02 Dec 2019, 09:04
ލަންޑަން (ޑިސެމްބަރު 1) : މި މަހުގެ 12 ވަނަ ދުވަހު ބޭއްވުމަށް ހަމަޖެހިފައިވާ ޔޫކޭގެ އާންމު އިންތިހާބު ކާމިޔާބު ކުރެވިއްޖެނަމަ ޔޫކޭއިން ސައުދީ އަރަބިއްޔާއަށް ހަތިޔާރު ވިއްކުން ހުއްޓުމަކަށް ގެންނާނެ ކަމަށް އިނގިރޭސި އިދިކޮޅު ލީޑަރު ޖެރެމީ ކޯބިން ވިދާޅުވެއްޖެ އެވެ.
އިނގިރޭސި އިދިކޮޅު ޕާޓީގެ ލީޑަރު ކޯބިން ވިދާޅުވީ ސައުދީން ޔަމަނަށް ހަމަލާދީ އާންމުން މަރަމުން ގެންދާއިރު ސައުދީއަށް ހަތިޔާރު ވިއްކުމަކީ އިނިރޭސިވިލާތް ލަދުގަންނަންޖެހޭ ވަރުގެ ކަމެއް ކަމަށާއި ނަމަވެސް ކޮންޒަވޭޓިވް ޕާޓީގެ ވެރިކަމުގައި ގެންދަނީ ސައުދީއަށް ވިއްކެން އޮތް މިންވަރަކަށް ހަތިޔާރު ވިއްކަމުން ކަމަށެވެ.
ޔޫކޭގެ އުތުރުގެ ސިޓީއެއްކަމަށްވާ ޔޯކްގައި ވާހަކަ ދައްކަވަމުން ކޯބިން ވިދާޅުވީ ލޭބާ ޕާޓީގެ ވެރިކަމެއްގައި ސައޫދީއަށް ހަތިޔާރު ވިއްކި ނަމަވެސް ވިއްކާނީ އެ ހަތިޔާރުން ޔަމަނަށް ހަމަލާ ނުދިނުން ޝަރުތުކޮށްފައި ކަމަށެވެ. އަދި އެ ޝަރުތާ ހިލާފުވެއްޖެނަމަ ސައުދީއަށް ހަތިޔާރު ވިއްކުން އެއްކޮށް ހުއްޓާލަން ފަސް ނުޖެހޭނެ ކަމަށް ވެސް ވިދާޅުވި އެވެ.
ލޭބާ ޕާޓީގެ ވެރިކަމެއްގައި ސައުދީގެ އިތުރުން އިސްރާއީލަށްވެސް ހަތިޔާރު ނުވިއްކާނެ ކަމަށާއި އިސްރާއީލަށް ވިއްކާ ހަތިޔާރުގެ ބޮޑު ބައެއްވެސް ބޭނުންކުރަނީ ފަލަސްތީނުގެ އާންމުންނާ ދެކޮޅަށްކަން ކޯބިން ފާހަގަކުރެއްވި އެވެ.
ކޯބިން ވިދާޅުވީ ކޮންޒަވޭޓިން ޕާޓީގެ ވެރިކަމުގައި ޔޫކޭއަކީ ދުނިޔޭގެ އެކި ތަންތަނުގައި ހިނގާ ހަނގުރާމަތައް އުފައްދަން މަސައްކަތްކުރާ، އަދި ހަނގުރާމަތަކުގައި ބޭނުންކުރާ ހަތިޔާރު ވިއްކައި އެއިން ނަފާ ހޯސމުން ދިޔަ ގައުމެއްގެ ގޮތުގައި ސިފަކުރެވުނު ކަމަށެވެ. އަދި އެއީ އިންސާނިއްޔަތާ ހިލާފު އަމަލަކަށް ވުމުގެ އިތުރުން އެއީ އިނގިރޭސި ރައްޔިތުން ގަބޫލުކުރާ އިންސާނީ ހައްގުތަކާ މިންގަނޑުތަކާ ފުށުއަރާ ކަމެއް ކަމަށްވެސް އޭނާ ވިދާޅުވި އެވެ.
