03 Mar 2020, 16:25
ރާއްޖޭގައި މަސައްކަތްކުރާ އެއާކްރާފްޓް އިންޖިނިއަރުންނަށް ހާއްސަކޮށް ޖަމިއްޔާއެއް އިފްތިތާހްކޮށްފި އެވެ.
މޯލްޑިވްސް އެއާކްރާފްޓް މެއިންޓަނެންސް އެސޯސިއޭޝަންގެ ނަމުގައި އުފެއްދި އެ ޖަމިއްޔާގެ ފުރަތަމަ ބައްދަލުވުން ބާއްވާފައި ވަނީ މިދިޔަ ހޮނިހިރު ދުވަހު އެވެ.
އެ ބައްދަލުވުމުގައި އެ ޖަމިއްޔާގެ އެގެޒިކިއުޓިވް ކޮމެޓީއަށް ވަނީ މެމބަރުން ވެސް އިންތިހާބުކޮށްފަ އެވެ.
އޭގެ އިތުރުން ރާއްޖޭގެ އެއާކްރާފްޓް އިންޖިނިއަރުން އިތުރަށް ހުނަރުވެރިކޮށް އެ ޖަމިއްޔާ އިތުރަށް ކުރިއަށްގެންދެވިދާނެ ގޮތްތަކާ ގުޅޭ ގޮތުން ވަނީ މަޝްވަރާކޮށްފަ އެވެ.
އެ ޖަމިއްޔާގެ އޮފިޝަލަކު "ސަން" އަށް ބުނީ އެ ޖަމިއްޔާގައި ބައިވެރިވުމުގެ ފުރުސަތު ރާއްޖޭގައި މަސައްކަތްކުރާ ހުރިހާ އިންޖިނިއަރުންނަށް މިހާރު ހުޅުވާލައިފައިވާ ކަމަށެވެ.
ރާއްޖޭގައި މިހާރު ގިނަ އަދަދެއްގެ އެއާކްރާފްޓް އިންޖިނިއަރުން ދަނީ ހަރަކާތްތެރިވަމުންނެވެ.