03 Feb 2020, 11:00
ގުޅީފަޅުގައި ތަރައްގީކުރާ ބައިނަލްއަގުވާމީ ވިޔަފާރި ބަނދަރު ހަދަނީ، އެވްރެޖްކޮށް އަހަރަކު ހަތަރު ލައްކަ ކޮންޓެއިނަރުގެ މުދާ އަރުވައި ބޭލޭނެ ވަރަށް ކަމަށް ރައީސް ސޯލިހު މިއަދު ވިދާޅުވެއްޖެ އެވެ.
މާލޭގެ ވިޔަފާރި ބަނދަރަށް ދިމާވެފައިވާ ޖާގައިގެ ދަތިކަން ހައްލު ކުރުމަށް މާލޭގައިވާ ވިޔަފާރި ބަނދަރު ގުޅީފަޅަށް ބަދަލުކޮށް ބައިނަލްއަގުވާމީ ޕޯޓެއް ގާއިމް ކުރުމަށް އެ ފަޅުން ބިން ހިއްކުމުގެ މަސައްކަތް މިހާރު ވަނީ ފަށައިފަ އެވެ.
އެ ޕޯޓާ ގުޅޭ ކުޑަ މައުލޫމާތެއް ފުރަތަމަ ފަހަރަށް ހާމަކުރައްވަމުން ރައީސް ސޯލިހު ވިދާޅުވީ، ގުޅީފަޅުގައި ގާއިމް ކުރާ ޕޯޓްގައި އެންމެ ޒަމާނީ ވަސީލަތްތަކާއި ހިދުމަތްތައް ލިބޭނެ ކަމަށެވެ. އަދި އެ ޕޯޓް ހެދުމުގެ މަސައްކަތް މިއަހަރު ތެރޭ ފެށޭނެ ކަމުގެ ޔަގީންކަން އޮތް ކަމަށް ވެސް ވިދާޅުވި އެވެ.
"މި ބަނދަރު ތަރައްގީކުރަނީ އަހަރެއްގެ މައްޗަށް އެވްރެޖްކޮށް ހަތަރު ލައްކަ ކޮންޓެއިނަރުގެ މުދާ އަރުވައި ބޭލުމަށް ބޭނުންވާ، ޒަމާނީ ވަސީލަތްތައް ހިމަނައިގެން،" ރައީސް ވިދާޅުވި އެވެ.
އެމަނިކުފާނު ވިދާޅުވީ ޕޯޓްގެ ޑިޒައިނިން މަސައްކަތްތައް ނިމި، އެ މަޝްރޫއު ފެށުމަށް ތައްޔާރުވުމުގެ ކަންކަން ކުރިއަށް ދާ ކަމަށެވެ.
ގުޅިފަޅުގައި އިންޓަނޭޝަނަލް ޕޯޓެއް ހެދުމަށް ކޮންސަލްޓަންސީ ހެދުމަށް ހަވާލުކޮށްފައިވަނީ ޑެންމާކާއި ހޮލެންޑުގެ ދެ ކޮންސަލްޓަންސީ ކުންފުންޏެއްގެ މައްޗަށް އެކުލެވޭ ޖޮއިންޓް ވެންޗާއަކަށެވެ. އެއީ ޑެންމާކްގެ ކުންފުނި ނީރާސް އާއި ހޮލެންޑުގެ މެރިޓައިމް އެންޑް ޓްރާންސްޕޯޓު ބިޒްނަސް ކުންފުންޏަށެވެ.
ޕޯޓަށް ބޭނުންވާ ގާތްގަނޑަކަށް 75 ހެކްޓަރުގެ ބިން ހިއްކުމުގެ މަސައްކަތް ކުރަނީ، ޑަޗް ކުންފުންޏެއް ކަމަށްވާ، ބޮސްކާލިސްއިންނެވެ. އެ މަޝްރޫއު އެޕްރީލް މަހަށް ނިންމަން ޖެހެ އެވެ.