31 Jan 2020, 14:41
ކުޅުދުއްފުށީ ސިޓީގެ މޭޔަރު ކަމަށް އެމްޑީޕީގެ ޕްރައިމަރީގައި ވާދަކުރި، އަހްމަދު އާތިފް ނަން އަނބުރާ ގެންދިޔުމުން އެ ސިޓީގެ މޭޔަރު ކަމުގެ ޓިކެޓް މުހައްމަދު އާތިފްއަށް ކަށަވަރުވެއްޖެ އެވެ.
މިދިޔަ އަންގާރަ ދުވަހު އަހުމަދު އާތިފް އޭނާގެ ނަން އަނބުރާ ގެންދެވީ ޓްއަރިޒަމް މިނިސްޓްރީގެ ޑެޕިއުޓީ މިނިސްޓަރުކަން ހަމަޖެއްސުމާ އެކު އެވެ.
އެމްޑީޕީ އިންތިހާބާ ބެހޭ ކޮމިޓީގެ ނައިބު މުގައްރިރު، ހެންވޭރު އުތުރު ދާއިރާގެ މެންބަރު އިބްރާހިމް މުއިއްޒު މިއަދު "ސަން"އަށް ވިދާޅުވީ މިއަދު ބާއްވާ އެ ޕާޓީގެ ޕްރައިމަރީގައި ކުޅުދުއްފުށީ މޭޔަރު ކަމުގެ ވޯޓުލުން ނޯންނާނެ ކަމަށެވެ. އަދި ކުޅުދުއްފުށީ މޭޔަރު ކަމަށް ވާދަކުރައްވާ، އެ ސިޓީ ހިލްމަން، މުހައްމަދު އާތިފްްއަށް ޕްރައިމަރީއަކާ ނުލާ ޓިކެޓް ކަށަވަރުވެފައިވާ ކަމަށް އިންތިހާބާ ބެހޭ ކޮމިޓީއިން ނިންމާފައިވާ ކަމަށް ވެސް މުއިއްޒު ވިދާޅުވި އެވެ.
ރައީސްގެ ގަރާރަކުން ކުޅުދުއްފުށި ސިޓީއެއްގެ ގޮތުގައި ކަނޑައަޅާފައި ވަނީ، މިދިޔަ ޑިސެމްބަރު 31 ވަނަ ދުވަހު އެވެ. މިފަހަރު ވާނީ، ކުޅުދުއްފުއްޓަށް ސިޓީ ކައުންސިލެއް އިންތިހާބު ކުރާ ފުރަތަމަ ފަހަރަށެވެ.
އެމްޑީޕީ ޕްރައިމަރީގައި އެންމެ ކެންޑިޑޭޓަކު ކުރިމަތިލާފައިވާ ވުމުން، އަހުމަދު އާތިފްއާ އެކު މުޅި ޖުމްލަ، 390 ކެންޑިޑޭޓުންނަށް ވަނީ ޕްރަމަރީއަކާ ނުލާ ޓިކެޓް ކަށަވަރުވެފަ އެވެ.
އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބުގައި އެމްޑީޕީއިން ނެރޭ ކެންޑިޑޭޓުން ހޮވުމަށް ބާއްވާ އިންތިހާބުގައި، 1،279 ކެންޑިޑޭޓަކު ވާދަކުރެ އެވެ. ޖުމްލަ 93 ރަށެއްގައި 169 ވޯޓް ފޮށި ބަހައްޓާ މި ޕްރައިމަރީގައި، 90،000 އަށް ވުރެ ގިނަ މެންބަރުންނަށް ވޯޓްލެވޭނެ ކަމަށް އެ ޕާޓީއިން ވަނީ ބުނެފަ އެވެ. އެ ޕާޓާއިން ލަފާކުރަނީ، އާންމު މެންބަރުންގެ 70 ޕަސެންޓް ވޯޓްލާން ނިކުންނާނެ ކަމަށެވެ.
އެމްޑީޕީ ޕްރައިމަރީގެ ވޯޓްލުން ކުރިއަށް ގެންދިޔުމަށް ހަމަޖެހިފަިއ ވަނީ މެންދުރު 2:30 އިން މިރޭ 7:00 އަށެވެ.