11 Mar 2020, 22:19
މިހާރު ދުނިޔޭގެ އެކި ކަންކޮޅުތަކުގައި ފެތުރެމުންދާ ކޮރޯނާވައިރަސް ނުވަތަ ކޮވިޑް-19 އަކީ ޕޭންޑެމިކްއެއްގެ ގޮތުގައި ޑަބްލިއުއެޗްއޯއިން ކަނޑައަޅައިފި އެވެ.
ޕޭންޑެމިކްއަކީ މުޅި ދުނިޔެއަށް އެ ބަލި ފެތުރި ނުރައްކާވާ ހާލަތަކަށް ދިއުމެވެ. މީގެ ކުރިން ކޮވިޑް-19 ބަލަމުން ދިޔައީ އެޕިޑެމިކްއެއްގެ ގޮތުގަ އެވެ. އެޕިޑެމިކްއަކީ ވަކި ސަރަހައްދުތަކެއްގައި ވަރަށް ބޮޑަށް ފެތުރެމުންދިއުމުން ކިޔާ ހާލަތެކެވެ.
ކޮވިޑް-19 މިހާރު ހަލުވިކަމާއެކު އީރާން އަދި އިޓަލީގައި ދަނީ ފެތުރެމުންނެވެ. އެގޮތުން މުޅި އިޓަލީ މިހާރު އޮތީ ލޮކްޑައުންވެސްކޮށްފަ އެވެ.
އޭގެ އިތުރުން އިނގިރޭސިވިލާތުގައިވެސް ބަލި ފެތުރެމުންދާއިރު އެގައުމުގެ ހެލްތު މިނިސްޓަރުވެސް ވަނީ ބައްޔަށް ޕޮޒިޓިވްވެފަ އެވެ. މީގެ ކުރިން އީރާންގެ ސަރުކާރުގެ އިސްބޭޅުންނަށް ވެސް ކޮވިޑް ޖެހި ބައެއް ބޭފުޅުން ވަނީ އަވަހާރަވެފަ އެވެ.
ޑަބްލިއުއެޗްއޯއިން ބުނީ ކޮވިޑް މިހާރު ހަލުވި ކަމާއެކު ފެތުރެނީ ޗައިނާ އަދި އިޓަލީގައި ކަމަށްވިޔަސް ކުރިއަށް އޮތް ތަނުގައި އެހެނިހެން ގައުމުތަކުގައި ހަލުވިކަމާއެކު ބަލި ފެތުރުމުގެ ފުރުސަތު އެބައޮތް ކަމަށެވެ. އެގޮތުން ޖަރުމަނުގެ ޗާންސެލާ އެންޖަލާ މޭކަލް ވިދާޅުވީ އެގައުމުގެ ތިންބައިކުޅަ ދެބައި މީހުންނަށް ބަލިޖެހުމުގެ ފުރުސަތު އެބަ އޮތް ކަމަށެވެ.
އިނގިރޭސިވިލާތުން މިހާރު ވަނީ ކޮވިޑް-19 އަށް ތައްޔާރުވުމަށް 38 ބިލިއަން ރުފިޔާގެ ބަޖެޓެއް ކަނޑައަޅައިފަ އެވެ.
ކޮވިޑް މިހާތަނަށް ދުނިޔޭގެ އެކި ކަންކޮޅުތަކުން 100،000 އަށް ވުރެ ގިނަ މީހުންނަށް ޖެހިފައިވާއިރު 4300 އެއްހާ މީހުން ވަނީ މަރުވެފަ އެވެ.