28 Dec 2019, 15:54
ކޮންމެ ދުވަހުކު ވެސް ސޯޝަލް މީޑިއާ ހުޅުވާލާ އިރަށް ފެންނަމުން ދަނީ ކުޅިވަރުގެ ފޯރި ރާއްޖެއިން ދުވަހަކަށް ވުރެން ދުވަހެއް ކެނޑެމުންދާތީ އެކަމާ ބަޔަކު ހިތާމަކުރާ ތަނެވެ. ގައުމީ ފުޓުބޯޅަ ލީގު ކުޅެމުންދާ އިރު ގޮނޑިބަރިތައް ހުސްކޮށް ހުންނަ ވާހަކަ އެވެ. އެކަމަކު އެކަން ހައްލު ކުރަން މިހާތަނަށް އެއްވެސް މަސައްކަތެއް ކުރެވުނު ހެއްޔެވެ؟ ނަތީޖާއެއް ފެނިއްޖެ ހެއްޔެވެ؟
ރާއްޖޭގެ އެންމެ ދުވަސްވީ އަދި ކާމިޔާބު ދެ ކުލަބުކަމަށްވާ ނިއުރޭޑިއަންޓާއި ވިކްޓަރީގެ ވާދަވެރި ކުރިމަތިލުން ބަލާލުމަށް ދަނޑުތައް ފުރާލާ އިރު ދުރުގައި ތިބެގެން ޓީވީތަކުން ވެސް އެ މެޗު ފޯރިއާ އެކު ބަލާ މީހުން ރާއްޖެއަކު މަދެއް ނޫނެވެ. އޭގެ ފަަހަށް ބަލާއިރު މާޒިޔާ އަދި ޓީސީ ނޫނީ އީގަލްސްގެ ހިތްގައިމު ކުޅުން ވެސް ދުރުގައި ތިބޭ ކުޅުންތެރިންގެ އާއިލާއާއި ރައްޓެހިން ވެސް އައީ ޖޯޝާ އެކު ބަލަމުންނެވެ. އެކަމަކު މިއަދު މިއޮތީ ހާލަތު ބަދަލުވެ ރާއްޖޭގެ ގައުމީ ފުޓުބޯޅަ ލީގު ދަނޑަށް ނުގޮސް ބެލޭނެ އިތުރު ގޮތެއް ނެތް ހާލަތައް ކަންތައް ގޮސްފަ އެވެ.
ކުރީ އަހަރުތަކާ ޙިލާފަށް މި އަހަރު ގައުމީ ލީގު ބްރޯޑްކާސްޓް ކުރުމުގެ ރައިޓްސް ފުޓުބޯޅައާ ބެހޭ މައި އިދާރާ (އެފްއޭއެމް) އިން ދިނީ ވިލާ ޓީވީ (ވީޓީވީ) އަށެވެ. އެ ޓީވީ ޗެނަލާ އެކު އެފްއޭއެމް ހެދި އެއްބަސްވުމުގެ ދަށުން ލީގުގައި ހަވީރު ކުޅޭ މެޗުތައް ލައިވް ކުރާ އިރު ރޭގަނޑު ކުޅޭ މެޗުތައް ރިކޯޑް ކުރުމަށް އެއްބަސްވެވުނެވެ. އެހެން ނަމަވެސް ލީގު ދެބައިވެ ނިމޭ އަތަށް އަޅާލި އިރު މިއަދާ ހަމައަށް ވެސް އެފްއޭއެމުން ވީޓީވީއަށް ދޭން ޖެހޭ އެއްވެސް ޕޭމަންޓެއް ނުދިނުމުގެ ސަބަބުން މެޗު ލައިވް ކުރުން ވީޓީވީން ވަނީ ހުއްޓާލައިފަ އެވެ.
