15 Jan 2020, 22:32
އިޖުތިމާއީ ރައްކާތެރިކަމުގެ ނިޒާމް ހަރުދަނާކޮށް މުތޯލިއާ ކުރަން ޖެހޭކަމަށް ޖެންޑާ މިނިސްޓަރު ޝިދާތާ ޝަރީފް ވިދާޅުވެއްޖެއެވެ.
ޔުނިސެފް މޯލްޑިވްސްގެ އެހީތެރިކަމާއެކު ނޭޝެނެލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ ފަރާތުން މިއަދު ޗަމްޕާ ސެންޓްރަލް ހޮޓެލްގައި ކުރިއަށް ގެންދިޔަ "ސޯޝަލް ޕްރޮޓެކްޝަން އިވެލުއޭޝަން ވޯކްޝޮޕް" ހުޅުވުމުގެ ރަސްމިއްޔާތުގައި ޝިދާތާ ވިދާޅުވީ މި އަހަރުގެ ބަޖެޓުގައި އިޖުތިމާޢީ ރައްކާތެރިކަމަށް ގާތްގަނޑަކަށް 3.9 ބިލިޔަން ރުފިޔާ ސަރުކާރުން ކަނޑައަޅުއްވައިފައިވާ ކަމަށެވެ.
އޭގެ ތެރެއިން 1.3 ބިލިޔަން ރުފިޔާ ހާއްސަކުރެވިފައިވަނީ ބޭސްފަރުވާއަށާއި ނުކުޅެދުންތެރިކަން ހުންނަ ފަރާތްތަކަށް ކަމަށާއި، އިތުރު 1.3 ބިލިޔަން ރުފިޔާ އުމުރުން ދުވަސްވީ މީހުނަށް ހާއްސަކުރެވިފައިވާއިރު، އިޖުތިމާއީ ރައްކާތެރިކަމަށް ކުރެވޭ އެހެނިހެން ހަރަދުތަކަށް 1.2 ބިލިޔަން ރުފިޔާ ހާއްސަކުރެވިފައިވާ ކަމަށް ޝިދާތާ ވިދާޅުވިއެވެ. އަދި ވިދާޅުވީ އެ ކަމުން ވެސް މުޅި މުޖުތަމަޢުގެ ހަމަހަމަކަމާއި ހަމަޖެހުމަށް ސަރުކާރުން ހާއްސަ ސަމާލުކަމެއް ދެއްވާކަން ހާމަވާކަމަށެވެ.
އިޖުތިމާއީ ރައްކާތެރިކަމުގެ ނިޒާމުގެ ތެރެއިން ފުރިހަމަ މައުލޫމާތު ނެތިގެން ހައްގުވެރި ނޫން ބައެއް ފަރާތްތަކުން ނިޒާމުގެ ތެރެއިން ނާޖާއިޒުފައިދާ ނަގަމުންދާކަން މިނިސްޓަރު ވަނީ ފާހަގަކުރައްވައިފައެވެ. އެހެންކަމުން، އެ ނިޒާމު ގަވާއިދުން މުތޯލިއާކޮށް ހައްގުވެރިންނަށް އެހީ ކަށަވަރުކުރުމުގެ ގޮތުން މޮނީޓާކުރަން ޖެހޭކަމަށް މިނިސްޓަރު ވިދާޅުވިއެވެ.
އެކަނިވެރި މައިންނާއި ބައްޕައިންނާއި އެހީތެރިކަމެއް ނެތި އެހެން މީހަކު ބަލަހައްޓާ ކުދިންނަށާއި އެ ކުދިން ބަލަހައްޓާ ފަރާތަށް ދޭ އެހީގެ ޕްރޮގްރާމް 2010ވަނަ އަހަރުން ފެށިގެން ދަނީ ކުރިއަށްގެންދަމުންނެވެ.
އެ އެހީތައް ދިނަސް ފަރުދީ ގޮތުންނާއި ޖަމާޢީ ގޮތުން ކުރަމުންދާ ހެޔޮ އަސަރު ދެނެގަނެވިފައެއް ނުވާ ކަން އޭނާ ފާހަގަކުރެއްވިއެވެ.
އެހެންކަމުން ޔުނިސެފްއާއެކު މިއަދު ފެށި ވޯކްޝޮޕްގެ ދަށުން އެ އެހީތައް އޭގެ ހައްގުވެރިންނަށް ފޯރާ މިންވަރާއި، އެހީތަކުގެ ސަބަބުން އެހީގެ ހައްގުވެރިންނަށް ކުރާ ފައިދާތަކާއި، ގެންނަންޖެހޭ މުހިންމު ބަދަލުތައް ދެނެގަނެވިގެންދާނެކަމަށް ޝިދާތާ ވިދާޅުވިއެވެ.
ސަރުކާރުގެ އަމާޒަކީ އިޖުތިމާއީ ރައްކާތެރިކަމުގެ ނިޒާމް ހަރުދަނާކޮށް އެ ނިޒާމް މުޖުތަމައުގައި ދިރިއުޅޭ ކޮންމެ ކުއްޖަކަށް، ޢާއިލާއަކަށް އަދި ގޭބިސީއަކަށް ވާސިލުވެވޭނެ ގޮތަށް ބައްޓަންކުރަން ކަމަށް ޖެންޑާ މިނިސްޓަރު ޝިދާތާ ޝަރީފް ވިދާޅުވިއެވެ.