29 Nov 2019, 07:49
ގިނަ ބައެއްގެ މެދުގައި މަގުބޫލުކަމެއް ހޯދަމުން އައި ހޮލީވުޑް އަދި ޓައިވަނީސް އެކްޓަރު ގޮޑްފްރޭ ގައޯ ކުއްލިގޮތަކަށް މަރުވެއްޖެ އެވެ.
އުމުރުން 35 އަހަރުގައި ގޮޑްފްރޭ ކުއްލި ގޮތަކަށް މަރުވެފައިވަނީ ހާޓް އެޓޭކް އެއް ޖެހިގެން ކަމަށް އޭނާގެ އޭޖެންސީން ވަނީ ބުނެފަ އެވެ.
އެ އޭޖެންސީން ބުނެފައި ވަނީ އޭނާއަށް ހާޓް އެޓޭކް ޖެހިފައި ވަނީ ރިއޭލިޓީ ޓީވީ ޝޯއެއްގެ ޝޫޓިން ތެރެއިން ކަމަށެވެ.
ޝޯގެ ޝޫޓިންގެ ތެރެއިން ހާޓް އެޓޭކް ޖެހިގެން އޭނާ ވަގުތުން ހޮސްޕިޓަލަށް ގެންގޮސްފައިވެ އެވެ. އޭނާ މަރުވެފައި ވަނީ ހޮސްޕިޓަލަށް ގެންދިޔުމުގެ ތިން ގަޑިއިރުގެ ފަހުން އެތަނުގަ އެވެ.
"ޗޭސް މީ" ނަމަކަށް ކިޔާ ޝޯގެ ޕްރޮޑިއުސަރު ބުނެފައި ވަނީ ގޮޑްފްރޭގެ މަރާ ގުޅިގެން ހުރިހާ ބައިވެރިން ވެސް ވަރަށް ހިތާމަކުރާ ކަމަށެވެ. އަދި އޭނާ އަކީ ހުރިހާ އެންމެންގެ ލޯބި ލިބިފައިވާ ފަންނާނެ ކަމަށް ވެސް އޭނާ ބުންޏެވެ.
ގޮޑްފްރޭ އަކީ ހޮލީވުޑްގެ އޭލިސްޓުންނާއެކު ވެސް މަސައްކަތް ކޮށްފައިވާ ފަންނާނެކެވެ. އޭނާގެ ފާހަގަކޮށްލެވޭ ފިލްމުތަކުގެ ތެރޭގައި "މޯޓަލް އިންސްޓްރުމެންޓްސް: ސިޓީ އޮފް ބޯންސް" އާއި "ޝަންގާއި ފޯޓްރެސް" އަދި "މިން އެންޑް މެކްސް" ހިމެނެ އެވެ.