29 Feb 2020, 19:40
ރައީސް މުހައްމަދު ނަޝީދުގެ ތައުރީފް އަވަށްޓެރި އިންޑިއާއަށް ތައުރީފް ކުރައްވައި، އެމެރިކާ ރަޝިއާ އަދި ޗައިނާ އަށް ފާޑުވިދާޅުވެ ވާހަކަ ދައްކަވައިފި އެވެ.
އިންޑިއާގެ ގުޖުރާތުގައި މިހާރު ކުރިއަށްދާ އިންޑިއާ ކޮންކްލޭސް ސަމިޓްގައި ރައީސް ނަޝީދު އިއްޔެ ދެއްވި ތަގުރީރުގައި ދުނިޔޭގެ ބޮޑެތި ބާރުތައް ބާރުތަކެއް ވެގެންް ދިޔަ ގޮތާއި އެ ބާރުތަކުގެ ސަބަބުން ދުނިޔެއަށް ކުރި އަސަރުތަކަށް ވަނީ އަލިއަޅުވާލައްވައިފަ އެވެ.
ރައީސް ނަޝީދު ވިދާޅުވީ އެތަކެއް ބާރުތަކެއް އުފެދި އަދި އެބާރުތައް ބާރުތައް ނެތިގެން ދިޔަތަން ތާރީހުން ފެނިގެން ގޮސްފައިވާ ކަމަށެވެ. އަދި އިންޑިއާއަކީ ބޮޑު ބާރު ނުވަތަ "ސުޕަޕަވާ" އަކަށް ވާތަން ގައިމު ވެސް ފެންނަމުންދާ ކަމަށެވެ.
ބޮޑުބާރަކަށް ވަމުންދާ އިރު އިންޑިއާއިން އެ ގައުމުގެ އަވަށްޓެރިންނަށް ބިރަކަށް ވާތަން ނުފެންނަކަން އެމަނިކުފާނު ފާހަގަކުރެއްވި އެވެ.
އެހެންނަމަވެސް އެމެރިކާ އިން ބޮޑުބާރަކަށް ވެގެންދިޔަ އިރު ނިކަރާގުވާ އަދި މުޅި ލެޓިން އެމެރިކާގެ ގައުމުތަކަށް ބޮޑެތި ބިރަކަށްވެ އެގައުމުތަށް ޑިކްޓޭޓާޝިޕަކަށް ވެގެން ދިޔަ ކަމަށް ރައީސް ނަޝީދު ވިދާޅުވި އެވެ.
ހަމައެފަދައިން ރަޝިއާ ބޮޑު ބާރަކަށްވި އިރު އެގައުމުގެ އަވަށްޓެރިން ސެޓަލައިޓް ސްޓޭޓަކަށް ވެގެން ދިޔަކަން އެމަނިކުފާނު ފާހަގަކުރެއްވި އެވެ.
"އިންޑިއާއަށް އެބައޮތް އިހްތިޔާރެއް. ބޮޑުބާރަކަށް ވާއިރު 19 ވަނަ އަދި 20 ވަނަ ގަރުނުގެ ބާރުތައް އަމަލުކުރި ގޮތަށް އަވަށްޓެރިންނާ މެދު އަމަލުކުރާނީތޯ ނޫނީ ނޫންތޯ. އަޅުގަނޑަށް އިތުބާރު އެބައޮތް އިންޑިއާއަށް އެހެން ސިޔާސަތެއް ގެންގުޅޭނެ ކަމުގެ،" ރައީސް ނަޝީދު ވިދާޅުވި އެވެ.
އެގޮތުން ގައުމަކުން މުސްތަގުބަލުގައި ގެންގުޅޭނެ ސިޔާސަތުތަކާ މެދު ވިސްނާ ނަމަ އެގައުމެއްގެ މާޒީގެ އަމަލުތައް ބަަލަން ޖެހޭނެ ކަމަށް އެމަނިކުފާނު ވިދާޅުވި އެވެ. ރައީސް ނަޝީދު މިސާލު ނެންގެވީ ނޮވެމްބަރު ތިނެއްގެ އުދުވާނަށެވެ.
