06 Jan 2020, 08:15
ކ. ތުލުސްދޫ ކައިރީ އޮންނަ ކުޑަވިލިނގިލި ފަޅުގައި އަޅާފައިވާ ޔޮޓެއްގައި ރޯވެ، އަނދައިފި އެވެ.
އެމްއެންޑީއެފުން ބުނީ ރޯވެފައިވަނީ ރާއްޖެއިން ބޭރު ޔޮޓެއްގައި ކަމަށެވެ. ޔޮޓު ގައި ރޯވި އިރު އޭގައި ތިން މީހުން ތިބިކަމަށްވެސް އެމްއެންޑީއެފް އިން ބުންޏެވެ.
އަލިފާނުގެ ހާދިސާގެ ރިޕޯޓު ލިބުނީ ރޭ ފަތިހު 5:42 ހާއިރު ކަމަށާއި އަލިފާން ނިއްވުމުގެ މަސައްކަތް އެމްއެންޑީއެފް ފަޔާ އެންޑް ރެސްކިޔު އިން ކުރަމުންދާ ކަމަށް ވެސް އެމްއެންޑީއެފް އިން ބުންޏެވެ.
ކުޑަވިލިނގިލި ފަޅުގައި އަޅާފައިވާ ޔޮޓެއްގައި ރޯވެފައި -- ފޮޓޯ: އެމްއެންޑީއެފް
އަލިފާން ރޯވި އިރު ޔޮޓުގައި ތިބީ ތިން ފިރިހެނުން ކަމަށާއި އެމީހުންނަށް ބޮޑު އަނިޔާއެއް ލިބިފައި ނުވާ ކަމަށްވެސް އެމްއެންޑީއެފް އިން ބުންޏެވެ.
އެމްއެންޑީއެފް އިން ބުނީ ޔޮޓު ގައި ރޯވުމުން އޭގައި ތިބި ތިން މީހުން އެ ސަރަހައްދުގައި އޮތް ސަފާރީ އަކަށް ނަގާފައިވާ ކަމަށާއި އެ ތިންމީހުންނަށް ފަރުވާ ދިނުމަށް ތުލުސްދޫ ސިއްހީ މަރުކަޒަށް ގެންގޮސްފައިވާ ކަމަށެވެ.
ކުޑަވިލިނގިލި ފަޅުގައި އަޅާފައިވާ ޔޮޓެއްގައި ރޯވެފައި -- ފޮޓޯ: އެމްއެންޑީއެފް
'ވެރިޓާ" ނަމަކަށް ކިޔާ މިޔޮޓަކީ އޮސްޓްރޭލިއާ އަށް ނިސްބަތްވާ ޔޮޓެއް ކަމަށް އެމްއެންޑީއެފުން ބުންޏެވެ. އަލިފާން ރޯވި އިރު އޭގައި ތިބި ތިން މީހުންނަކީވެސް އޮސްޓްރޭލިއާ ތިން މީހުންނެވެ.
ޔޮޓުގައި ރޯވި އަލިފާންގަނޑު އަދި އެއްކޮށް ނިއްވާ ނުލެވޭ ކަމަށްވެސް އެމްއެންޑީއެފް އިން ބުންޏެވެ.