09 Nov 2019, 12:43
ރާއްޖޭގެ ރަށްރަށުގެ ބިން ހިއްކުމަށް އަންނަ އަހަރުގެ ބަޖެޓުގައި 954.5 މިލިއަން ރުފިޔާ ހިމަނައިފި އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުގެ ޕީއެސްއައިޕީ ގެ ތެރެއިން އެންމެ ބޮޑު އަދަދެއް ކަނޑައަޅާފައިވާ އެއް ބަޔަކީވެސް ބިން ހިއްކުމުގެ މަޝްރޫއުތަކަށް ކަނޑައަޅާފައިވާ ބަޖެޓެވެ.
މީގެ ތެރޭގައި ނެދަލޭންޑްސްގެ އައިއެންޖީ ބޭންކުގެ ލޯނު އެހީގައި ރާއްޖޭގެ އެކި ރަށްތަކުގެ ބިން ހިއްކުމުގެ މަޝްރޫއުތަކަށް 949 މިލިއަން ރުފިޔާ ވަނީ ބަޖެޓުކޮށްފަ އެވެ. އަދި އިތުރު 12 ރަށެއްގެ ބިން ހިއްކުމަށް 244.1 މިލިއަން ރުފިޔާ ބަޖެޓުގައި ހިމަނާފައިވެ އެވެ.
ޕްލޭނިން އެންޑް އިންފްރާސްޓްރަކްޗާ މިނިސްޓަރު މުހައްމަދު އަސްލަމް މީގެ ކުރިން ވިދާޅުވެފައިވަނީ ސަރުކާރުން އަމާޒު ހިފާފައިވަނީ ރާއްޖޭގެ ހުރިހާ ރަށެއްގެ ބިން ހިއްކުމުގެ މަސައްކަތް އެއްބުރުން ނިންމާލުމަށް ކަމަށެވެ.
ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަ ދައްކަވަމުން މިނިސްޓަރު ވިދާޅުވީ އެ މަޝްރޫއާ ގުޅޭގޮތުން، ދުނިޔޭގައި އެންމެ ރަނގަޅަށް ބިން ހިއްކުމުގެ މަސައްކަތްކުރާ ކުންފުންޏަކާއެކު ވާހަކަދައްކަމުން އަންނަ ކަމަށެވެ.
ގުޅީފަޅު ޕޯޓުގެ މަސައްކަތް ކުރުމަށް ބޭނުންވާ ބިން ހިއްކުމުގެ މަސައްކަތް މިހާރު ވަނީ ނެދަލެންޑްސްގެ ބޮސްކާލިސް ވެސްޓްމިނިސްޓާ ކުންފުންޏާ ހަވާލުކޮށްފަ އެވެ. އެ މަޝްރޫއަކީވެސް ނެދަލޭންޑްސްގެ އައިއެންޖީ ބޭންކުގެ ލޯނު އެހީގައި ކުރިއަށްގެންދަން ނިންމާފައިވާ މަޝްރޫއެކެވެ.
މާލޭގެ ކޮމާޝަލް ޕޯޓު ގުޅީފަޅަށް ބަދަލުކުރުމަށް 247 މިލިއަން ރުފިޔާ ކަނޑައަޅާފައިވާއިރު މި މަސް ނިމުމުގެ ކުރިން ގުޅީފަޅު ބިން ހިއްކުމުގެ މަސައްކަތް ފަށާނެ ކަމަށް ސަރުކާރުން ވަނީ ބުނެފައެވެ. ގުޅީފަޅު ބިން ހިއްކުމުގެ މަސައްކަތް ހަވާލުކޮށްފައިވަނީ 53 މިލިއަން ޑޮލަރަށެވެ.