11 Mar 2020, 16:01
އުމްރާއިން އަންނަ މީހުން، ބަލީގެ އެއްވެސް އަލާމާތެއް ނުފެނުނު ނަމަވެސް، ދެ ހަފްތާ ވަންދެން ހޯމް އައިސޮލޭޝަން އަށް ދާން އިލްތިމާސް ކޮށްފި އެވެ.
ކޮވިޑް19 އާ ގުޅޭ އެންމެ ފަހުގެ މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސަރުކާރުގެ ތަރުޖަމާނު މަބްރޫކު އަޒީޒު ވިދާޅުވީ މިއަދު 50 އުމްރާވެރިންނާ އެކު ފްލައިޓެއް ރާއްޖެ އައިސްފައިވާ ކަމަށެވެ.
އިސްލާމިކް މިނިސްޓްރީ މެދުވެރިކޮށް އެމީހުންނާ އެކު ހުރި ޑޮކްޓަރާ މުއާމަލާތްކޮށް، އުމްރާވެރިން ފްލައިޓަށް އެރުވީ ބަލީގެ އެއްވެސް އަލާމާތެއް ހުރި މީހަކު ނެތްކަން ކަށަވަރުކުރުމަށް ފަހުގައި ކަމަށެވެ.
އަދި އެމީހުން މާލެ އައުމުން ކުރިއަށް ގެންދިޔަ ވެރިފިކޭޝަން ޕްރޮސެސްގެ ތެރެއިން، ބަލީގެ އެއްވެސް އަލާމާތެއް ފެންނަ ނަމަ އެފަރާތްތަކާއި އެ ފަރާތްތަކުގެ އާއިލާއަށް ޓްރެވަލް ކްލިނިކަށް ދެއްކުމުގެ އިންތިޒާމް ހަމަޖެހިފައިވާ ކަމުގެ މައުލޫމާތު ދީފައިވާނެ ކަމަށް ވެސް މަބްރޫކް ވިދާޅުވިއެވެ.
"އަދި އެބޭފުޅުންނަށް ނަސޭހަތްތެރިވެފައި ވާނީ އައިސޮލޭޝަންގައި މަޑުކުރުމަށް،" މަބްރޫކް ވިދާޅުވި އެވެ.
މަބްރޫކް ވިދާޅުވީ މި މަހުގެ 13 ވަނަ ދުވަހު ވެސް އުމްރާވެރިންނާ އެކު އިތުރު ފްލައިޓެއް އަންނާނެ ކަމަށާއި އެމީހުންނާ މެދު ވެސް އަމަލުކުރާނީ މިހާރު އަމަލުކުރަމުން އަންނަ އުސޫލާ އެއްގޮތަށް ކަމަށެވެ.
ނޫސްވެރިންނަށް މައުލޫމާތު ދެއްވަމުން ޑޮކްޓަރު މޫސާ މުރާޖް ވިދާޅުވީ އުމްރާއިން އަންނަ މީހުން ބަލީގެ އެއްވެސް އަލާމާތެއް ހުރިތޯ ސްކްރީން ކުރާނެ ކަމަށެވެ.
ސްކްރީން ކުރުމުގެ ތެރޭގައި އެއްވެސް މީހެއްގެ ފަރާތުން ބަލީގެ އަލާމާތެއް ފެނިއްޖެ ނަމަ، އެމީހުން ގެންދާނީ ޓްރެވަލް ކްލިނިކަށް ކަމަށް ޑޮކްޓަރު ވިދާޅުވި އެވެ. އަދި އިތުރަށް ބަލަން ޖެހޭ ކަންކަން ބަލައި، ހަދަންޖެހޭ ޓެސްޓުތައް ހެދުމަށް ފަހު އަޅަން ޖެހޭ ފިޔަވަޅުތައް އަޅާނެ ކަމަށެވެ.
އެއްވެސް އަލާމާތެއް ނުފެނުނު ނަމަވެސް، ދެ ހަފްތާ ވަންދެން މީހުންގެ ތެރެއަށް ނުނުކުމެ، ގޭގައި މަޑުކުރުމަށް އެޗްޕީއޭ އިން އިލްތިމާސް ކުރާ ކަމަށް ޑޮކްޓަރު ވިދާޅުވި އެވެ.
"އެއްވެސް އަލާމާތެއް ނެތް ކަމަށް ވަންޏާ އަޅުގަނޑުމެން ލަފާދޭނީ ގޭގައި މަޑުކުރަން. ބޭރުތެރެއަށް ނުނުކުމެ މީހުން އެއްވެ އުޅޭ ތަންތަނަށް ނުގޮސް ގޭގަ ދެ ހަފްތާ ވަންދެން މަޑުކުރަން،" ޑޮކްޓަރު ވިދާޅުވި އެވެ.
ގޭގައި މަޑުކުރާ މުއްދަތުގައި ވެސް އެއްވެސް އަލާމާތެއް ފެނިއްޖެ ނަމަ، އެ ފަރާތްތަކުން އެކަން ރިޕޯޓުކުރަން ޖެހޭނީ ޓްރެވަލް ކްލިނިކަށެވެ. އަދި އުމްރާއިން އައި މީހާ ފިޔަވައި، ގޭގައި އުޅޭ އެހެން މީހަކު ބަލިވި ނަމަވެސް ޓްރެވަލް ކްލިނިކަށް އެކަން ރިޕޯޓުކުރަން އެޗްޕީއޭ އިން އިލްތިމާސް ކުރެ އެވެ.