04 Mar 2020, 21:14
ކޮވިޑް-19 ނުވަތަ ކޮރޯނާވައިރަސްގެ ސަބަބުން ރާއްޖޭގެ އިގްތިސާދު ދަށަށް ދާނެތީ، މިވަގުތަކީ މިނިމަމް ވޭޖެއް ކަނޑައަޅަން އެންމެ ރަނގަޅު ވަގުތެއް ނޫން ކަމަށް މިނިމަމް ވޭޖް ބޯޑުގެ ޗެއާމަން މަރިޔަމް ޚާލިދާ ވިދާޅުވެއްޖެ އެވެ.
މިނިމަމް ވޭޖް ކަނޑައެޅުމާ ގުޅޭ ގޮތުން، މިރޭ ރައްޔިތުން މަޖިލީހުގައި ބޭއްވި ހިޔާލު ހޯދުމުގެ ބައްދަލުވުމުގައި ވާހަކަ ދައްކަވަމުން ބޯޑުގެ ޗެއާ ޚާލިދާ ވިދާޅުވީ، މިނިމަމް ވޭޖަކަށް 6،400 ރުފިޔާ ކަނޑައަޅަން ލަފާދީ ރިޕޯޓް އެކުލަވާލީ، ކޮރޯނާވައިރަހުގެ ނުރައްކާ އައުމުގެ ކުރިން ކަމަށެވެ. އެހެން ކަމުން، ސަރުކާރުން މިނިމަމް ވޭޖެއް ތަންފީޒު ކުރާއިރު، ކޮރޯނާ ވައިރަސްގެ ސަބަބުން އިގްތިސާދަށް ކުރާ އަސަރުތަކަށް ރިއާޔަތް ކުރަން އެދޭ ކަމަށް ޚާލިދާ ވިދާޅުވި އެވެ.
"ކޮރޯނާ ވައިރަސްގެ ސަބަބުން މުޅި ދުނިޔެއަށް އެބަ އަސަރު ކުރޭ. މިގައުމަށް ވެސް ކުރާނެ. މިގައުމަށް އަދި މާބޮޑަށް ކުރާނެ. އެހެން ވީމާ އަޅުގަނޑު ވަރަށް ބޮޑަށް އެދެން ސަރުކާރުން ވެސް އަދި ރައްޔިތުން މަޖިލީހުން ވެސް މިނިމަމް ވޭޖެއް އިމްޕްލިމަންޓް ކުރައްވާއިރުގައި މިކަންތައްތަކަށް ރިއާޔަތް ކުރެއްވުން. އަޅުގަނޑު ދެކޭ ގޮތުގައި މިއީކީ އެންމެ ރަނގަޅު ވަގުތެއް ނޫން މިނިމަމް ވޭޖެއް އިމްޕްލިމަންޓް ކުރާކަށް،" ޚާލިދާ ވިދާޅުވި އެވެ.
ކޮރޯނާވައިރަސް އަށް ފަހު، 40،000 އަށް ވުރެ ގިނަ ބުކިންސް ކެންސަލްވެފައިވާ ކަމަށް ތަފާސް ހިސާބުތަކުން ދައްކަ އެވެ. އެހެން ކަމުން ރާއްޖޭގެ ޓޫރިޒަމް 23 ޕަސެންޓް ދަށަށް ދާނެ ކަމަށް ވެސް ވަނީ ލަފާކުރެވިފަ އެވެ. އަދި ޓޫރިޒަމަށް އައިސްފައިވާ މި ހީނަރުކަމާ އެކު، ދައުލަތުގެ އާމްދަނީ މިދިޔަ މަހުވެސް، ވަނީ 872 މިލިއަން ރުފިޔާ މަދުވެ، 23 ޕަސެންޓަށް ވެއްޓިފަ އެވެ.
ޚާލިދާ ވިދާޅުވީ މިނިމަމް ވޭޖަކީ އެއްގޮތަކަށް ވެސް ލިވިން ވޭޖެއް ނޫން ކަމަށާއި މިނިމަމް ވޭޖްގެ ބޭނުމަކީ އެންމެ އަސާސީ ކަންކަން ފުއްދޭނެ ވަރު ކުރުން ކަމަށެވެ. މިނިމަމް ވޭޖުން ވިޔަފާރިތަކަށް ދަތި ހުންނާނެކަން ފާހަގަ ކުރައްވާ ޚާލިދާ ވިދާޅުވީ މިނިމަމް ވޭޖަކީ ވަޒީފާދޭ މީހާ މުޖުތަމައުގެ އެންމެންގެ ހައްގަށްޓަކައި އަދާކުރަން ޖެހޭ ޒިންމާއެއްގެ ގޮތުގައި ދެކެން ޖެހޭ ކަމަށެވެ.
"އެކޮނޮމިކް ފެބްރިކަށް މީގެން ބަދަލު އަންނާނެ. މީގައި އޮތީ އެންމެ ނެގެޓިވް ކުޑަވާނެ ގޮތަކަށް ބަލައިގެން އަމަލުކުރުން،" ޚާލިދާ ވިދާޅުވި އެވެ.
