮވިޑް-19 ފުރަތަމަ ފެންނަން ފެށީ ވެސް ވުހާން އިން އެވެ.
ނަމަވެސް އެކަމާ ގުޅޭ ސީދާ ހެއްކެއް ތަރުޖަމާނު ހާމައެއް ނުކުރެ އެވެ.
ކޮރޮނާ ވައިރަސް އެންމެ ފުރަތަމަ ޗައިނާ އިން ފެނުނީ ނޮވެމްބަރު މަހު އެވެ.
އެއީ އެެމެރިކާ އިން މިލިޓަރީ ގޭމްސް ބައިވެރިވިތާ އެއް މަސް ފަހެވެ.
ޗައިނާ އިން ބޮޑެތި ތުހުމަތުތަކެއް ކުރިއިރު އެމެރިކާގެ ސެންޓާ ފޯ ޑިޒީސް ކޮންޓްރޯލްގެ ޑައިރެކްޓާ ރޮބާޓް ރެޑްފީލްޑް ވިދާޅުވީ މީގެ ކުރިން އެމެރިކާގައި ހުން ޖެހިގެން މަރުވި މީހުން ކޮރޯނާއަށް ޕޮޒިޓިވްވެފައިވާ ކަމަށެވެ.
ޗައިނާގެ އެޕިޑޮމޮލޮޖިސްޓެއް ކަމަށްވާ ޖޮންގް ނަންޝަން ވެސް މިދިޔަ މަހު ވިދާޅުވީ ކޮރޯނާ ވައިރަސް އެންމެ ފުރަތަމަ ފެންނަން ފެށީ ޗައިނާ އިން ކަމަށް ވިޔަސް އޭގެ ސޯސްއަކީ ކޮންމެހެން ޗައިނާ އިން ކަަމަށް ވާން ނުޖެހޭ ކަމަށެވެ.
މުޅި ދުނިޔެއިން ކޮރޯނާ ބަލި ޖެހުނު މީހުންގެ އަދަދު 125،000 އަށް ވުރެ މައްޗަށް އަރާފައިވާ އިރު މަރުވި މީހުންގެ އަދަދު ވަނީ 4000 އަށް ވުރެ މައްޗަށް އަރައިފަ އެވެ.