27 Nov 2019, 10:25
މިއަދުގެ ރައްޔިތުންގެ މަޖިލީހުގެ ޖަލްސާއަށް، ކެންދޫ ދާއިރާގެ މެމްބަރު އަލީ ހުސައިން ހާޒިރުނުވުމުން، މަޖިލީހުގައި އެންވަޔަރަމެންޓް މިނިސްޓަރު ހުސައިން ރަޝީދު ހަސަން އާ މިއަދު ސުވާލު ނުކޮށް، މިނިސްޓަރު މަޖިލީހުން ފޮނުވާލަން ޖެހިއްޖެ އެވެ.
މިނިސްޓަރާ ސުވާލުކުރަން ހުށަހެޅުއްވީ ކެންދޫ ދާއިރާގެ މެމްބަރެވެ. ކެންދޫ ދާއިރާގެ މެމްބަރު އަލީ ހުސައިން މިނިސްޓަރާ ކުރައްވަން ހުށަހެޅުއްވި ސުވާލަކީ ބ. ކެންދޫ، ދަރަވަންދޫ އަދި ކަމަދޫގެ ފެނާއި ނަރުދަމާގެ ޕްރޮޖެކްޓަކީ މި އަހަރުގެ ބަޖެޓުގައި ހިމެނިފައިވާ މަސައްކަތްތަކަކަށް ވާތީ އެ މަސައްކަތްތައް ފެށޭނީ ކޮން ތާރީހެއްގައިތޯ ބެލުމަށެވެ.
ރައްޔިތުންގެ މަޖިލީހުގެ ގަވާއިދުގައިވާ ގޮތުން، މެމްބަރަކަށް ވަޒީރަކާ ސުވާލު ކުރެވޭނީ، އެ ވަޒީރަކާ ކުރަން ބޭނުންވާ ސުވާލުގެ
ނޯޓިސް މަޖިލީހުގެ ރައީސް މެދުވެރިކޮށް، އެ ވަޒީރަކަށް ލިޔުމުން ފޮނުވައި، 14 ދުވަހުގެ މުއްދަތު އެ ނޯޓިހުގެ ތާރީހުން ފެށިގެން ދިނުމަށް ފަހު، މަޖިލީހުގެ ޖަލްސާއެއްގަ އެވެ.
މިއަދުގެ ޖަލްސާ ފެށި އިރު، މިނިސްޓަރު މަޖިލީހުގެ ތަޅުމަށް ހާޒިރުވެވަޑައިގެން އިންނެވި ނަމަވެސް، މެމްބަރު އަލީ ހުސައިން ހާޒިރުވެފައެއް ނުވެ އެވެ.
އެހެންކަމުން މަޖިލީހުގެ ރައީސް މުހައްމަދު ނަޝީދު ވަނީ އަލީ ހުސައިން ވީތަނެއް ހޯދައިދިނުމަށް ސާޖަންޓް އެޓް އާމްސް އަށް ދަންނަވައިފަ އެވެ.
ނަޝީދު ވަނީ މެމްބަރު އަލީ ހުސައިން ވަޑައިނުގެންފި ނަމަ ބ. އަތޮޅުގެ އެހެން މެމްބަރަކަށް ވެސް މިނިސްޓަރާ އެ ސުވާލު ކުރެއްވޭނެ ގޮތެއް ވޭތޯ ބައްލަވައިފަ އެވެ.
"އަމީންއާންމު ވިދާޅުވަނީ އެއީ އެކަން އޮތް ގޮތެއް ނޫނޭ،" ނަޝީދު ވިދާޅުވި އެވެ.
ނަޝީދު ވިދާޅުވީ މަޖިލީހުގެ ގަވާއިދު އޮންނަ ގޮތުން، ސުވާލު ކުރަން ހުށަހެޅުއްވި މެމްބަރު ޖަލްސާއަށް ހާޒިރުނުވެއްޖެ ނަމަ، އެޖެންޑާގެ އެ އައިޓަމް ކުރިއަށް ނުގެންދެވޭނެ ކަމަށެވެ. އަދި ހުށަހެޅިފައިވާ ސުވާލުނުކޮށް، އިތުރު ސުވާލުގެ ފުރުސަތު ވެސް ދެވެން ނޯންނާނެ ކަމަށެވެ.
މެމްބަރު އަލީ ހުސައިން ހާޒިރުނުވުމުގެ ސަބަބުން، މިނިސްޓްރީގެ މަސައްކަތްތައް މަޖިލީހަށާއި އާންމު ރައްޔިތުންނަށް ވެސް އަންގައިދިނުމަށް މިނިސްޓަރަށް ލިބިވަޑައިގެންނެވި ރަނުގެ ފުރުސަތެއް ގެއްލިގެން ދިޔަ ކަން ނަޝީދު ވަނީ ފާހަގަކުރައްވައިފަ އެވެ.
ނަޝީދު ވަނީ މެމްބަރު އަލީ ހުސައިން ޖަލްސާއަށް ހާޒިރުވޭތޯ، އެޖެންޑާގެ ދެވަނަ އައިޓަމަށް ނުގޮސް ކުޑަ ވަގުތުކޮޅަކަށް މަޑުކޮށްލައިފަ އެވެ. ނަމަވެސް އަލީ ހުސައިން ހާޒިރުނުވުމުން، މިނިސްޓަރު ވަނީ ޖަލްސާ ދޫކުރައްވައި ނުކުމެވަޑައިގެންފަ އެވެ.
މިއީ ސުވާލު ހުށަހެޅުއްވި މެމްބަރު ހާޒިރުނުވެގެން، 19 ވަނަ ރައްޔިތުންގެ މަޖިލީހުގައި ވަޒީރަކާ ސުވާލުނުކޮށް ފޮނުވާލަން ޖެހުނު ފުރަތަމަ ފަހަރެވެ.