15 Nov 2019, 17:04
ރާއްޖޭގެ އިމާމުންނަށް މޮރޮކޯގެ އިންސްޓިޓިއުޓުތަކުން ތަމްރީންކުރުމަށް ފުރުސަތުތައް ފަހިކުރުމަށް ފޮރިން މިނިސްޓަރު އަބްދުﷲ ޝާހިދާއި މޮރޮކޯގެ އެންޑައުމެންޓް އެންޑް އިސްލާމިކް އެފެއާސް މިނިސްޓަރު އަހުމަދު ތައުފީގު މަޝްވަރާކުރައްވައިފިއެވެ.
މޮރޮކޯއަށް ކުރައްވާ ރަސްމީ ދަތުރުފުޅެއްގައި މިނިސްޓަރު ޝާހިދު ވަނީ މިއަދު އެ ގައުމުގެ އިސްލާމިކް މިނިސްޓަރާ ބައްދަލުކުރައްވާފައެވެ.
މިއަދުގެ ބައްދަލުވުމުގައި މިނިސްޓަރު ޝާހިދު ވަނީ މޮރޮކޯގައި އިސްލާމްދީނާ ގުޅޭގޮތުން ހޭލުންތެރިކުރެއްވުމަށް ކުރިއަށް ގެންދާ މަސައްކަތްތަކަށް ތައުރީފުކުރައްވާފައެވެ.
ދީނުގެ އަސާސްތައް އިޔާދަކުރުމަށްޓަކައި ދެގައުމުން ގުޅިގެން މަސައްކަތް ކުރުމާ ގުޅޭގޮތުން މިނިސްޓަރު ޝާހިދާއި މިނިސްޓަރު ތައުފީގު ވަނީ މަޝްވަރާކުރައްވާފައެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ މިނިސްޓަރު ކުރައްވާ ދަތުރުފުޅުގައި ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ޚަލީލާއި ރާއްޖެއިން ޔުނައިޓެޑް އަރަބް އެމިރޭޓް (ޔޫއޭއީ)އަށް ކަނޑައަޅުއްވާ ހުންނަވާ ސަފީރު ޑރ. ހުސައިން ނިޔާޒާއި މިނިސްޓްރީގެ އެޑިޝަނަލް ސެކްރެޓަރީ އަހުމަދު ޝިއާން އަދި މިނިސްޓްރީގެ އެސިސްޓަންޓް ޑިރެކްޓަރު މޫމިނާ އިބްރާހިމް ބައިވެރިވެވަޑައިންނަވާފައިވާ ކަމަށެވެ.