13 Jan 2020, 17:10
ސިޑްނީ (13 ޖަނަވަރީ 2020) : އޮސްޓްރޭލިއާގެ ޖަންގަލިތަކުގައި އަނދަމުންދާ އަލިފާން ތަކުގެ ސަބަބުން ބިލިޔަނެއްހާ ޖަނަވާރު މަރުވެ އެތަށް މިލިޔަން ހެކްޓަރެއްގެ ޖަންގަލި އަނދައި ހުލިވެއްޖެއެވެ. އޮސްޓްރޭލިއާގެ ކަމާބެހޭ ފަރާތްތަކުން ބުނީ އަލިފާނުގެ ނުރައްކާ އަދިވެސް ކުޑަ ނުކުރެވޭ ކަމަށާއި ކުރިޔަށް އޮތް ދުވަސްތަކުގައި ޖަންގަލިތަކުގައި އިތުރު އަލިފާންގަނޑުތައް ރޯވެދާނެކަމުގެ ބިރު އެބައޮތްކަމުގަ އެވެ.
އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ވިދާޅުވީ ހޫނު ގަދަވެ މޫސުމުގެ ކަންތައް ނުރައްކާތެރި ހާލަތަކަށް ގޮސްފައިވާއިރު ކުރިޔަތްވެސް އޮތީ ދަތި އުނދަގޫ ދުވަސްތަކެއް ކަމަށެވެ. ކުރިޔަށް އޮތް ހަފްތާތަކުގައިވެސް ހޫނު ގަދަވެ ހޫނުވަޔާއެކު އިތުރު އަލިފާންގަނޑުތައް އުފެދުމުގެ ބިރު އެބައޮތް ކަމަށް މޮރިސަން ވިދާޅުވި އެވެ.
އޮސްޓްރޭލިއާ ގެ ޖަންގަލިތަކުގައި އަލިފާންރޯވެ އަނދަމުންދާތާ ދެމަހެއްހާ ދުވަސްވެފައިވާއިރު އަލިފާނުގެ ސަބަބުން 28 މީހުން މަރުވެ 250،000 ވުރެ ގިނަ މީހުންވަނީ ގެދޮރު ދޫކޮށް ރައްކާތެރި ތަންތަނަށް ގޮސްފަ އެވެ. އެތަށް ހާސް ގެއެއް ވަނީ އަނދައި ހުލިވެފަ އެވެ. އަލިފާނުގެ ސަބަބުން އިއްޔެވަނީ ސައުތް ވޭލްސް އިން ޒުވާން އަންހެނަކު މަރުވެފަ އެވެ. ކޯޓްނީ ޕެޓްރިޖް ނަމަކަށް ކިޔާ އުމުރުން 19 އަހަރުގެ އެއަންހެން ކުއްޖާ މަރުވީ ބޯދުމުގެ ސަބަބުން އެލާޖިކް ވެގެންކަމަށް ވެއެވެ.
އޮސްޓްރޭލިއާގެ ޖަންގަލިތަކުގައި އަނދަމުންދާ އަލިފާނަކީ ދުނިޔޭގެ ތިމާވެއްޓަށް އާދަޔާ ހިލާފު ބޮޑެތި ގެއްލުންތަކެއް ދޭ އަލިފާނަކަށްވެފައި އަލިފާންގަނޑުތައް ނިއްވުމަށް އޮސްޓްރޭލިއާ ސަރުކާރު ނުކުޅެދިފައިވީ ނަމަވެސް ދުނިޔޭގައި މިކަމާބެހޭ ވަސީލަތްތަކާއި ގާބިލްކަންހުރި ބޮޑެތި ގައުމުތަކުން މިކަމަށް މާބޮޑު ސަމާލުކަމެއް ނުދޭކަމުގެ ޝަކުވާ ތިމާވެއްޓަށް މަސައްކަތްކުރާ ފަރާތްތަކުން ގެންދަނީ ކުރަމުންނެވެ. މިމައްސަލާގައި އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ގެ ސަރުކާރުގެ އިހުމާލާއި ނުކުޅެދުންވެސް ހިމެނޭއިރު މޮރިސަންގެ ސަރުކާރާ ދެކޮޅަށް އޮސްޓްރޭލިއާގެ އާންމުންގެ އެތަށް ހާސްބަޔަކު މިދިޔަ ހަފްތާގެ ބަންދުގައި ސިޑްނީގެ މަގުތަކަށް ނުކުމެ ކުރި މުޒާހަރާތަކުގައި މޮރިސަންގެ ސަރުކާރާ ދެކޮޅަށް ވަނީ ވަރަށް ބޮޑަށް އަޑުއުލާފައެވެ. މުޒާހަރާކުރި ފަރާތްތަކުންވަނީ ތިމާވެއްޓާމެދު މޮރިސަން ގެ ސަރުކާރުން ގެންގުޅެނީ ވަރަށް ދޯހަޅި ސިޔާސަތު ކަމަށްބުނެ އެ ސިޔަސަތުތައް ބަދަލުކުރުމަށް ގޮވާލާފައެވެ.
އަލިފާނުގެ ސަބަބުން އޮސްޓްރޭލިއާގެ ޖަންގަލިތަކުން 10.3 މިލިޔަން ހެކްޓަރަށްވުރެ ބޮޑު ސަރަހައްދެއް ވަނީ އަނދައި ހުލިވެގެން ގޮސްފައެވެ. މިކަމުގެ ސަބަބުން އޮސްޓްރޭލިއާގެ ޖަންގަލިތަކުގައި ދިރިއުޅޭ ދިރޭތަކެތީގެ ތެރެއިން އެކިބާވަތުގެ ބިލިޔަނެއްހާ ޖަނަވާރު މަރުވެފައިވާ ކަމަށް ތިމާވެއްޓަށް މަސައްކަތްކުރާ ޖަމާއަތްތަކުން ބުނެއެވެ. ދާދިފަހުން އޮސްޓްރޭލިއާގެ ބައެއް ސަރަހައްދުތަކަށް ވެހުނު ވާރެއާއެކު ބައެއް އަލިފާންގަނޑުތައް ނިވިގެންދިޔައެވެ. ނަމަވެސް އޭގެފަހުން ހޫނުގަދަވެ އިތުރުތަންތަނުގައިވަނީ އަލިފާންގަނޑުތައް އުފެދިފައެވެ.
އޮސްޓްރޭލިއާގެ ޖަންގަލިތަކުގައި އަނދަމުންދާ އަލިފާން ތަކުގެ ސަބަބުން އަރާދުމާއެކު އެގައުމުގެ ސަރަހައްދުތަކާއި ސިޓީތަކުގެ ޖައްވު ތަޣައްޔަރުވެފައިވާއިރު ދުމުގެ ސަބަބުން އެތަންތަނުގެ ރައްޔިތުންނަށް ލިބޭ ގެއްލުން ކޮންމެ ދުވަހަކު 75 ސިގިރެޓް ބުއިމުން ލިބޭ ގެއްލުމާ އެއްފަދަ ކަމަށް އޮސްޓްރޭލިއާގެ ކަމާބެހޭ ފަރާތްތަކުން ބުނެއެވެ. (ނޫސްއެޖެންސީތައް)