18 Dec 2019, 16:59
ނިއުދިއްލީ (ޑިސެމްބަރު 18) : އިންޑިއާގެ ރަށްވެހި ކަމުގެ ގާނޫނަށް ގެނައި އިސްލާހާ ގުޅިގެން އެގައުމުގެ އެތައް މިލިޔަން މުސްލިމުންގެ ރަށްވެހިކަމުގެ ހައްގު ގެއްލޭ މައްސަލާގައި އެމެރިކާގެ ފާޑުކިޔުންތައް އިންޑިއާއަށް އަމާޒުވެއްޖެ އެވެ.
އެމެރިކާ ޚާރިޖީ ވުޒާރާގެ ތަރުޖަމާން މޯގަން އޮޓޭގަސް ވިދާޅުވީ، އިންޑިއާގެ އާބާދީގައި ހިމެނޭ ބައި މަދު ދީންތަކުގެ މީހުންގެ ހައްގުތައް އިންޑިއާ ސަރުކާރާއި ދައުލަތުގެ މުއައްސަސާތަކުން ހިމާޔަތް ކުރަންޖެހޭނެ ކަމަށާއި އިންސާނީ ހައްގުތަކަށް ވެސް އިންޑިއާ އިން އިހްތިރާމް ކުރަންޖެހޭނެ ކަމުގަ އެވެ. މިގޮތުން އިންޑިއާގެ ގާނޫނު އަސާސީއާއި އިންޑިއާ ބައިވެރިވެފައިވާ އިންސާނީ ހައްގުތަކާ ބެހޭ މުއާހަދާތަކުގެ ތެރެއިން އެ ގައުމުގެ ބައިމަދު ދީންތަކުގެ މީހުންގެ ހައްގުތައް ކަށަވަރުކޮށްދީ، ޑިމޮކްރަސީގެ އަސާސްތަކަށް އިހުތިރާމް ކުރުމަށް އިންޑިއާގެ ކަމާބެހޭ ފަރާތްތަކަށް ގޮވާލާ ކަމަށް އޮޓޭގަސް ވިދާޅުވި އެވެ.
އިންޑިއާގެ ރަށްވެހި ކަމުގެ ގާނޫނަށް ދާދިފަހުން ގެނައި އިސްލާހުގައި އަވަށްޓެރި ޕާކިސްތާނާއި ބަންގްލަދޭޝް އަދި އަފްޣާނިސްތާނުން ގާނޫނާ ހިލާފަށް އިންޑިއާއަށް ހިޖްރަކޮށްފައިވާ މުސްލިމުން ނޫން ދީންތަކުގެ މީހުންނަށް އޮޓަމެޓިކުން އިންޑިއާގެ ރަށްވެހިކަން ދިނުމަށް ހަމަޖެހިފައިވާއިރު އެގޮތަށް ހިޖްރަކޮށްފައިވާ މުސްލިމުންވަނީ އެހައްގުން މަހްރޫމްކޮށްފަ އެވެ. މިމައްސަލާގައި އިންޑިއާ ސަރުކާރާ ދެކޮޅަށް ކުރާ މުޒާހަތާތައް ފުޅާވެ ގިނަ ސަރަހައްދުތަކަށް މުޒާހަރަތައް ފެތުރިފައިވާއިރު މުޒާހަރާތަކުގައި މިހާތަނަށްވަނީ ހަ މީހަކު މަރުވެފަ އެވެ.