އެ ދަނޑިވަޅު ރާއްޖެއައިސް ރާއްޖޭގައި ސިފައިން ރުކުރުވާލުމުގެ ފުުރުސަތު އޮތް ކަމަށާއި އަދި އެގޮތަށް އަމަލުކުރި ނަމަ ރާއްޖެއަށް ކުރެވޭނެ ކަމެއް ނޯންނާނެ ކަމަށް ވިދާޅުވި އެވެ. ނަމަވެސް އޭގެ ބަދަލުގައި އިންޑިއާ އިހްތިޔާރުކުރީ ރާއްޖެއިން ފައިބަން ކަމަށް ރައީސް ވިދާޅުވި އެވެ.
ކުރީގެ ސޯވިއަޓް ޔޫނިއަންއިން އަފްގާނިސްތާނުގައި ރުކުލުވާލި 50،000 ސިފައިންގެ ވަރުގެ ބޮޑު ލަޝްކަރެއް އިންޑިއާއިން ލަންކާގެ ދާހިލީ ހަނގުރާމައިގެ ދުވަސްވަރު އެގައުމުގައި ރުކުރުވާލިކަން ފާހަގަކުރައްވައި ވިދާޅުވީ ސްރީލަންކާގައި ގާއިމްވެތިބެން އިންޑިއާއިން ބޭނުންވި ކަމަށެވެ.
ރައީސް ނަޝީދު ވިދާޅުވީ ރާއްޖެއަކީ ކިތަންމެ ކުޑަ ގައުމެއްކަމަށް ވިޔަސް މިގައުމުގެ އިސްތުގުލާލަށް އަރައިގެންފައިނުވާ ކަމަށާއި އަދި ހަމަ އެފަދައިން އަވަށްޓެރި އެއްވެސް ގައުމަކަށް އެފަދައިން އަމަލުކޮށްފައި ނުވާ ކަމަށެވެ.
އެމެރިކާއާ ރަޝިއާއަށް ފަހު ރައީސް ނަޝީދުގެ ވާހަކަ އަލިއަޅުވާލެއްވީ ޗައިނާއަށެެވެ. ޗައިނާގެ ބާރު ގަދަވަމުން އަންނައިރު އޭގެ އަސަރު ވަރަށް ބޮޑަށް ރާއްޖެއަށް ކޮށްފައިވާ ކަމަށް އަމިނިކުފާނު ވިދާޅުވި އެވެ.
"ޗައިނާއިން ރާއްޖޭގެ ޕާލިމަންޓް ގަނެލި. މާލިއްޔަތު ގާނޫނު ބަދަލުކުރުވި. ގާނޫނު ބަދަލުކުރި. ގަވައިދާ ހިލާފަށް ކޮންޓްރެޓްތައް ހެދި. ޗައިނާއިން ރާއްޖެއައިސް ހުރިހާ ކަމެއް ކޮށްފައި މިފޮނުވީ މަތީ އަގުތަކެއް ޖަހާފައިވާ ބިލް. ދެން މިހާރު އެ ބިލްތައް ރާއްޖެއަށް ދެއްކޭކަށް ނެތް،" ރައީސް ނަޝީދު ވިދާޅުވި އެވެ.
ކުރީގެ ވެރިކަން ބަދަލުވެ އިންޑިއާއިން މިހާރު ރާއްޖޭގައި މަޝްރޫއުތައް ކުރިއަށް ގެންދަނީ ދެފުށްފެންނަ ގޮތަށް ރާއްޖޭގެ ސަރުކާރުން ބިޑިންގެ ތެރެއިންކަމަށް ރައީސް ނަޝީދު ވިދާޅުވި އެވެ.