16 Nov 2019, 06:45
ސްރީލަންކާއަށް އާ ރައީސަކު ހޮވުމަށްޓަކައި ބާއްވާ އެގައުމުގެ އަށްވަނަަ ރިޔާސީ އިންތިހާބުގެ ވޯޓުލުން ފަށައިފިއެވެ.
މިއަދު ހެނދުނު ލަންކާ ގަޑިން 7:00 ޖެހި އިރު (ރާއްޖެ ގަޑިން 6:30 ގައި) ވޯޓުލާ މަރުކަޒުތައް ހުޅުވި އިރު، މި އިންތިހާބުގައި 15.9 މިލިއަން މީހުންނަށް ވޯޓުލުމުގެ ހައްގު ލިބިގެން ވެއެވެ. އަދި މި އިންތިހާބުގައި ލަންކާގެ އެކި ހިސާބުތަކުގައި ވޯޓުލާ 12،845 މަރުކަޒު ގާއިމުކޮށްފައިވާކަމަށް ލަންކާގެ އިލެކްޝަންސް ކޮމިޝަނުން ބުނެއެވެ.
ވޯޓުފޮށިތައް ބަންދުކުރާ ގަޑިއަކީ ސްރީލަންކާ ގަޑިން މިއަދު ހަވީރު 5:00 އެވެ. އެއީ ރާއްޖެ ގަޑިން ހަވީރު 4:30 އެވެ.
މިއަދުގެ އިންތިހާބުގައި 35 ކެންޑިޑޭޓަކު ރައީސްކަމަށް ވާދަކުރެއެވެ. މިއީ މިހާތަނަށް ލަންކާގެ ރިޔާސީ އިންތިހާބުގައި އެންމެ ގިނަ ކެންޑިޑޭޓުން ވާދަކުރާ ފަހަަރެވެ. އަދި 35 ކެންޑިޑޭޓުންގެ ނަންތައް ލިސްޓުކޮށްފައި ހެދި ވޯޓު ކަރުދާހުގެ ދިގުމިނުގައި 26 އިންޗި ހުންނަކަމަށް ލަންކާގެ އިލެކްޝަންސް ކޮމިޝަނާ ހަވާލައިދީ މީޑިއާ ރިޕޯޓުތައް ބުނެއެވެ.
މިއަދު ކުރިއަށްދާ އިންތިހާބުގައި ވާދަކުރަނީ މުޅިންވެސް "އާ" ކެންޑިޑޭޓުންނެވެ--ކުރީގައި ރައީސްކަން ކުރައްވާފައިވާ އެއްވެސް ބޭފުޅަކު ވާދައެއް ނުކުރައްވައެވެ. އަދި ލަންކާގެ މިހާރުގެ ރައީސް މައިތުރިޕާލަ ސިރިސޭނާވެސް ދެވަނަ ދައުރަކަށް ވާދައެއް ނުކުރައްވައެވެ.
އިންތިހާބުގައި އެންމެ ވާދަވެރި ތިން ކެންޑިޑޭޓުންނަކީ ކުރީގެ ރައީސް މަހިންދަ ރާޖަޕަކްސަގެ ޕޮޑުޖަނަ ޕާޓީ (އެސްއެލްޕީޕީ)ގެ ކެންޑިޑޭޓު އަދި އެމަނިކުފާނުގެ ކޮއްކޯފުޅު ގޯޓާބަޔަ ރާޖަޕަކްސައާއި، ބޮޑުވަޒީރު ރަނިލް ވިކްރަމަސިންހަގެ ޔުނައިޓެޑް ނޭޝަނަލް ޕާޓީގެ ކެންޑިޑޭޓު އަދި އެގައުމުގެ ހައުސިންގް މިނިސްޓަރު ސަޖިތު ޕްރޭމަދާސައާއި އަދި އެގައުމުގެ ކޮމިއުނިސްޓް (މާކްސިސްޓް-ލެނިނިސްޓް) ފިކުރުގެ ޕާޓީއެއް ކަމުގައިވާ ޖަނަތާ ވިމުކްތި ޕެރަމުނަ (ޖޭވީޕީ)ގެ ލީޑަރު އަދި ކެންޑިޑޭޓު އަނޫރަ ކުމާރަ ޑިސާނާޔަކަ (އޭކޭޑީ)އެވެ.
މި އިންތިހާބުގައި ވާދަކުރައްވަނީ އެންމެ އަންހެން ކެންޑިޑޭޓެކެވެ. އެއީ ސޯޝަލިސްޓް ޕާޓީ އޮފް ސްރީލަަންކާގެ ފަރާތުން ވާދަކުރާ ޑރ. އަޖަންތާ ޕެރޭރާއެވެ. އޭނާއަކީ ސައިންސްވެރިއަކާއި ތިމާވެށީގެ އެކްޓިވިސްޓެއްގެ އިތުރުން ލަންކާގައި ކުނި މެނޭޖުކުރުމަށްޓަކައި ރީސައިކަލްކުރުމުގެ ގައުމީ ޕްރޮގްރާމެއް ފެއްޓެވި މީހެކެވެ. ސްރީލަންކާގެ ރައީސްކަމަށް އަންހެނަކު މިފަހަރު ވާދަކުރައްވަނީ 20 އަހަރުގެ މެދުކެނޑުމަކަށްފަހުއެވެ.
ސްރީލަންކާގެ ސިޔާސީ މަސްރަހަކީ އަބަދުވެސް ދެ ފިކުރަކުން ޑޮމިނޭޓުކުރާ މަސްރަހެއްކަމުން، މީގެ ކުރިން އަބަދުވެސް ރިޔާސީ އިންތިހާބުގައި ވާދަވެރިކޮށް ފެންނަނީ ބޮޑުވަޒީރު ރަނިލް ވިކްރަމަސިންހައާއި ކުރީގެ ރައީސް މަހިންދަ ރާޖަޕަކްސަ ތާއީދުކުރައްވާ ކޮޅަކުންނެވެ. ނަމަވެސް މި އިންތިހާބުގައި މި ދެ ފިކުރުގެ އިތުރުން ޖޭވީޕީގެ ކެންޑިޑޭޓުވެސް "ގަދަކޮށް" ފެންނާތީ އެއްވެސް ކެންޑިޑޭޓަކަށް 50 ޕަސަންޓު ވޯޓު ލިބޭނެކަމަށް ނުބެލެވެއެވެ.
ސްރީލަންކާގައި ވޯޓުލަނީ ޕްރިފަރެންޝަލް ސިސްޓަމް ނުވަތަ އިސްކަންދޭ ތަރުތީބެއް ޖެހުމުގެ ނިޒާމުން ކަމަށް ވެފައި، އެއްވެސް ކެންޑިޑޭޓަކަށް 50 ޕަސަންޓު ރައްޔިތުންގެ "އެންމެ އިސްކަން" ނުލިބިދާނެކަމަށް ބެލެވޭތީ، ދެވަނައަށް އަދި ތިންވަނައަށް އެންމެ އިސްކަން ދީފައި ހުރި ވޯޓުތައްވެސް ގުނާނެކަށް ވަރަށް ބޮޑަށް ބެލެވެއެވެ.