އިންޑިއާގައި ކުރަމުން ގެންދާ މުޒާހަރާތައް
އެ ހަމީހުން މަރުވީ އިންޑިއާގެ ފުލުހުން ބާރުގެ ބޭނުން ކުރުމުގެ ސަބަބުން ކަމަށް ޚަބަރުތައް ބުނެ އެވެ. އެމެރިކާ ޚާރިޖީ ވުޒާރާގެ ތަރުޖަމާންގެ ވާހަކާގައި މުޒާހަރާތަކާ ދެކޮޅަށް އިންޑިއާގެ ފުލުހުން ނުބައްދަލުމިންވަރަށް ބާރުގެ ބޭނުންކުރަމުންގެންދާ މައްސަލައަށް ވެސް އިޝާރާތް ކުރެއްވި އެވެ. އަދި ހައްގުތަކަށް ގޮވާލައި އިންޑިއާގައި ކުރަމުން ގެންދާ މުޒާހަރާތައް ވަރަށް ގާތުން ބަލަމުންދާ ކަމަށާއި ސުލްހަވެރިކަމާ އެކު މުޒާހަރާކުރުމުގެ ހައްގާއި ޚިޔާލުފާޅުކުރުމުގެ މިނިވަންކަމުގެ ހައްގަށް އިންޑިއާ ސަރުކާރުން އަރައިގަނެގެން ނުވާނެކަމަށާ އެކަމަށް އިހުތިރާމް ކުރަންޖެހޭނެ ކަމަށް އެމެރިކާގެ ތަރްޖަމާން ވިދާޅުވި އެވެ.
އަނެއްކޮޅުން އިންޑިއާގެ ބޮޑުވަޒީރު ނަރަންދުރަ މޯދީ ވަނީ ރަށްވެހިކަމުގެ ގާނޫނަށް ގެނައި އިސްލާހުގެ ސަބަބުން އިންޑިއާގެ އެއްވެސް ރައްޔިތެއްގެ ހައްގު ނުގެއްލޭކަމަށް ވިދާޅުވެ އެ އިސްލާޙް ދިފާއު ކުރައްވައި ވާހަކަ ދައްކަވާފަ އެވެ. މިގޮތުން އެއިސްލާޙްގައި ހިންދޫންނާއި މުސްލިމުންނާ ކްރިސްޓިއަނުންނާ އަދި ބުދުދީނުގެ މީހުން ތަފާތު ނުކުރާކަމަށާއި އޭގެ ނޭދެވޭ އަސަރު މުސްލިމުންނަށް ނުކުރާނެ ކަމަށް ވިދާޅުވެ މޯދީ ވަނީ އޭނާގެ ޕާޓީ އިސްކޮށް އޮވެގެން އިންޑިއާގެ ޕާލަމެންޓުން ފާސްކުރި އެ ސްލާޙް ދިފާއު ކުރައްވައި ވާހަކަ ދައްކަވާފަ އެވެ.
އަދި މުސްލިމުންނާ މެދު ތަފާތު ނުކުރުމަށާއި މުސްލިމުންގެ ހައްގުތަކަށް ގޮވާލައި ކުރަމުން ގެންދާ މުޒާހަރާތަކުގެ ފަހަތުގައި ވަނީ އިންޑިއާގެ އިދިކޮޅު ފަރާތްތައްކަމަށާ މުޒާހަރާކުރަނީ ސިޔާސީ ބޭނުމެއްގައި ކަމަށް ވެސް މޯދީ ވަނީ ތުހުމަތު ކުރައްވައިފަ އެވެ. މިއީ މިމައްސަލާގައި އިންޑިއާ ސަރުކާރު އޮތީ ގޮތް ދޫނުކުރާ ފަދަ ހަރުކަށި ވިސްނުމެއްގައިކަން ހާމަވެގެންދާކަމެއް ކަމަށް މުރާސިލުން ބުނެ އެވެ. މުޒާހަރާތައް ކުރިޔަށްދާތީ އިންޑިއާ ސަރުކާރުންވަނީ އެގައުމުގެ ބައެއް ސަރަހައްދުތަކުން އިންޓަނެޓްގެ ޚިދްމަތްވެސް ކަނޑާލާފަ އެވެ. ނަމަވެސް މުޒާހަރާތައް ހުއްޓުވުމުގައި އިންޑިއާ ސަރުކާރަށް ކާމިޔާބު ލިބިފައެއް ނުވެ އެވެ. (ނޫސްއެޖެންސީތައް)