05 Nov 2019, 13:39
2020 ވަނަ އަހަރަށް ލަފާކުރާ ބަޖެޓުގައި ކައުންސިލްތަކަށް ހިލޭ އެހީގެ ގޮތުގައި 1.6 ބިލިއަން ރުފިޔާ ދިނުމަށް ހުށަހަޅައިފި އެވެ.
ބަޖެޓުގައި ބަޔާންކޮށްފައިވާ ގޮތުން އަންނަ އަހަރުން ފެށިގެން ކައުންސިލްތަކަށް ބަޖެޓް ދެމުންއައި އުސޫލު، 'ބްލޮކް ގްރާންޓް' އުސޫލުން ފައިސާ ދޫކުރާ ގޮތަށް ބަދަލުކުރަން ވަނީ ހުށަހަޅާފަ އެވެ.
މިބަދަލާ ގުޅޭގޮތުން ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ރައީސް އޮފީހުގެ ޕޮލިސީ ސެކްރެޓަރީ އައިމިނަތު ޝައުނާ ވިދާޅުވީ، މިއީ ކައުންސިލްތައް މާލީ ގޮތުން ލާމަރުކަޒު ކުރުމަށް ވިސްނައިގެން އެކުލާވާލާފައިވާ ސިޔާސަތެއް ކަމަށެވެ.
"އަޅުގަނޑުމެން ނިންމާފައި މިވަނީ ދައުލަތުގެ އާމްދަނީގެ ފަސް ޕަސެންޓާއި، ބިމު ކުލީގެ 40 ޕަސެންޓާއި އެ ރަށެއްގެ އިހްތިސާސްގައިވާ ހުރިހާ ތަނަކުން ލިބޭ ކުއްޔާއި އިތުރު ފީތަކުގެ 100 ޕަސެންޓް އެ ކައުންސިލަކަށް ދިނުމަށް." ޝައުނާ ވިދާޅުވި އެވެ.
ކައުންސިލްތަކަށް ދޭ ބްލޮކް ގްރާންޓުގެ ޖުމްލަ ބަހަން ނިންމާފައިވާ ގޮތް
ރަށު ކައުންސިލްތަކަށް ހަތް ޕަސެންޓް
- އަތޮޅު ކައުންސިލްތަކަށް 51 ޕަސެންޓް
- ސިޓީ ކައުންސިލްތަކަށް 51 ޕަސެންޓް
ޝައުނާ ވިދާޅުވީ އެ ފައިސާ ވަކިވަކި ކައުންސިލްތަކަށް ދޫކުރާނީ 'ސެންޓްރަލީ' ޖަމާ ކުރުމަށްފަހު ވަކި ފިސްކަލް ފޯމިއުލާއަކުން ކަމަށެވެ.
އެ ފޯމިއުލާގެ ތެރެއިން ހިލޭ އެހީ ކަނޑައަޅާއިރު ބަލާ ބައެއް ކަންތައްތަކުގެ ތެރޭގައި ދިރިއުޅޭ އާބާދީ، ބިމުގެ ބޮޑުމިން، އަތޮޅުގެ ވެރިކަން ކުރާ ރަށާ ހުރި ދުރުމިން، މާލެއާއި ހުރި ދުރުމިން އަދި ކައުންސިލް ހިންގުމުގެ ފެންވަރު ހިމެނެ އެވެ.
ބްލޮކް ގްރާންޓް ބެހުމުގައި އިސްކަންދެވޭ މިންވަރު
ޝައުނާ ވިދާޅުވީ އެ އުސޫލުން ފައިސާ ބަހާއިރު ބައެއް ކައުންސިލްތަކަށް މީގެ ކުރިން ލިބުނު ބަޖެޓަށް ވުރެ 400 ޕަސެންޓް ބޮޑު ބަޖެޓެއް ލިބިގެންދާނެ ކަމަށެވެ.
އެ ބަދަލާއެކު 2019 ވަނަ އަހަރަށް ފާސްކުރި ބަޖެޓާ އަޅާބަލާއިރު ރަށު ކައުންސިލްތަކަށް ލިބޭ ފައިސާ ގާތްގަނޑަކަށް 148.6 ޕަސެންޓް، އަތޮޅު ކައުންސިލްތަކަށް ލިބޭ ފައިސާ 155.1 ޕަސެންޓް އަދި ސިޓީ ކައުންސިލްތަކަށް ލިބޭ ފައިސާ 433.4 ޕަސެންޓް އިތުރުވާނެ ކަމަށް އަންނަ އަހަރަށް ހުށަހަޅާފައިވާ ބަޖެޓުގައި ވަނީ ލަފާކޮށްފަ އެވެ.