08 Dec 2019, 09:02
ރިޔާޒް (ޑިސެމްބަރު 7) : އެމެރިކާގެ ފްލޮރިޑާގެ އަސްކަރީ ބޭހުގައި އިއްޔެ ބަޑިޖަހައި ތިން މީހުން މަރާލި މައްސަލަ ތަހްގީގް ކުރުމުގައި އެމެރިކާގެ ކަމާބެހޭ އިދާރާތަކަށް އެއްބާރުލުން ދިނުމަށް ސައޫދީ އަމަނާބެހޭ ފަރާތްތަކަށް އެގައުމުގެ ރަސްގެފާނު ސަލްމާން ބިން އަބްދުލްއަޒީޒް އަމުރު ކުރައްވައިފިއެވެ.
ސައޫދީ އަމަނާބެހޭ ފަރާތްތަކަށް ސަލްމާން ރަސްގެފާނު ފޮނުއްވި ޝާހީ އަމުރުގައި ފްލޮރިޑާގެ އަސްކަރީ ބޭހުގައި ބަޑިޖަހުމުގެ އަމަލު ހިންގި މީހާއަކީ ސައޫދީ ސަރުކާރުވެސް އަދި ސައޫދީ ރައްޔިތުންވެސް ތަމްޘީލްކުރާ މީހެއް ނޫންކަން ބަޔާން ކުރައްވާފައިވެއެވެ.
ފްލޮރިޑާގެ ޕެންސަކޯލާގައި ހުންނަ އަސްކަރީ ބޭސް ކަަމަށްވާ ނޭވަލް އެއާ ސްޓޭޝަން ގައި އިއްޔެ ބަޑީގެ ހަމަލާތަކެއް ދިނީ އެތަނުގައި ތަމްރީނު ހޯދަމުން ދިޔަ ސައޫދީ ވައިގެ ސިފައިންގެ މީހެއްކަމަށް އެމެރިކާގެ މަސްއޫލުވެރިން ވިދާޅުވެއެވެ. އެ ހާދިސާއާ ގުޅިގެން އެމެރިކާގެ ކަމާބެހޭ ފަރާތްތަކުންވަނީ ގިނަ ސުވާލުތަކެއް އުފައްދާފައެވެ. މިއާއެކު އެމައްސަލާގައި ސައޫދީ މަސްއޫލުވެރިންވަނީ ކަންބޮޑުވެ ވަޑައިގެންފައެވެ.
ސައޫދީ ސިފައިންގެ މީހާ ބަޑިން ހަމަލާތައް ދިނީ އޭނާ ކިޔަވަމުންދިޔަ ކްލާސްރޫމުގެ ތެރޭގައެވެ. އެ ޙާދިސާގައި 3 މީހުން މަރުވެފައިވާއިރު 12 މީހުން ޒަޚަމްވެފައިވެއެވެ. އެ ޙާދިސާގައި ޒަޚަމްވީ މީހުންގެ ތެރެއިން އެކަކު ވަނީ ބަޑިޖެހި ސައޫދީ މީހާގެ ގަޔަށް ބަޑިޖަހައި އޭނާ މަރާލާފައެވެ.
ބަޑީގެ އެ ހާދިސާއާ ގުޅިގެން ސައޫދީ ރަސްގެފާނު ސަލްމާން ބިން އަބްދުލްއަޒީޒް ވަނީ އެމެރިކާގެ ރައީސް ޑޮނަލްޑް ޓްރަމްޕަށް ފޯނުން ގުޅުއްވައި ތައުޒިޔާ ވިދާޅުވެފައެވެ. އެއާއެކު ޓްރަމްޕްވަނީ ސަލްމާން ރަސްގެފާނު އެޖަރީމާ ކުށްވެރިކުރައްވައި، އެކަން ކުރި މީހާއަކީ ސައޫދީ ސަރުކާރު ތަމްސީލުކުރާ މީހެއް ނޫންކަން ޔަގީންކޮށްދެއްވާފައިވާ ކަމަށް ވިދާޅުވެފައެވެ. އަދި އެ ޖަރީމާއާ ގުޅިގެން ސައޫދީ ސަރުކާރާއި ރައްޔިތުން ތިބީ ވަރަށް ބޮޑަށް ރުޅިއައިސްފައިކަންވެސް ޓްރަމްޕްވަނީ ހާމަކުރައްވާފައެވެ.
ފްލޮރިޑާގެ ޕެންސަކޯލާގައި ހުންނަ އަސްކަރީ ބޭހަކީ އެމެރިކާއާ އަސްކަރީ ގޮތުން ގާތްގުޅުންތައް ބައްވާ ގައުމުގެ ތަކުގެ ސިފައިންނަށް މަތީ ފެންވަރުގެ އަސްކަރީ ތަމްރީނުތައް ދޭ ތަނެކެވެ. ކޮންމެ އަހަރަކު އެތަނުން އެތަށް ގައުމެއްގެ އެތަށް ހާސް ސިފައިންނެއް އަސްކަރީ ތަމްރީން ހޯދަމުން ގެންދެއެވެ. (ނޫސްއެޖެންސީތައް)