05 Dec 2019, 09:45
ބޮލީވުޑްގެ ގިނަ ފިލްމުތަކުން މިހާރު ޖާގަ ހޯދަމުން އަންނަ ކުރިއަރަމުން އަންނަ ބަތަލާ ބޫމީ ޕެޑްނޭކަރު ބިރުވެރި ފިލްމަކަށް ސޮއިކޮށްފި އެވެ.
ބޫމީ މިފަހަރު ސޮއިކުރީ ކަރަން ޖޯހަރުގެ "ދުރުގާވަތީ" އަށެވެ. އެ ފިލްމަކީ ކަރަން އާ ވިކީ ކޯޝަލް އާ ގުޅިގެން ގެނެސްދޭ ފިލްމެކެވެ. އަންނަ މަހު ޝޫޓިން ފަށާ އެ ފިލްމު ރިލީޒްކުރާނީ އަންނަ އަހަރެވެ.
ބޫމީގެ ފުރަތަމަ ބިރުވެރި ފިލްމާ ގުޅިގެން އޭނާ ބުނީ މިފަދަ ފިލްމަކަށް އިންތިޒާރުކުރާތާ ލައްކަ ގިނަ ދުވަސްވެއްޖެ ކަމަށާއި މި ފިލްމަށް ކުރާ އުންމީދު ވަރަށް ބޮޑު ކަމަށެވެ. ފިލްމުގައި އޭނާގެ އެންމެ މޮޅު އެކްޓިން ދެއްކޭތޯ މަސައްކަތްކުރާނެ ކަމަށް ވެސް އޭނާ ބުންޏެވެ.
ބޫމީ މިހާރު ތައްޔާރު ވަމުން އަންނަނީ ހުކުރު ދުވަހު ރިލީޒްކުރާ ޕަތީ ޕަތުނޯ އޯރް ވޯގެ ޕްރިމިއާ އަށެވެ. އެ ފިލްމުގައި ބޫމީގެ އިތުރުން ފެނިގެންދާނީ ކާތިކް އާރްޔަން އާއި އަނަންޔާ ޕާންޑޭ އެވެ.