03 Mar 2020, 20:47
ދުނިޔޭޣެ އެކި ކަންކޮޅުތަކުގައި މިހާރު ފެތުރެމުންދާ ކޮވިޑް-19 އަށް ރާއްޖެއިން މިހާތަނަށް އެއްވެސް މީހަކު ޕޮޒިޓިވް ވެފައިނުވާ ކަމަށް ރާއްޖޭގެ ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފި އެވެ.
ކޮޑިވް-19 ފެތުރޭތީ ސޯޝަލް މީޑިއާގައި ތަފާތު ގޮތްގޮތަށް ވާހަކަތައް ދަނީ ފަތުރަމުންނެވެ. ނަމަވެސް ހަގީގަތް އޮޅޭ ގޮތަށް ހަބަރު ނުފެތުރުމަށް އެޗްޕީއޭ އިން ވަނީ އިލްތިމާސްކޮށްފަ އެވެ.
"ކޮވިޑް-19 އާ ގުޅޭ ގޮތުން މައުލޫމާތު ހޯދަން އެޗްޕީއޭ ފޮލޯ ކުރައްވާ. އަދި ގޮތް ނޭނގޭ ވާހަކަތައް ނުފަތުރައްވާ،" އެޗްޕީއޭއިން މިރޭ ކުރި ޓުވީޓެއްގައިވެ އެވެ.
ކޮވިޑް-19 މީހަކަށް ޖެހިފައިވާ ކަމަށް ޝައްކު ކުރެވިގެން ފުރަތަމަ ފަހަރަށް ރާއްޖޭގައި ކޮރޯނާވައިރަސްގެ ޓެސްޓް ކުރީ މިދިޔަ ހޮނިހިރު ދުވަހު އެވެ.
ނިއުމޯނިއާއަށް އައިޖީއެމްއެޗްގައި ފަރުވާ ހޯދަމުން ދިޔަ މީހަކު، ޓެސްޓުކުރި އިރު އެ ބައްޔަށް ވަނީ ނެގެޓިވްވެފަ އެވެ.
ކޮރޯނާއަށް ޓެސްޓް ކުރެވޭނެ އިންތިޒާމް ރާއްޖޭގައި ހަމަޖެއްސީ، ޑަބްލިއުއެޗްއޯގެ އެހީގަ އެވެ. އެ ޖަމާއަތުން ވަނީ ކޮރޯނާއަށް އަށް ޓެސްޓުކުރެވޭ ހާއްސަ ޓެސްޓުކިޓްތަކެއް ރާއްޖެއަށް ހަދިޔާކޮށްފަ އެވެ. އެ ކިޓްތަކުން 1000 މީހުންގެ ޓެސްޓް ހެދެ އެވެ.
ޗައިނާގެ ވޫހާން ސިޓީގައި މިދިޔަ ޑިސެމްބަރު މަހުގެ ފަހުކޮޅުން ފެށިގެން ފެތުރެން ފެށި އެވައިރަސް ދުނިޔޭގެ އެކި ކަންކޮޅުތަކަށް ފެތުރި މިހާތަނަށް 90،255 މީހަކަށް ވަނީ ޖެހިފަ އެވެ. އޭގެ ތެރެއިން 3080 މީހަކު ވަނީ މަރުވެފަ އެވެ.