16 Dec 2019, 09:07
ޔޫޓީއުބްގެ އެންމެ މަޝްހޫރު އެއް އެކައުންޓް ކަމަށްވާ "ޕިއުޑީޕައި"ގެ ފީލިކްސް އަންނަ އަހަރު ޔޫޓިއުބާ ދުރަށް ދިޔުމަށް ނިންމައިފި އެވެ.
ޕިއުޑީޕައި ދާދިފަހުން އަޕްލޯޑުކުރި ވީޑިއޯއެއްގެ ފަހުކޮޅުގައި ބުނެފައިވަނީ އަންނަ އަހަރުގެ ކުރީކޮޅުގައި ޔޫޓިއުބުން ބްރޭކެއް ނަގަން ނިންމާފައިވާ ކަމަށާއި އެކަން ކުރީބައިގައި ފޭނުންނަށް އަންގާ ކަމަށެވެ.
"އަހަރެން ވަރަށް ވަރަށް ވަރުބަލި ވެއްޖެ. އެއްވެސް މީހަކަށް ބުނަން ނޭނގުނަސް ވަރަށް ވަރުބަލިވެއްޖެ. އަހަރެން ޗުއްޓީއެއް ނަގާނަން އަންނަ އަހަރު. ސަބަބު ފަހުން ބުނާނަން،" ޕިއުޑީޕައިގެ އެންމެ ފަހުގެ ވީޑިއޯގައި ވަނީ ބުނެފައެވެ.
އޭނާ ވަނީ މީގެ ކުރީންވެސް ޔޫޓިއުބުން ޗުއްޓީއެއް ނަގާ ވާހަކަ ދައްކާފައެވެ، އެގޮތުން މިދިޔަ އޯގަސްޓު މަހުގައި އޭނާ ބުނެފައިވަނީ ޗުއްޓީއެއް ނެގުން އޭނާއަށް ރަނގަޅު ވާނެ ކަމަށެވެ.
"ފާއިތުވި 10 އަހަރުގެ ތެރޭގައި އަހަރެންގެ ސިކުނޑީގެ އެންމެ ކުރިއަށް ލައިގެން އުޅުނީ ޔޫޓިއުބް،" އޭނާ ބުންޏެވެ.
އޭނާގެ ހަޔާތުގެ ފަހަތު ސީޓަށް ޔޫޓިއުބް ލާ މޭރުމަކުން ފީލިކްސް ވާހަކަ ދެއްކިއިރު އެ މަހުގައި އޭނާ ވަނީ މަރުޒީއާ ބިސޯނިންއާ ކައިވެނިވެސް ކޮށްފައެވެ.