15 Dec 2019, 18:55
ކޮންމެ ރަށެއްގައި މަދުވެގެން ފަސް ކައުންސިލަރުން ތިބެން ޖެހޭ ގޮތަށް ލާމަރުކަޒީ ގާނޫނަށް ގެނައި އިސްލާހުގެ ސަބަބުން ކައުންސިލަރުންގެ އަދަދު އިތުރުވި ނަމަވެސް، އެއީ ދައުލަތަށް ނުއުފުލޭ ވަރުގެ ބޮޑު ބުރައެއް ނޫންކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހުގެ ދައުވަތަކަށް 200 އަށް ވުރެ ގިނަ ކައުންސިލަރުން ބައިވެރިވެގެން، "ވިޔަވަތި ރާއްޖޭ"ގެ ނަމުގައި މިއަދު ކްރޮސްރޯޑްސްގައި ފެށި މަހާސިންތާގެ ތެރެއިން އެމަނިކުފާނު ޗެއާކުރެއްވި ޕެނަލް ޑިސްކަޝަންގައި ކައުންސިލަރަކު ވަނީ ކައުންސިލަރުންގެ އަދަދު އިތުރު ކުރުމަކީ ދައުލަތަށް ބުރައަކަށް ނުވޭތޯ ސުވާލު ކުރައްވައިފައެވެ.
އެ ސުވާލަށް ޖަވާބު ދެއްވަމުން ރައީސް ވިދާޅުވީ ކައުންސިލަރުންގެ އަދަދު އިތުރުކުރީ ހިސާބުތައް ހެދުމަށްފަހު، އެއީ ދައުލަތަށް އުފުލޭ ވަރުގެ ކަމަކަށް ވާތީ ކަމަށެވެ.
"އެއީ ބުރައެއް ނޫން. އަޅުގަނޑުމެން ހިސާބުކޮށްފައި އެއީ އަޅުގަނޑުމެންނަށް އުފުލޭ ވަރުގެ ކަމަކަށް ވާތީ،" ރައީސް ވިދާޅުވިއެވެ.
ރައީސް ވިދާޅުވީ ކައުންސިލަރުންގެ މުސާރައަށް ދައުލަތުގެ ބަޖެޓުން ހަރަދުކުރަނީ 48 މިލިއަން ރުފިޔާ ކަމަށާއި އެއީ ލާމަރުކަޒު ކުރެވިގެން ރައްޔިތުންނާ ކައިރިން ހިދުމަތްތައް ދިނުމަށް ބޮޑު އަދަދެއް ނޫން ކަމަށެވެ.
ރައީސް ވަނީ ކައުންސިލަރުންގެ މުސާރައަށް ވެސް ހެޔޮ ބަދަލެއް ގެނެސްދެއްވާނެ ކަމަށް މިއަދު ވިދާޅުވެފައެވެ.
މިއަދު ރައީސް ތަސްދީގުކުރެއްވި އިސްލާހުގައިވާ ގޮތުން، އިދާރީ ދާއިރާތަކުގެ ރަށު ކައުންސިލް އެކުލެވިގެންވާނީ އެރަށުން އިންތިހާބު ކުރެވޭ މެމްބަރުންގެ މައްޗަށް ކަމަށާއި މިގޮތުން 3000 މީހުންނަށް ވުރެ ކުޑަ އާބާދީއެއް ހިމެނޭ ކޮންމެ ރަށު ކައުންސިލަކަށް އިންތިހާބު ކުރާނީ ފަސް ކައުންސިލް މެމްބަރުން ކަމަށެވެ. އަދި އެ ފަސް ކައުންސިލަރުންގެ ތެރޭގައި ދެ އަންހެން ކައުންސިލަރުން ތިބުން ލާޒިމް ވާނެއެވެ.
އަދި 3000 މީހުންނަށް ވުރެ އާބާދީ ބޮޑު ރަށްރަށުގެ ރަށު ކައުންސިލް އެކުލެވިގެންވާނީ ހަތް މެމްބަރުންގެ މައްޗަށް ކަމަށެވެ. އަދި އެ ކައުންސިލުތަކުގައި ތިން އަންހެން ކައުންސިލަރުން ތިބުން ވަނީ ލާޒިމް ކޮށްފަ އެވެ.
އަދި 30،000 މީހުންނާއި 60،000 މީހުންނާ ދެމެދުގެ އާބާދީއެއް އޮންނަ ސިޓީ ކައުންސިލްތަކުގައި 13 ކައުންސިލަރުން ތިބެންޖެހޭ އިރު 60،000 އަށް ވުރެ ގިނަ މީހުން ދިރިއުޅޭ ސިޓީތަކުގައި 19 ކައުންސިލަރުން ތިބޭގޮތަށް ލާމަރުކަޒީ ގާނޫނަށް ވަނީ އިސްލާހު ގެނެސްފައެވެ.
އަންނަ އެޕްރީލް ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިހާބުގައި ރަށު ކައުންސިލާއި އަތޮޅު ކައުންސިލު އަދި ސިޓީ ކައުންސިލް ހިމެނޭ ގޮތަށް 980 ކައުންސިލަރުން އިންތިހާބު ކުރެވިގެން ދާނެއެވެ. އެއާއެކު އަންހެނުން ކައުންސިލަރުންނަށް 384 ޖާގަ ކަށަވަރު ވެގެން ދާނެ އެވެ.