އޭނާ ވިދާޅުވީ މިނިމަމް ވޭޖް ކަނޑައެޅުމުގައި ބެލީ ސިޔާސީ ނުފޫޒުން އެއް ފަރާތްވެ ތިބެ، އެއްކުރެވުނު މައުލޫމާތުތަކާއި ދިރާސާތަކުގެ މައްޗަށް ބަލައި ވަޒީފާ ދޭ ފަރާތްތަކާއި ވަޒީފާ އަދާކުރާ ފަރާތްތަކުގެ ހައްގުތައް ވެސް ނުގެއްލޭނެ ގޮތަކަށް ކަމަށެވެ. އަދި ބޯޑުން މަސައްކަތްތައް ފެށިއިރު، 6،000-10،000 ރުފިޔާއާ ދެމެދުގެ އަދަދުތަކެއް އެކި ފަރާތްތަކުން ރެކޮމެންޑްކޮށްފައި ހުރިކަމަށް ޚާލިދާ ވިދާޅުވި އެވެ.
"ޕާލިމަންޓާ މިހެން ގޮސް ސަރުކާރުން ނަމްބާޒްތަކެއް ދީފައި ހުއްޓަސް އަޅުގަނޑުމެން ބެލީ ހަމަ އަމިއްލަ ދިރާސާތަކެއް ކުރަން. އެގޮތުން ދުނިޔޭގެ ބެސްޓް ޕްރެކްޓިސްތަކަށް ބަލާ މެތޮލޮޖީތައް ބޭނުންކުރީ. ދުނިޔޭގެ ގައުމުތަކުގައިވެސް މިނިމަމް ވޭޖެއް ކަނޑައެޅުމަކީ ވަރަށް ބޮޑު ޗެލެންޖެއް. އަޅުގަނޑުމެން ރާއްޖޭގައި ފަސްމަހުން މިކަން ކުރީއިރު ދުނިޔޭގެ އެހެން ގައުމުތަކުގައި އެތައް އަހަރަކުން ލައްކަ ގިނަ މަސައްކަތް ކުރޭ،" ޚާލިދާ ވިދާޅުވި އެވެ.
އޭނާ ވިދާޅުވީ ވަޒީފާ އަދާކުރާ މީހުންގެ ޝައްކުވާތައް ވަރަށް ގިނަކަން ފާހަގަވީ ކަމަށެވެ. އެގޮތުން، މާލޭގައި ދިރިއުޅޭ ފަރާތްތަކުގެ ދިރިއުޅުމުގެ އަގު ބޮޑުވުމާއި ލިބޭ މުސާރައިން އެ ހަރަދުތައް ނުފުއްދި ދެކޮޅު ނުޖެހޭކަން އަދި އަތޮޅުތަކުގައި ކުލި ދައްކަން ނުޖެހުނަސް، ދިރިއުޅުމުގެ އެހެން ހަރަދުތައް ބޮޑުކަން އެ މީހުން ފާހަގަކުރި އެވެ. އަދި ނަރުހުންނާއި ޑޮކްޓަރުންނަށް އެކަށީގެންވާ މުސާރައެއް ނުލިބޭ ކަމުގެ ޝަކުވާވެސް އޮތް ކަމަށް ޚާލިދާ ވިދާޅުވި އެވެ. އަދި ވަޒީފާ އަދާކުރާ ގިނަ މީހުން ބޭނުންވީ އެންމެ ކުޑަ އުޖޫރައިގެ ގޮތުގައި 10،000ރ. ނޫނީ އެއަށް ވުރެވެސް ބޮޑު އަދަދެއް ކަނޑައަޅަން ކަމަށް ވެސް ވިދާޅުވި އެވެ.
ވަޒީފާ ދޭ މީހުންގެ ޝަކުވާއަކީ ދިވެހިން މަސައްކަތް ކުރާލެއް ފަރުވާ ކުޑަކަމާއި އެކަށީގެންވާ ވަރަށް ދިވެހިން ނުލިބުން ކަމަށް ވެސް ޚާލިދާ ވިދާޅުވި އެވެ. ނަތީޖާއަކަށް ވަނީ ވިޔަފާރިތަކަށް ބިދޭސީ މުވައްޒަފުން ހޯދުން މަޖުބޫރުވުން ކަމަށް އޭނާ ވިދާޅުވި އެވެ،
ޚާލިދާ ކުރެއްވި ގޮތުގައި ދިރިއުޅުމުގެ އަސާސީ ބޭނުންތައް ފުއްދަން އެކަށީގެންވާ އަދަދު، ނީޑް ބޭސްޑް އެސެސްމަންޓުން ދެއްކީ މިނިމަމް ވޭޖަކަށް 8،600 ރުފިޔާ ކަނޑައަޅަން ޖެހޭ ކަމަށެވެ. އެހެން ނަމަވެސް، އިގްތިސާދީ ކަންކަމާއި ވިޔަފާރިތަކުގެ ހާލަތަށް ރިއާޔަތްކޮށް ބޯޑުން ނިންމީ އެ އަދަދު، 6،400 ރުފިޔާ ކަމުގައި ހަމަޖެއްސުމަށް ކަމަށް ވެސް ޚާލިދާ ވިދާޅުވި އެވެ.
މިނިމަމް ވޭޖް ކަނޑައެޅުމުގައި އެންމެ ބޮޑު ހުރަހަކަށްވީ އޭނާ ފާހަގަ ކުރެއްވި ގޮތުގައި އެކަށީގެންވާ ތަފާސްހިސާބު ނެތުމާއި ދިރާސާކުރަން ލިބުނު މަދު ދުވަސްކޮޅެވެ.