އޭނާ އަދި ވިދާޅުވީ ލޭބާގެ ވެރިކަމެއްގައި މަސައްކަތްކުރާނީ ދުނިޔޭގެ ކަންކޮޅުތަކުގައި ހަނގުރާމައާއި ތަޅާފޮޅުން އުފެދުނަ ނުދީ ސުލްހަ ގާއިމުކުރަން ކަމަށާއި، އެކަމަށްޓަކައި 400 މިލިއަން ޕައުންޑުގެ މައްޗަށް އެކުލެވޭ ފަންޑެއް އުފެއްދުންވެސް ލޭބާ ޕާޓީގެ އެޖެންޑާގައި ހިމަނާފައި ވާނެ ކަމަށެވެ. އަދި އެ ފަންޑުގެ ބޭނުމަކީ ހަނގުރާމަ އުފެދުނަ ނުދިނުމަށްޓަކައި ދުނިޔޭގެ ބައެއް ގައުމުތަކުގައި އިންވެސްޓުކޮށް، އެ ގައުމުތަކުގެ އިގްތިސާދު ރަނގަޅުކުރުން ކަމަށް ކޯބިން ވިދާޅުވި އެވެ.
ކޯބިން މިހެން ވިދާޅުވި ނަމަވެސް، ހިޔާލު ހޯދުމުގެ ސާވޭތަކުން ދައްކާ ގޮތުން މި މަހު އޮންނަ އާންމު އިންތިހާބު ބޮޑު އަގުލަބިއްޔަތަކުން ކާމިޔާބުކުރާނީ ކޮންޒަވޭޓިވް ޕާޓީންނެވެ.
އާންމު ހިޔާލު ހޯދުމުގެ ސާވޭތައް ކުރާ މަޝްހޫރު ޔޫގޯވް ފައުންޑޭޝަނުން ދާދިފަހުން ކުރި އާންމު ހިޔާލު ހޯދުމުގެ ސާވޭ ގެ ނަތީޖާ ދައްކާގޮތުން ޔޫކޭގެ އާންމު އިންތިހާބުގައި ކޮންޒަވެޓިވް ޕާޓީން ހައުސް އޮފް ކޮމަންސްގެ 650 ގޮނޑީގެ ތެރެއިން މަދުވެގެން 359 ކާމިޔާބުކުރާނެ އެވެ. އެ އިންތިހާބުގައި އިދިކޮޅު ލޭބާ ޕާޓީއަށް ކާމިޔާބު ކުރެވޭނެކަމަށް ލަފާކުރެވިފައިވަނީ 250 ނޫނީ 260 ވަރަކަށް ގޮނޑި އެވެ.
ކޮންޒަވެޓިވް ޕާޓީން ހައުސް އޮފް ކޮމަންސްގެ 359 ގޮނޑި ކާމިޔާބުކޮށްފިނަމަ އެކަން ވެގެންދާނީ އެ ޕާޓީގެ ލީޑަރުގެ ގޮތުގައި ދަގަނޑު އަންހެނާ ގެ ނަމުން މަޝްހޫރު މާގްރެޓް ތެޗާ ހުންނެވިއިރު ތެޗާ ގެ ބޮޑުވަޒީރު ކަމުގެ ދެވަނަ ދައުރުގައި 1987 ގެ އިންތިޚާބުގައި ކޮންޒަވެޓިވް ޕާޓީން ހޯދި އާދަޔާ ޚިލާފު ކާމިޔާބަށްފަހު އެޕާޓީއަށް ލިބިގެންދާނެ އެންމެ ބޮޑު ކާމިޔާބީ ކަމުގައެވެ. (ނޫސްއެޖެންސީތައް)