07 Dec 2019, 13:33
ވައިގެ ދަތުރުފަތުރުގެ އެކްސިޑެންޓުތައް ތަހުގީގުރާނެ ދައުލަތުގެ މިނިވަން މުވައްސަސާއެއް އަންނަ އަހަރުގެ ތެރޭގައި އުފައްދަވާނެ ކަމަށް ޓްރާންސްޕޯޓު އެންޑް ސިވިލްއޭވިއޭޝަން މިނިސްޓަރު އާއިޝަތު ނަހުލާ ވިދާޅުވެއްޖެ އެވެ.
މިއަދު ފާހަގަކުރާ ސިވިލް އޭވިއޭޝަން ދުވަހުގެ މުނާސަބަތުގައި ފޮނުއްވި ހިތޯބުގައި މިނިސްޓަރު ނަހުލާ ވިދާޅުވީ ރާއްޖޭގެ ސިވިލް އޭވިއޭޝަނުގެ ދާއިރާގައި އިސްލާހުކޮށް ޒަމާނީ ކުރަންޖެހޭ ކަންތައްތައް އެބަހުރި ކަމަށާއި، މިކަމުގެ ތެރެއިން އަންނަ އަހަރު ރާއްޖޭގެ ސިވިލް އޭވިއެޝަންގެ ގާނޫނަށް އިސްލާހު ގެނައުމުގެ މަސައްކަތް ކުރެވޭނެ ކަމަށެވެ.
"އިސްލާހު ކުރެވޭ ގާނޫނުގެ ސަބަބުން މި ސިނާއަތް ތަރައްގީކޮށް ކުރިއެރުވުމަށް މިހާރަށްވުރެ ފުރިހަމަ ގާނޫނީ ތަރަހައެއް ގާއިމުކުރެވިގެންދާނެ. އަދި ތަރައްގީވެފައިވާ ގައުމުތަކުގެ އެފަދަ ގާނޫނުތަކުގައި ހުންނަ މިންވަރަށް ސަލާމަތީ މިންގަނޑުތައް ގާއިމްވެގެން ދިޔުމުގެ އިތުރުން، ވައިގެ ދަތުރުފަތުރުގެ އެކްސިޑެންޓުތައް ތަހުގީގު ކުރެވޭނެ ދައުލަތުގެ މިނިވަން މުސްތަގިއްލު އިދާރާއެއް އުފެދިގެންދާނެ،" މިނިސްޓަރުގެ ހިތޯބުގައި ވިދާޅުވެފައިވެ އެވެ.
ޓުރާންސްޕޯޓް މިނިސްޓަރު އާއިޝަތު ނަހުލާ -- ސަން ފޮޓޯ/ އަހުމަދު އަވްޝަން އިލަޔާސް
ފަސިންޖަރުންގެ ހައްގުތައް ރައްކާތެރިކުރުމާ ގުޅޭ ގާނޫނުގެ މަސައްކަތްވެސް އަންނަ އަހަރު ކުރެވިގެންދާނެ ކަމަށާއި މި ސިނާއަތަށް ކުރާ އިތުބާރު ބޮޑުކުރުމަށް އެކުލަވާލާ މި ގާނޫނަށް ހިޔާލު ހުށަހެޅުމުގެ ފުރުސަތު ދާއިރާގެ ފަރާތްތަކަށާއި އާންމުންނަށްވެސް ހުޅުވާލާނެ ކަމަށް މިނިސްޓަރު ނަހުލާ ވިދާޅުވި އެވެ.
މިނިސްޓަރު ވިދާޅުވީ ރާއްޖެ އާއި އެހެން ގައުމުތަކާމެދު ވައިގެ ދަތުރުފަތުރުގެ ގުޅުން ބަދަހިކުރުމަށް މި އަހަރުގެ ތެރޭގައިވެސް ގިނަ މަސައްކަތްތަކެއް ކުރެވިފައިވާ ކަމަށެވެ. އެގޮތުން މިއަހަރުވެސް "އެއާ ސާވިސް އެގްރީމެންޓު"ތައް ގިނަ ގައުމުތަކަކާއެކު އެކުލަވާލެވިފައިވާ ކަމަށާއި މި އެގްރިމެންޓްތަކުގެ ސަބަބުން އެ ގައުމުތަކަށް ވައިގެ މަގުން ދިޔުމުގެ ފުރުސަތު ދިވެހިންނަށް ލިބި، ރާއްޖޭގެ ފަތުރުވެރިކަމަށްވެސް ކުރިއެރުން ލިބޭނެ ކަމަށް މިނިސްޓަރު ވިދާޅުވި އެވެ.
