17 Nov 2019, 15:41
ވަޒީފާ ދޭ ފަރާތްތަކާއި ވަޒީފާ ހޯދާ ފަރާތްތައް ގުޅުވާލަދޭޖޮބްސެންޓާޕޯޓަލް އިކޮނޮމިކް މިނިސްޓްރީއިން މިއަދު އިފްތިތާހުކޮށްފި އެވެ.
އެކަމަށްޓަކައި މިއަދު ހޮޓެލް ޖެންގައި ބޭއްވި ރަސްމިއްޔާތުގައި އެ ޕޯޓަލް އިފްތިތާހު ކޮށްދެއްވީ ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަން އެވެ.
ޖޮބްސެންޓަރ ޕޯޓަލް އިފްތިތާހު ކުރުމަށް ބޭއްވި ރަސްމިއްޔާތުގެ ތެރެއިން-- ފޮޓޯ/އިކޮނޮމިކް މިނިސްޓްރީ
އެ ރަސްމިއްޔާތުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ބައެއް ވަޒީރުންނާއި އިސް ބޭބޭފުޅުން ވަނީ ބައިވެރިވެވަޑައިގެންފަ އެވެ.
އެ ރަސްމިއްޔާތުގައި ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ވިދާޅުވީ، މި ޕޯޓަލް މެދުވެރިކޮށް ދިވެހި ޒުވާނުންނަށް ވަޒީފާގެ ގިނަ ފުރުސަތުތަކާ ބެހޭ މައުލޫމާތު ފަސޭހައިން ބަލާލެވޭނެ ކަމަށެވެ.
ހަޔަރ އެޑިއުކޭޝަން މިނިސްޓަރު ޑރ. އިބްރާހީމް ހަސަން-- ފޮޓޯ/ އިކޮނޮމިކް މިނިސްޓްރީ
"ވަޒީފާ އިސްތިހާރު ކުރުމާއި ވަޒީފާއަށް ކުރިމަތިލުމުގެ ސަގާފަތް މިވަނީ ވަރަށް ބޮޑަށް ބަދަލުވެފައި... ޖޮބްސެންޓަރަކީ މިއަދުގެ މާހައުލަށް ވަރަށް އެކަށީގެންވާ، ވަރަށް ފުރިހަމައަށް ބައްޓަންކޮށްފައިވާ ޕްލެޓްފޯމެއް ކަމަށް އަޅުގަނޑު ގަބޫލުކުރަން." މިނިސްޓަރު ވިދާޅުވި އެވެ.
ޖޮބްސެންޓާޕޯޓަލް ފަރުމާކޮށްފައިވަނީ ވަޒީފާ ހޯދާ ފަރާތްތަކަށް ވަޒީފާގެ ބާޒާތުގައި ހުރި ފުރުސަތުތަކުގެ މައުލޫމާތު ފަަސޭހައިން ބަލާލެވޭ ގޮތަށެވެ.
ޖޮބްސެންޓަރ ޕޯޓަލް--
އެގޮތުން ވަޒީފާ ހޯދާ ފަރާތްތަކުން ޕޯޓަލްގައި ރަޖިސްޓްރީ ކުރުމަށްފަހު އެ ފަރާތްތަކުގެ ތައުލީމީ ފެންވަރާއި މަސައްކަތުގެ ތަޖުރިބާ އަދި ޝައުގުވެރިވާ ދާއިރާތަކާ ގުޅޭ މައުލޫމާތު ހިމަނާލުމުން، އެ ފަރާތްތަކާ އެންމެ ގުޅޭ ފުރުސަތުތައް އެކައުންޓުން ފެންނާނެ އެވެ. އަދި އެ ފުރުސަތުތަކާ ގުޅޭ މައުލޫމާތު އެސްއެމްއެސް އާއި އީމެއިލް މެދުވެރިކޮށް ވެސް އެ ފަރާތްތަކަށް ލިބޭނެ އެވެ.
މީގެ އިތުރުން ވަކިވަކި ސިނާއަތްތަކުންނާއި ރާއްޖޭގެ ވަކި ސަރަހައްދަކުން ވަޒީފާ ހޯދާ ފަރާތްތަކަށް ބޭނުންވާ މައުލޫމާތު ވެސް އެ ޕޯޓަލްއިން ލިބިގެންދާނެ އެވެ.
ވަޒީފާ ދޭ ފަރާތްތަކުން މި ޕޯޓަލްގައި ރަޖިސްޓްރީ ކުރުމުން އެކުންފުނިތަކުން ބޭނުންވާ ހުނަރުތައް ހުރި ފަރާތްތައް، އެ ޕޯޓަލްގައި ރަޖިސްޓްރީކޮށްފައިވާ ވަޒީފާ ހޯދާ ފަރާތްތަކުގެ ތެރެއިން ބަލާލެވޭނެ އެވެ.
އެ ޕޯޓަލްގައި ރަޖިސްޓްރީ ކުރުމުގެ ފުރުސަތު ވަޒީފާ ދޭ އެންމެހާ ފަރާތްތަކަށް ހުޅުވާލާފައިވާއިރު، އެ ޕޯޓަލް ހިންގުމަށްޓަކައި އިކޮނޮމިކް މިނިސްޓްރީން ވަނީ އެކަމަށް ވަކިން ޑިޕާޓްމަންޓެއް ކަނޑައަޅާފަ އެވެ.