އެއާ އެކު ރާއްޖޭގެ ގައުމީ ލީގު ދެން އިތުރު އެއްވެސް ބަޔަކަށް ދަނޑަށް ވަދެގެން ނޫނީ ނުބެލޭނެ އެވެ. މިކަމުގެ ސަބަބުން ގެއްލުން ވާނީ ހަމައެކަނި ސަޕޯޓަރުންނަކަށް ނޫނެވެ. ކުޅުންތެރިންނާއި ކޯޗުންނަށް ވެސް އޭގެ ސަބަބުން ބޮޑެތި ދަތިތަކާ ކުރިމަތިވާނެ އެވެ. ކުރިއަށް އޮތް މެޗަށް ތައްޔާރުވުމަށް މެޗުގެ އެނަލައިސިސް ހަދާ މިސްޓޭކްތައް ބެލުމަށް މެޗު ވަރަށް މުހިއްމެވެ. އެހެން ކަމުން މިކަމުގެ ސަބަބުން ފުޓުބޯޅައަށް ނުހަނު ގެއްލުން ވާނެކަން ޔަގީނެވެ.
ވީޓީވީގެ ޑެޕިއުޓީ ސްޕޯޓްސް ހެޑް އިސްމާއީލް ޝާހު "ސަން" އަށް ދިން އިންޓަވިއުއެއްގައި ބުނީ އެފްއޭއެމްއިން ފައިސާ ނުދައްކައިގެން ތަކުރާރުކޮށް އެ މައްސަލަ އެ އިދާރައިގެ ރައީސް ބައްސާމް އަދީލް ޖަލީލްގެ ސަމާލުކަމަށް ގެނަވުނު ކަމަށެވެ. އެހެން ނަމަވެސް އެކަމަށް ހައްލެއ ލިބިފައި ނުވާތީ އެންމެ ފަހުން ލައިވް ކުރުން ހުއްޓާލަން ޖެހުނީ ކަމަށް ޝާހު ބުންޏެވެ.
"ވަރަށް ބައިވަރު ފަހަރު އެފްއޭއެމަށް އަންގާފައި އޮންނާނީ އެކަން. ކޮންމެ ފަހަރަކު ވެސް ބުނަނީ ދައްކާނަމޭ ދައްކާނަމޭ. އެކަމަކު އެއްވެސް ޕޭމަންޓެއް އަދި ނުދައްކާ. އެހެންވެ ލައިވް ކުރުން ހުއްޓާލީ." ޝާހް ބުންޏެވެ.
ޝާހް ބުނީ އެފްއޭއެމްއާ އެކު ވެފައިވާ އެއްބަސްވުން އަދި އުވާނުލާ ކަމަށެވެ. އެހެން ނަމަވެސް ދެން ފައިސާ ދެއްކި ނަމަވެސް ކުރިއަށް އޮތްތާ އެއްބަސްވުމާ އެކު ކުރިއަށް ދާނެތޯ ނޫންތޯ ނިންމާނީ މެނޭޖްމެންޓުން ކަމަށެވެ. އެކަމަކު ހަބަރަށް ބޭނުންވާ ވީޑިއޯ އަދި ވެސް ނަގާނެ ކަމަށް ޝާހް ބުންޏެވެ.
އެފްއޭއެމް އިން މި އަހަރު ބޭއްވި އަހަރީ ކޮންގްރެސްގައި މުޅި އަހަރުގެ ބަޖެޓަކަށް 90.4 މިލިއަން ރުފިޔާގެ ބަޖެޓެއް ވަނީ ފާސްކޮށްފަ އެވެ. އެކަމަކު "ސަން" އަށް މައުލޫމާތު ލިބިފައިވާ ގޮތުގައި އެފްއޭއެމް އިން ވީޓީވީއަށް ލާރި ދެވޭނެ ގޮތެއް ނެތިގެން އުޅެނީ މިނިސްޓްރީން އެ އިދާރާއަށް ދޭން ޖެހޭ ލާރި ނުދީގެން ކަމަށްވެ އެވެ.
ސުވާލަކީ އަހަރު ނިމުނު އިރު އެފްއޭއެމުން ބަޖެޓްގެ ބޭނުން ރަނގަޅު ގޮތުގައި ކުރެވުނުތޯ އެވެ. އެ ފައިސާ އިން ކުރަން ރޭވި ކަންކަމުގެ މަންފާ ލިބުނީ ކިހާވަރަކަށްތޯ އެވެ. އަދި އެ ފައިސާ އެކަން ކަމަށް ބޭނުން ކުރިތޯ ވެސް އެއީ ސުވާލު އުފެދޭ ކަމެކެވެ.