އެއާޕޯޓް، އެރައިވަލް ކައުންޓަރުން ފަތުރުވެރިންގެ ޕާސްޕޯޓް ބަލަނީ -- ސަން ފައިލް ފޮޓޯ/ފަޔާޒު މޫސާ
މިނިސްޓަރު ވިދާޅުވީ ސަރުކާރުން މަސައްކަތްކުރަނީ ވައިގެ މަގުން ރާއްޖެ އަންނަ މީހުންގެ އަދަދު އިތުރުކޮށް އެހެންގައުމުތަކާއެކު އޮންނަ ވައިގެ ދަތުރުފަތުރުގެ ވިއުގަ ފުޅާކުރުމަށް ކަމަށެވެ.
މިނިސްޓަރު ވިދާޅުވީ ވައިގެ ދަތުރުފަތުރުގެ ދާއިރާ އަށް ބޭނުންވާ ފަންނީ މުވައްޒަފުން ނުލިބުމަކީ ދާއިރާ އަށް އޮންނަ ބޮޑު ގޮންޖެހުމެއް ކަމަށާއި މި މައްސަލަ އަށް ހައްލެއް ގެނައުމަށް ބައިނަލްއަގުވާމީ ފެންވަރުގައި ވެސް ގިނަ މަސައްކަތްތަކެއް ކުރެވެމުންދާ ކަމަށެވެ.
މިކަމަށް ހައްލު ގެނައުމަށް އައިކާއޯ އިން "ނެކްސްޓް ޖެނެރޭޝަން އޮފް އޭވިއޭޝަން ޕްރޮފެޝަނަލްސް" ގެ ނަމުގައި ޕްރޮގްރާމެއް ތައާރަފުކޮށްފައިވާކަން ފާހަގަކޮށް މިނިސްޓަރު ވިދާޅުވީ ރާއްޖޭގެ ސިވިލް އޭވިއޭޝަން އޮތޯރިޓީ އިން ތައާރަފުކޮށްފައިވާ "އޭވިއޭޓާސް ނެކްސްޓް ޖެން" ޕްރޮގްރާމުގެ ސްކޯލާޝިޕް ލިބުނު ފަރާތްތަކަށް މިރޭ ސްކޯލާޝިޕް ލިބުނުކަމުގެ ލިޔުން ހަވާލުކުރާނެ ކަމަށެވެ.
އެމްއޭސީއެލް އިން ހިންގާ ވީއައިއޭގައި މަތިންދާބޯޓުތައް ޕާކު ކޮށްފައި -- ފޮޓޯ: އެމްއޭސީއެލް
ރާއްޖޭގެ އޭވިއޭޝަން ދާއިރާ ތަރައްގީވަމުން އަންނަކަން ފާހަގަ ކުރައްވާ މިނިސްޓަރު ވިދާޅުވީ ސިވިލް އޭވިއޭޝަން އޮތޯރިޓީ އިން ޕްލޭންތަކާއި ސިޔާސަތުތައް ކުރިއަށް އޮތްތަނުގައި އެކުލަވާލާނެ ކަމަށެވެ. އަދި މަތީ ފެންވަރުގެ މިންގަނޑުތައް ދެމެހެއްޓުމަށް ސަލާމަތީ ޕްލޭންތައް އެކުލަވާލާނެ ކަމަށާއި މި މަސައްކަތް ކުރާނީ ދާއިރާގެ ފަރާތްތަކުގެ ލަފާއާއި ހިޔާލާ އެކު ކަމަށް މިނިސްޓަރު ވިދާޅުވި އެވެ.
މީގެ އިތުރުން އައިކާއޯގެ ސަލާމަތީ މިންގަނޑުގެ އެސެސްމެންޓުން ރާއްޖެއަށް "މެޗުއާ ސްޓޭޓް" ގެ ދަރަޖަ ލިިބިފައިވާކަން ފާހަގަ ކުރައްވާ މިނިސްޓަރު ނަހުލާ ވިދާޅުވީ ރައްކާތެރިކަމުގެ ދާއިރާއިން އައިކާއޯ އިންދޭ އައިކާއޯ ޢޯޑިޓްގެ މަތީ ދަރަޖައިގެ ސެޓްފިކެޓު ރާއްޖެއަށް ލިބިފައިވާ ކަމަށެވެ.
ރާއްޖޭގެ އެތެރޭގެ އުދުހުންތަކާއި ބައިނަލްއަގުވާމީ އުދުހުންތަކުގެ ދަތުރުވެރިންގެ އަދަދު އިތުރުވަމުންދާކަން ފާހަގަ ކުރައްވާ މިނިސްޓަރު ނަހުލާ ވިދާޅުވީ ސަރުކާރުގެ އަމާޒަކީ މީހުން ދިރިއުޅޭ ކޮންމެ ރަށަކުން ސްޕީޑް ލޯންޗުގައި 30 މިނެޓުން ދެވޭ ރާސްތާގައި އެއާޕޯޓުތައް ގާއިމް ކުރުން ކަމަށެވެ.