04 Feb 2020, 16:01
ބާތިލް ކުރި ގއ. އަތޮޅު ކައުންސިލާއި އެ އަތޮޅު ރަށު ކައުންސިލްގެ އެމްޑީޕީ ލޯކަލް ކައުންސިލް އިންތިހާބު ޕްރައިމަރީ އަންނަ ހުކުރު ދުވަހު ބާއްވަން އެ ޕާޓީން ނިންމައިފި އެވެ.
މިދިޔަ ހުކުރު ދުވަހު ބޭއްވި އެމްޑީޕީގެ ޕްރައިމަރީގައި ގއ. ރައްޔިތުން ވޯޓުލާ މަރުކަޒު، ކަލާފާނު ސްކޫލުގައި ހަމަނުޖެހުންތައް ބޮޑުވެ، އެ އަތޮޅުގެ ނުވަ ރަށުގެ ޕްރައިމަރީ އެމްޑީޕީން ވަނީ ބާތިލްކޮށްފަ އެވެ.
އެމްޑީޕީން ރޭ ނެރުނު ބަޔާނުގައި ބުނީ، އިންތިހާބު ބާތިލްކޮށްފައިވާ ގއ. އަތޮޅުގެ އަތޮޅު ކައުންސިލާއި ރަށު ކައުންސިލްތަކުގެ ޕްރައިމަރީ އާއި ޕްރައިމަރީގެ ވޯޓު އެއްވަރުވި ދާއިރާތައް، އަދި ޝަކުވާ ބަލާ ކޮމެޓީއަށް ހުށަހެޅުނު މައްސަލަތައް ބެލުމަށްފަހު އިންތިހާބު ބާއްވަން ފެންނަކަމަށް އެކޮމެޓީން ނިންމާފައިވާ ދާއިރާތަކާއިގެ ވޯޓުލުން އަންނަ ހުކުރު ދުވަހުގެ މެންދުރު 2:30 އިން ރޭގަނޑު 7:30 އަށް އޮންނާނެ ކަމަށެވެ.
ގއ ޕްރައިމަރީގެ އިތުރުން ދެން އަލުން ބާއްވާ ދާއިރާތައް އަދި އެ ޕާޓީން ހާމައެއް ނުކުރެ އެވެ. އެޕާޓީން ބުނި ގޮތުގައި މިއަދު އެ ދާއިރާތައް އިއުލާން ކުރާނެ ކަމަށެވެ.
އެމްޑީޕީ އިންތިހާބީ ކޮމިޓީގެ ނައިބު މުގައްރިރު އަދި ރައްޔިތުންގެ މަޖިލީހުގެ ހެންވޭރު އުތުރު ދާއިރާ މެމްބަރު، އިބްރާޙިމް މުއިއްޒު އިއްޔެ "ސަން" އަށް ވިދާޅުވީ، މާލޭ ސީޓީން ޝަކުވާ ހުށަހަޅާފައިވަނީ ހަމައެކަނި ހެންވޭރު ހުޅަނގު އަދި ގޮލޮޅު މެދު ދާއިރާ ކަމަށެވެ.
ހެންވޭރު ހުޅަނގު ވޯޓު ފޮށީގައި ޖެހުނު މައްސަލައަކީ އެ ވޯޓު ފޮށީގެ ވޯޓު ގުނި އިރު އެތަނުގައި ވޯޓު ގުނުމުގެ މާހައުލެއް ނެތި ވޯޓު ގުނި ކަމުގެ ޝަކުވާ ކމަށް މުއިއްޒު ވިދާޅުވި އެވެ. އަދި ގަލޮޅު މެދު ދާއިރާ ވޯޓާ ގުޅިގެން ހުށަހެޅި ޝަކުވާ އަކީ، އެ ދާއިރާގައި ވޯޓު ނުލާ 10 މީހަކު ވޯޓުލީ ކަމުގެ ޝަކުވާ ކަމަށް އޭނާ ވިދާޅުވި އެވެ.
"އެ ދާއިާތަކުގެ ޝަކުވާ ބެލުމަށްފަހު އަލުން ވޯޓު ބާއްވާން ފެންނަ ނަމަ، ރީ ވޯޓުން [އަލުން ވޯޓުލާން] އަކަށް ދާނަން،" މުއިއްޒު ވިދާޅުވިއެވެ.
މުއިއްޒު ވިދާޅުވިގިތުގައި އެ ދެ ދާއިރާގައި އަލުން ވޯޓުލުން ބޭއްވި ނަމަަވެސް މާލޭ މޭޔަރުގެ ވޯޓަށް ބަދަލު ނާންނާނެ ކަމަށެވެ.
ބާތިލް ކުރި ގއ. އަތޮޅުގެ ޕްރައިމަރީގައި ވޯޓު ދިނުމުގެ ހައްގު ލިބިގެންވަނީ 5،421 މީހުންނަށެވެ. އެ އަތޮޅުގެ ނުވަ ރަށުގެ ކައުންސިލަށް ޖުމްލަ 61 ކެންޑިޑޭޓުން ވާދަ ކުރެ އެވެ. ނުވަ ރަށުގެ ރައްޔިތުންގެ ވޯޓުން އިންތިހާބު ކުރާ އަތޮޅު ކައުންސިލް ރައީސް ކަމަށް ކުރިމަތިލާފައިވަނީ ތިން ބޭފުޅެކެވެ. އެގޮތުން އަތޮޅު ކައުންސިލަށް ވާދަ ކުރަނީ، މިހާރު އަތޮޅު ކައުންސިލްގެ ރައީސް އަހްމަދު ފުއާދު އާއި އަތޮޅު ކައުންސިލްގެ ދާންދޫ ދާއިރާ މެމްބަރު ހުސައިން އާދަމް އަދި ގއ. ވިލިނގިލި/ކަނޑުފެހި ޝަޒްމީން ޝިޔާމް އެވެ.
އެމްޑީޕީން ހުކުރު ދުވަހު އަލުން ބާއްވާ ޕްރައިމަރީތައް ބޭއްވުމަށް ނިންމެވި އިރު، އިދިކޮޅު މައި ޕާޓީ ޕީޕީއެމްގެ ޕްރައިމަރީވެސް އަންނަ ހުކުރު ދުވަހު ބޭއްވުމަށް ވަނީ ހަމަޖެހިފަ އެވެ.