26 Dec 2019, 08:22
އިރުކޭތައަށް ކިތަންމެ ބަލާލާ ހިތްވިޔަސް، ނަމަނަމަ ހަމަލޮލުން ނުބަލާށެވެ.
މިއަދު ހެނދުނު 7:38 އިން 10:32 އާއި ދެމެދު، މާލެއަށް އިރުކޭތަ ފެންނާނެ ކަމަށް ކަމާއިބެހޭ ވުޒާރާތަކުން ލަފާކޮށްފައިވާއިރު، އުތުރުގެ ރަށްތަކަށް އެ ވަގުތަށްވުރެ ފަސް މިނެޓް ކުރިން އިރުކޭތަ ހިފާއިރު ދެކުނުގެ ރަށްތަކަށް އިރުކޭތަ ހިފާނީ މާލެއަށް ވުރެ ފަސް މިނެޓް ލަހުންނެވެ.
އޯމާންގެ މިނިސްޓްރީ އޮފް ހެލްތް އިންވަނީ އިރުކޭތަ ބެލުމަށް ހާއްސަ ތިން އާލާތެއް ލިސްޓުކޮށްފަ އެވެ. އެއީ، އިރުކޭތަ ބެލުމަށް ހާއްސަ އަވި އައިނާއި، ޓެލެސްކޯޕް އަދި ވެލްޑާސް މާސްކެވެ.
މިފަހުން ރާއްޖެ އަށް އިރުކޭތަ ހިފާފައިވަނީ 2017 ވަނަ އަހަރު އެވެ. އިރުކޭތަ ހިފަނީ ވަށާ ދަތުރުކުރާ ދުނިޔެ އާއި އިރާ ދޭތެރެއަށް ހަނދު ވަނުމުންނެވެ.
އިރުކޭތަ ބެލުން އެކަށީގެން ނުވާ ތަކެތި-- ފޮޓޯ:ޓައިމްއެންޑްޑޭޓް.ކޮމް
މިހެން އިރުކޭތައަށް ނުބަލާތި
- އަވިއައިނު
- ކަލާ ފިލްމު
- މެޑިކަލް އެކްސް-ރޭ ފިލްމު
- ސްމޯކްޑް ގްލާސް
- ފްލޮޕީ ޑިސްކު
އިރުގެ ދޯދިތައް ނުވަތަ ޔޫވީ ރޭޑިއޭޝަންގެ ސަބަބުން ލޮލުގެ ރެޓީނާސްއަށް ގެއްލުންވެ ދާއިމީ ގެއްލުމެއް ނުވަތަ ލޯ އަނދިރިވުން ފަދަ ހިތާމަވެރި ކަމެއް މަދު ސިކުންތުކޮޅަކުންވެސް ދިމާވެދާނެ އެވެ.
އިރުކޭތަ ބެލުން އެކަށީގެންވާ ތަކެތި-- ފޮޓޯ:ޓައިމްއެންޑްޑޭޓް.ކޮމް
އިރުކޭތަ ބަލާނީ މިހެން!
- ޕްރޮޖެކްޓާރސް
- އިކްލިޕްސް އައިނު
- ސޯލާ ފިލްޓާސް
ނާސާއިން ބުނާގޮތުން އިރުކޭތައެއް ބެލުމުގެ އެންމެ ރައްކާތެރި ގޮތަކީ، އިރަށް ސީދާ ބެލުމުގެ ބަދަލުގައި ޕްރޮޖެކްޓް ނުވަތަ ފިލްޓާ ކޮށްގެން ބެލުމެވެ.
ކޮންމެ އަހަރަކުވެސް ގާތްގަނޑަކަށް ދެ އިރުކޭތައެއް ހިފާއިރު، މިއަދު މި ހިފަަނީ އެނިއުލާ ސޯލާ އިކްލިޕްސް އެކެވެ. މިފަދަ އިރުކޭތަތަކުގައި ހަނދުން ފޮރުވިފައި ހުންނާނީ އިރުގެ މެދެވެ. އެއާއިއެކު، ދެން ފެންނަން ހުންނާނީ "ރިންގް އޮފް ފަޔާރ" އެވެ. އެހެން ކިޔެނީ ހަނދުން ނުފޮރުވި ހުންނަ އިރުގެ ބަޔަށެވެ.
މި އިރުކޭތައަށްފަހު ދެން އެންމެ އަވަހަށް އިރުކޭތައެއް ފެންނާނީ އަންނަ އަހަރުގެ ޖޫން މަހުގެ 23 ވަނަ ދުވަހު އެވެ. އެއަށްފަހު 14 ޑިސެމްބަރު 2020 ގައެވެ.