06 Feb 2020, 21:06
ކޮލަމްބޯ (ފެބްރުއަރީ 6): އެއާބަސްގެ މަތިންދާބޯޓުތައް ގަތުމަށް އެ ކުންފުނިން އެކި އެއާލައިންތަކަށް ރިޝްވަތު ދިން މައްސަލައާ ގުޅިގެން ސްރީލަންކަން އެއާލައިންސްގެ ކުރީގެ ސީއީއޯ ކަޕީލާ ޗަންދުރަސެނަ އާއި އޭނާގެ އަންހެނުން ހައްޔަރުކޮށްފި އެވެ.
ޗަންދުރަސެނަ އާއި އަންހެނުން ޕްރިޔަންކާ ވިޖެނަޔަކަ ހައްޔަރު ކުރީ، އެއާބަސްއިން ސްރީލަންކަން އެއާލައިންސްއަށް ރިޝްވަތު ދިން ކަމަށް ތުހުމަތު ކުރެވޭ މައްސަލަ ތަހުގީގު ކުރަން ލަންކާ ސަރުކާރުން މިދިޔަ އާދިއްތަ ދުވަހު އެންގި ފަހުންނެވެ.
އެމައްސަލަ ފެންމަތިވީ، އެއާބަސްއިން 20 ގައުމެއްގައި ހަދާފައިވާ އެއްބަސްވުންތަކުގައި ރިޝްވަތު ހިމެނޭ ކަމަށް ބުނެ އިނގިރޭސި ހައި ކޯޓުގައި ބެލި މައްސަލައަކާ ގުޅުން ހުރި ލިޔުންތަކަކުންނެވެ. އިނގިރޭސިވިލާތާއި ފްރާންސާއި އެމެރިކާގެވެސް ޕްރޮސެކިއުޓަރުން ގުޅިގެން ބެލި އެ މައްސަލައިގައި އެއާބަސްއިން ވަނީ ޖޫރިމަނާގެ ގޮތުގައި ހަތަރު ބިލިއަން ޑޮލަރު ދައްކަން އެއްބަސްވެފަ އެވެ.
އެ ލިޔުންތަކުގައިވާ ގޮތުން ޗަންދުރަސެނަ އާއި ވިޖެނަޔަކައަށް އެއާބަސްއިން ރިޝްވަތު ދިނީ ޗަންދުރަސެނަ ސްރީލަންކަން އެއާލައިންސްގެ ސީއީއޯގެ ގޮތުގައި ހުރި އިރު، 2013 ވަނަ އަހަރުގަ އެވެ. އެލިޔުންތަކުގައިވާ ގޮތުން އެއާބަސްގެ މުވައްޒަފުން ވަނީ އެކުންފުނީގެ މަތިންދާބޯޓުތައް ގަތުމަށް އެދި، އެ ދެމަފިރިންނަށް 16.84 މިލިއަން ޑޮލަރު ހުށަހަޅާފަ އެވެ. އަދި އެ އެއްބަސްވުން ހެދުމުގައި ވިޖެނަޔަކަ ވަނީ މެދުވެރިއެއްގެ ރޯލު އަދާކޮށްފައި ކަމަށާއި، ރިޝްވަތުގެ ގޮތުގައި ދިން ދެ މިލިއަން ޑޮލަރު އޭނާގެ ކުންފުންޏަކަށް ފޮނުވާފައިވެ އެވެ.
މީގެ އިތުރުން އެއާބަސްއާ ވާދަ ކުރާ ކުންފުންޏެއްގެ ބޯޓުތައް ސްރީލަންކަންއިން އެދުވަސްވަރު ނުގަންނަ ނަމަ ވިޖެނަޔަކައަށް ފަސް މިލިއަން ޑޮލަރު ދޭންވެސް އެކުންފުނިން އެއްބަސްވި ކަމަށް އިނގިރޭސި ސީރިއަސް ފްރޯޑް އޮފީހުން ނެރުނު ރިޕޯޓެއްގައިވެ އެވެ.
ފްރާންސުގެ ކުންފުންޏެއް ކަމަށްވާ އެއާބަސް ހަތަރު އަހަރުވަންދެން ތަހުގީގު ކުރުމަށް ފަހު ބަލާފައިވާ އެ މައްސަލައިން އެނގޭ ގޮތުގައި އެކުންފުނިން 2011 އާއި 2015އާ ދޭތެރޭ ރިޝްވަތު ދީފައިވާ އެއާލައިންތައް ނިސްބަތްވާ ގައުމުތަކުގެ ތެރޭގައި ލަންކާ، މެލޭޝިއާ، އިންޑޮނޭޝިއާ، ޓައިވާން އަދި ގާނާ ހިމެނެ އެވެ.
އޭގެ ސަބަބުން އެއާބަސްއާ ގުޅުން ހުރި ވަކި ތަހުގީގުތައް ފަށާފައިވާ ގައުމުތަކުގެ ތެރޭގައި ގާނާ އާއި މެލޭޝިއާ ހިމެނެ އެވެ. އެގޮތުން މެލޭޝިއާއިން ބަލަމުން ދަނީ އެއާބަސްއިން އެގައުމުގެ ބަޖެޓު އެއާލައިން 50 މިލިއަން ޑޮލަރުގެ ރިޝްވަތު ދިން ކަމަށް ބެލެވޭ މައްސަލައެކެވެ. އެއާ އޭޝިއާއިން ވަނީ އެ ތުހުމަތުތައް ދޮގުކޮށް، ތަހުގީގަށް އެއްބާރުލުން ދޭނެ ކަމަށް ބުނެފަ އެވެ.