09 Mar 2020, 08:26
އެކްޓަރު އަދި ޑައިރެކްޓަރު އަލީ ސީޒަންގެ ފިލްމު ކުންފުނި އެސް ޕްރޮޑަކްޝަން އާއި މާސްކޭ ސްޓޫޑިއޯ ގުޅިގެން ތައްޔާރުކޮށް މި މަހުގެ ހަތަރު ވަނަ ދުވަހު ރިލީޒްކޮށްފައިވާ ފިލްމު "އަނދިރިކަން" ގެ ޝޯތައް ކޮރޯނާވައިރަސްގެ ސަބަބުން މެދުކަނޑާލައިފި އެވެ.
ފިލްމުގެ ލީޑު ބަތަލުގެ ރޯލު ވެސް ކުޅެފައިވާ ސީޒަން އެކަން ވަނީ އެސް ޕްރޮޑަކްޝަންގެ މީޑިއާ ގްރޫޕުގައި ވެސް ރަސްމީކޮށް އަންގާފަ އެވެ.
"ސަން" އަށް މައުލޫމާތު ދެމުން ސީޒަން ބުނީ، ފިލްމުގެ ފަސް ޝޯ އޮލިމްޕަހުގައި ސްކްރީން ކުރުމަށް ފަހު ކުރިޔަށް ހުރި ޝޯތައް މެދު ކަނޑާލަން ޖެހުނީ ގިނަ ބައެއްގެ ވެސް އެދުމުގެ މަތިން ކަމަށެވެ.
"ވަރަށް ގިނަ މީހުން އެބަ ބުނޫ ފިލްމު ވަރަށް ބަލަން ބޭނުމޭ، އެކަމަކު އެހާ މީހުން އެއްވެ އުޅޭ ތަންތަނަށް ދާން މިހާރު ޖެހިލުންވެޔޭ، އެހެންވެ އަސްލު އަޅުގަނޑުމެންގެ ޓީމުން މި ގޮތަށް މި ނިންމީ" ސީޒަން ބުންޏެވެ.
އަނދިރިކަން ގެ ޕޯސްޓަރެއް---
އިތުރަށް ސީޒަން ބުނީ، ރާއްޖެއިން ވެސް އެ ވައިރަހަށް ޕޮޒިޓިވް ބަޔަކު ފެނިފައިވުމުން އާންމު ހާލަތަަށް ވިސްނާފައި ފިލްމުގެ ޝޯތައް މެދުކަނޑާލި ނަމަވެސް މި ބަލިމަޑުކަމަށް ވާގޮތެއް ބެލުމަށްފަހު ފަހުގެ ތާރީހެއްގައި އަނެއްކާވެސް ބެލުންތެރިންނާ ހަމަޔަށް ފިލްމު ގެނެސްދޭނެ ކަމަށެވެ.
"ދެން އެކަމު ފިލްމު އެޅުވޭނެ ތާރީހެއް ކަނޑައެޅޭނީ މި ވައިރަހަށް ވާގޮތެއް ބަލާލުމަށްފަހު" ސީޒަން ބުންޏެވެ.
ސީޒަން ބުނީ، ފިލްމުގެ ފަސް ޝޯ އޮލިމްޕަހުގައި ދެއްކުނު އިރު ރަނގަޅު ތަރުހީބެއް ވެސް ޝޯތަކަށް ލިބިގެން ދިޔަ ކަމަށެވެ.
އަހުމަދު ޒަރީރުގެ އަސަރުގަދަ ސްކްރީންޕްލޭ އަކަށް ތައްޔާރުކޮށް، މ.މަޑުއްވަރީގައި ޝޫޓް ކޮށްފައިވާ "އަނދިރިކަން"ގެ އަންހެން ލީޑުންނަކީ ކާމިޔާބު ދެ އެކްޓްރެސް އިން ކަމަށްވާ ޝީލާ ނަޖީބާއި އައިމިނަތު ރިޝްފާ އެވެ. އޭގެ އިތުރުން ފިލްމުގައި ޒީނަތު އައްބާސް އާއި އަހުމަދު ސައީދުގެ އިތުރުން މަރިޔަމް ޝަކީލާ އަދި ދަރާ ރަޝީދު ފެނިގެން ދެއެވެ.
"އަނދިރިކަން" ގައި މުޖުތަމައު އަށް ރަނގަޅު ބޭނުންތެރި މެސެޖްތަކެއް ފޯރު ކޮށްދީފައިވާއިރު ފިލްމުގައި އެކްޓް ކޮށްފައިވާ ތަރިންގެ އެކްނޓިން ވެސް ފުރިހަމަކަން ފާހަގަކޮށްލެވެ އެވެ.